Mbivilia ĩmanyĩasya kana katĩ wa syũmbe syonthe ila syĩ ĩũlũ wa nthĩ, no andũ avũthũ makathi ĩtunĩ. (Ũvuanyʼo 14:1, 3) Andũ asu makathi ĩtunĩ kũsumbĩka ta asumbĩ na athembi vamwe na Yesũ. (Luka 22:28-30; Ũvuanyʼo 5:9, 10) Andũ ala aingĩ makathayũũkwʼa na mayĩkala ĩũlũ wa nthĩ nzaũ.—Savuli 37:11, 29.

 Vaiĩ vandũ Mbivilia ĩwetete kana ve wĩkalo wa nyamũ ta ngitĩ ĩtunĩ na ve kĩtumi kĩseo kĩtumaa ĩtaweta ũndũ ũsu. Nyamũ iyĩsa kwĩka maũndũ ta ala andũ mendekaa meanĩsye nĩ kana ‘metwe kũthi ĩtunĩ.’ (Aevelania 3:1) Maũndũ asu nĩ ta kũkwata ũmanyi, kwĩthĩwa na mũĩkĩĩo, na kũatĩĩa mĩao ya Ngai. (Mathayo 19:17; Yoana 3:16; 17:3) No andũ me oka moombiwe me na wĩkwatyo wa kwĩkala thayũ tene na tene.—Mwambĩlĩlyo 2:16, 17; 3:22, 23.

 Nĩ kana kyũmbe kyonthe kĩla kĩ ĩũlũ wa nthĩ kĩse kũthi ĩtunĩ no nginya kĩthayũũkwʼe. (1 Akolintho 15:42) Mbivilia nĩwetete mavinda kauta kweethĩiwe ũthayũũkyo. (1 Asumbĩ 17:17-24; 2 Asumbĩ 4:32-37; 13:20, 21; Luka 7:11-15; 8:41, 42, 49-56; Yoana 11:38-44; Meko ma Atũmwa 9:36-42; 20:7-12) Ĩndĩ syũmbe ila syathayũũkiwʼe ĩvindanĩ yĩu ti nyamũ, ĩndĩ nĩ andũ.

•  Syo nyamũ nĩsyĩthĩawa na thayũ?

•  Wʼo thayũ no ũkwʼe?

•  Syo nyamũ nĩsyĩkaa naĩ?

•  Yo andũ nĩmanengetwe mwanya wa kũthĩnyʼa nyamũ?

 Aiee. Mbivilia ĩmanyĩasya kana nyamũ na andũ nĩ thayũ. (Motalo 31:28) Yĩla mũndũ wa mbee, Atamu, woombiwe, ndaanengwa thayũ ĩndĩ ‘atwʼĩkie kyuu kĩ thayũ [kana mũndũ wĩ thayũ].’ (Mwambĩlĩlyo 2:7) Thayũ ũseũvawʼa nĩ syĩndũ ilĩ. Syĩndũ isu nĩ “kĩtoo kya nthĩ” na “mĩthũmũ ya thayũ.”

 Ĩĩ, na kĩtumi nũndũ Mbivilia ĩmanyĩasya kana thayũ no ũkwʼe. (Alivai 21:11; Esekieli 18:20) Yĩla nyamũ syakwʼa isyokaa kĩtoonĩ, na andũ no tawʼo. (Mũtavanʼya 3:19, 20) Kwa ndeto ingĩ, onthe nĩmaekaa kũendeea kwĩthĩwa vo. a

 Aiee. Na twĩasya ũu nũndũ kwĩka naĩ nĩ kũsũanĩa, kwĩwʼa, kana kwĩka ũndũ wʼonthe ũleanĩte na myolooto ya ũlũngalu ya Ngai. Nĩ kana kyũmbe kĩtwʼĩke nĩkyeeka naĩ nĩkyaĩle kwĩthĩwa na ũtonyi wa kwĩka motwi maseo na nyamũ iyĩthĩawa na ũtonyi ũsu. Thayũnĩ wasyo wʼonthe syĩkaa maũndũ kwosana na ũndũ syo syũmbĩtwe itekũtũmĩa kĩlĩko kana kũsũanĩa maũndũ. (2 Vetelo 2:12) Ĩtina wa ĩvinda nikusaa o na kau iyĩkaa naĩ.

 Aiee. Ngai anengie andũ ũkũmũ wa kũsumbĩka nyamũ ĩndĩ ndaamanenga mwanya wa kũithĩnyʼa. (Mwambĩlĩlyo 1:28; Savuli 8:6-8) Ngai nũthĩnĩkĩaa nyamũ syonthe o na vamwe na tũsũni tũnini. (Yona 4:11; Mathayo 10:29) Eaĩe athaithi make mesũvĩae maikathĩnyʼe nyamũ.—Kuma 23:12; Kũtũngĩlĩlwa Kwa Mĩao 25:4; Nthimo 12:10.