“Vaiĩ ĩtatwa yaamũkwata eka ala makwataa andũ. Ĩndĩ Ngai nĩ mũĩkĩĩku na ndakaeka mũtatwe kũvĩtũka ũndũ mũtonya kũmĩĩsya, ĩndĩ o vamwe na ĩtatwa yĩu, akaumĩlya nzĩa nĩ kana mũtonye kũyũmĩĩsya.”—1 Akolintho 10:13, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

 “Vaiĩ ĩtatwa yaamũkwata eka o ala makwataa mũndũ; ĩndĩ Ngai nĩ mũĩkĩĩku, ũla ũtaketĩkĩlya mũtatwe kũvĩtũka ũndũ mũtonya kũmĩĩsya, ĩndĩ o vamwe na ĩtatwa yĩu, akaumĩlya nzĩa nĩ kana mũtonye kũmĩĩsya.”—1 Akolintho 10:13, New King James Version.

 Mũsoa ũũ wonanĩtye nguma ĩmwe ya Ngai ya kwendeesya mũno, nayo nĩ ũĩkĩĩku wake. Athaithi ma Ngai ala aĩkĩĩku, nĩmatonya kwĩthĩwa mate na nzika kana akamatetheeasya, na mũno mũno yĩla makwatwa nĩ mathĩna kana matatwa.

 “Vaiĩ ĩtatwa yaamũkwata eka ala makwataa andũ.” Athaithi ma Ngai nĩmatonya kũtatwa meke ũndũ ũtamwendeeasya. O na kau matatwa ta asu methĩawa me maito, no makwataa andũ aingĩ ĩũlũ wa nthĩ. a Kwoou, athaithi ma Ngai o namo no methĩwe na mũĩkĩĩo kana makeethĩawa matonya kũmomĩĩsya.

 “Ngai nĩ mũĩkĩĩku.” Yeova b Ngai, nĩ Ngai wa kũĩkĩĩka na wa kwĩkwatwʼa. Mavinda onthe nĩwĩthĩĩtwe ayĩanĩsya watho wake wa kũlea kũtia ala mamwendete, malũmanasya nake na mamwĩwʼaa. (Kũtũngĩlĩlwa Kwa Mĩao 7:9; Savuli 9:10; 37:28) Kwoou, ala mamũthaithaa nĩmaĩle kwĩthĩwa mate na nzika kana akeanĩasya mawatho elĩ ma kwĩkĩa vinya ala maatĩĩe mũsoanĩ ũũ.

 “Ndakaeka mũtatwe kũvĩtũka ũndũ mũtonya kũmĩĩsya.” Ngai onanasya nĩ mũĩkĩĩku kwa kũlea kwĩtĩkĩlya matatwa methĩwe me metu mũno nginya wĩthĩe mũndũ ndatonya kũmĩĩsya. Nĩwĩsĩ kĩla athaithi make matonya kwĩanĩsya na kĩla matatonya kwĩanĩsya.—Savuli 94:14.

 “O vamwe na ĩtatwa yĩu, akaumĩlya nzĩa nĩ kana mũtonye kũyũmĩĩsya.” Ngai nũtonya kũvetanga ĩtatwa kana akanenga athaithi make kĩla mekwenda nĩ kana mayũmĩĩsye. Kwa ngelekanyʼo, nũtonya kũtũtongoesya kwĩsĩla veva wake mũtheu, akatũkiakisya kwĩsĩla Mbivilia, kana akatũnenga ũtethyo ũngĩ kwĩsĩla athaithi ala angĩ.—Yoana 14:26; 2 Akolintho 1:3, 4; Akolosai 4:11.

 Mũsoa ũũ wĩ nthĩnĩ wa valũa ũla mũtũmwa Vaulo waandĩkĩie kĩkundi kya Kĩklĩsto kĩla kyaĩ Kolintho. Kĩlungunĩ kĩĩ kya valũa wake, Vaulo atũmĩie maũndũ ala makwatie Isilaeli ya tene, methĩwe me ũkanyʼo kwa Akolintho. (1 Akolintho 10:11) Vaulo awetete matatwa meana ũna ala makwatie Aisilaeli, ala nĩ vamwe na kũthaitha mĩvwʼanano na ũlaalai. (1 Akolintho 10:6-10) Aisilaeli amwe nĩmakĩlilwʼe vinya nĩ matatwa asu. Atũmĩĩte ngelekanyʼo yoo, Vaulo alilikanĩtye Aklĩsto maikeyĩĩkĩĩe mũno maisũanĩa kana mayĩsa kũkĩlwʼa vinya nĩ matatwa. (1 Akolintho 10:12) Ĩndĩ o na vailye ũu, nĩwamekĩie vinya atũmĩĩte ndeto ila syĩ nthĩnĩ wa 1 Akolintho 10:13. Aĩkĩĩthĩtye athaithi ma Ngai ala aĩkĩĩku kana nĩmatonya kũmĩĩsya ĩtatwa o na yĩva.

 Ĩloele vitio ĩĩ nguvĩ wone maelesyo makuvĩ ma ĩvuku ya 1 Akolintho.