Mavinda maingĩ Mbivilia ĩmwĩtaa Yesũ “Mwana wa Ngai.” (Yoana 1:49) Ĩsyĩtwa yĩu “Mwana wa Ngai” yĩonanyʼa kana Ngai nĩwe Mũmbi, kana wumo wa syĩndũ syonthe ila syĩ thayũ, o vamwe na Yesũ. (Savuli 36:9; Ũvuanyʼo 4:11) Mbivilia ndĩmanyĩasya kana Ngai asyaie mwana kwa nzĩa ta ĩla mũndũũme na mũndũ mũka masyaa syana.

 O na Mbivilia yĩtaa alaĩka “ana ma Ngai.” (Yovu 1:6) O na eka ũu, yaasyaa kana mũndũ ũla waĩ wa mbee vyũ, Atamu, aĩ “mwana wa Ngai.” (Luka 3:38) Ĩndĩ o na vailye ũu, nũndũ Yesũ nĩwe woombiwe e wa mbee, na nĩwe e weka woombiwe ĩmwe kwa ĩmwe nĩ Ngai, Mbivilia yonanĩtye kana nĩwe Mwana ũla wa vata vyũ wa Ngai.

•  We Yesũ ekalaa ĩtunĩ atanamba kũsyawa kũũ ĩũlũ wa nthĩ?

•  Yesũ eekaa ata atanamba kũka ĩũlũ wa nthĩ?

 Ĩĩ. Yesũ aĩ kyũmbe kya veva ĩtunĩ atanamba kũsyawa kũũ ĩũlũ wa nthĩ ta mũndũ. O nake mwene aisye atĩĩ: “Natheeie kuma ĩtunĩ.”—Yoana 6:38; 8:23.

 Ngai oombie Yesũ atanamba kũmba syĩndũ ila ingĩ syonthe. O na Mbivilia yaĩtye ũũ ĩũlũ wa Yesũ:

•   “We . . . nĩwe wa mbee katĩ wa syĩndũ syonthe ila syoombiwe.”—Akolosai 1:15.

•   Nĩwe “ũla waĩ wa mbee kũmbwa nĩ Ngai.”—Ũvuanyʼo 3:14.

 Yesũ nĩweanĩisye wathani wawetete ĩũlũ wa “ũla kumĩla kwake nĩ kuma ĩvinda ya tene, kuma tene tene.”—Mika 5:2; Mathayo 2:4-6.

 Aĩ na kĩanda kĩnene mũno ĩtunĩ. Yesũ aneeneaa kĩanda kyu ĩvinda yĩla wavoyie na asya: “Asa, eka nĩthĩwe . . . na ndaĩa ĩla naĩ nayo yĩla naĩ vamwe naku mbee wa nthĩ ĩtanethĩwa.”—Yoana 17:5.

 Nĩwatetheeisye Ĩthe wake kũmba syĩndũ ila ingĩ syonthe. Yesũ athũkũmie na Ngai e “mũthũkũmi mũnene.” (Nthimo 8:30) O na Mbivilia yaĩtye ũũ ĩũlũ ya Yesũ: “Kwĩsĩla kwake syĩndũ ila ingĩ syonthe nĩsyoombiwe ĩtunĩ na kũũ nthĩ.”—Akolosai 1:16.

 Ngai amũtũmĩie Yesũ kũmba syĩndũ ila ingĩ syonthe. Na syĩndũ isu nĩ vamwe na syũmbe ila ingĩ sya veva, na syĩndũ ingĩ ila syĩ kũũ nthĩ na matunĩ. (Ũvuanyʼo 5:11) No twasye kana ngwatanĩo ya Ngai na Yesũ yĩla moombaa syĩndũ, no ta ũndũ ũmwe na ngwatanĩo ĩla yĩthĩawa vo katĩ wa mũndũ ũsomeete maũndũ ma myako (architect) na vundi. Mũndũ ũsu ũsomeete maũndũ ma myako nĩwe ũsolaa ũndũ nyũmba ĩkwĩthĩwa ĩilye, nake vundi aimyaka oou.

 Yesũ nĩwe waĩ ĩla Ndeto. Mbivilia yĩiweta ĩũlũ wa Yesũ atanoka kũũ nthĩ, ĩmwĩtĩte “ĩla Ndeto.” (Yoana 1:1) Ũu nĩ kwonanyʼa kana Ngai atũmĩie Mwana wake kũvikĩsya syũmbe ila ingĩ sya ĩtunĩ ũtũmane wake.

 O na ĩngĩ veonekana kana Yesũ nĩwaneenaa na andũ kũũ nthĩ vandũ va Ngai. Na nĩvatonyeka Ngai akethĩwa atũmĩaa Yesũ tawe Ndeto kũneena na Atamu na Eva yĩla maĩ mũũndanĩ wa Eteni. (Mwambĩlĩlyo 2:16, 17) Nĩvatonyeka Yesũ akethĩwa newe ũla mũlaĩka watongoesye Aisilaeli yĩla maĩ weũnĩ, na noĩthwa wasya ũla meeĩtwe mawĩthukĩĩsye waĩ wasya wa Yesũ.—Kuma 23:20-23. a