Aiee. Mbivilia yonanasya kana twaĩle kũmũvoya Ngai, syĩtwanĩ ya Yesũ. Yesũ eeie amanyĩwʼa make atĩĩ: “Inywʼĩ ĩndĩ voyaai atĩĩ: Asa waitũ ũla wĩ ĩtunĩ, syĩtwa yaku yĩtaĩwe.” (Mathayo 6:9) O na vai ĩmwe waaĩa amanyĩwʼa make mavoyae atheu, alaĩka, kana kĩndũ kĩngĩ eka Ngai.

 Yesũ asyokie eea amanyĩwʼa make atĩĩ: “Nyie ninyie nzĩa, na ninyie wʼo, na ninyie thayũ: vai mũndũ wũkaa kwa Asa atesĩle kwakwa.” (Yoana 14:6) No Yesũ weka ũtonya kũtwʼĩwʼanĩthya na Ngai.—Aevelania 7:25.

Nao nata ngavoya Ngai na ndivoya atheu?

 Nthĩnĩ wa ĩla mĩao ĩkũmi, Ngai aĩtye: “Nyie Yeova Ngai waku nĩ Ngai wĩ kĩwĩu.” (Kuma 20:5) Nĩ kwa nzĩa yĩva Ngai wĩthĩawa na “kĩwĩu”? Maelesyo ma kwongeleela nthĩnĩ wa Mbivilia ya New American Bible maĩtye kana Yeova nĩ Ngai “wendaa athaithwe e weka.” Ngai endaa ũthaithi wʼonthe, o na vamwe na mboya, syelekelwʼe kwake e weka.—Isaia 48:11.

 Nĩtũmũthatasya Ngai ĩla twavoya kĩndũ kĩngĩ, wĩthĩwe nĩ atheu kana alaĩka. Ĩla mũtũmwa Yoana wendaa kũthaitha mũlaĩka, mũlaĩka ũsu nĩwaleile na amwĩa: “Ndũkeke ũu: nyie nĩ ngombo vamwe naku na vamwe na ana-a-ĩthe maku ala makwataa ũkũsĩ wa Yesũ; thaitha Ngai.”—Ũvuanʼyo 19:10.