“Ũseo wakwa mwingĩ nũkwĩanĩe, nũndũ vinya wakwa wonekaa nesa wonzunĩ waku.”—2 Akolintho 12:9, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

 “Mumo wakwa nũkwĩanĩe, nũndũ vinya wakwa wonekaa nesa wonzunĩ waku.”—2 Akolintho 12:9, New International Version.

 Ngai amwathĩte mũtũmwa Vaulo kana akamũnenga vinya ũla ũkwenda nĩ kana omĩanĩsye na matatwa na mawonzu make.

 “Ũseo wakwa mwingĩ nũkwĩanĩe.” Ndeto ila Ngai wamũtavisye Vaulo ĩtina wa kũmũvoya na kĩthingʼĩĩsyo no ialyũlwe atĩĩ: “Ũseo wakwa nowʼo wĩ na vata nawʼo.” Kwa ndeto ingĩ, ũseo mwingĩ wa Ngai nĩweanĩtye kũtethya Vaulo omĩanĩsye na matatwa make. Ũu wesaa kũtonyeka ata? Ndeto ĩla ĩalyũlĩtwe ‘ũseo mwingĩ,’ kana “mumo,” yĩeleasya mũthĩnzĩo wa mana mũndũ ũtaĩlĩtwe nĩwʼo ũnenganĩtwe nĩ Ngai nũndũ wa ũlau wake. Maũndũ ala Vaulo ũandĩkĩte monanĩtye kana nĩwatethekie mũno nĩ ũseo mwingĩ wa Ngai. O na kau navu mbeenĩ Vaulo aĩ mũthĩnyʼa wa andũ, Ngai nĩwamũnengie vinya ũla wendaa nĩ kana avĩndũe mwĩkalĩle wake, na aitetheesya angĩ matwʼĩke Aklĩsto. (1 Akolintho 15:9, 10; 1 Timotheo 1:12-14) Vaulo aĩ atonya kwĩkwatya ũtethyo wa Ngai, ate na nzika o na vanini kana nũkũmũtetheesya akĩlye vinya mathĩna kana mawetu o na meva ala meũmũkwata.

 “Nũndũ vinya wakwa wonekaa nesa wonzunĩ waku.” Mwĩaĩi Yeova a amũlilikanĩtye Vaulo kana vinya Wake wonekaa nesa vyũ yĩla waũtũmĩa kũtetheesya andũ onzu na me na naĩ. (2 Akolintho 4:7; 12:8) Yĩla Aklĩsto meethĩwa mesĩ maũndũ ala matonya kwĩanĩsya na ala matatonya, na maimũkũlya Yeova amatetheesye, metĩkĩlasya vinya wa Ngai ũthũkũme nthĩnĩ woo. (Aeveso 3:16; Avilivi 4:13) Kwa nzĩa ĩsu, vinya wa Ngai nĩwonekaa nesa wonzunĩ wa andũ.

 Vaulo aandĩkĩie Aklĩsto ma Kolintho valũa mũvevee vakuvĩ mwakanĩ wa 55 ĩtina wa Klĩsto. Ilungunĩ sya mũthya nĩwaeleisye kana aĩ na ũkũmũ wa kwĩthĩwa e mũtũmwa. Eewʼaa aĩlĩte kwĩka ũu nũndũ andũ amwe ala metusaa kwĩthĩwa me alimũ nĩmamũvũthasya, na nĩvatonyeka makethĩwa mamũsilĩlaa nũndũ wa ũndũ wailye kana nũndũ wa ũtonyi wake wa kũneena.—2 Akolintho 10:7-10; 11:5, 6, 13; 12:11.

 Vaulo ayĩtetea nũeleetye kana kwa vinya wake, ndaĩ atonya kwĩthĩwa eanĩisye ũthũkũmi wake na akomĩĩsya matatwa ala mamũkwatĩte. (2 Akolintho 6:4; 11:23-27; 12:12) Kĩlungunĩ kya 12, nũwetete kwa nzĩa ya ngelekanyʼo ĩũlũ wa “mwĩwʼa mwĩĩnĩ.” Nĩvatonyeka ũkethĩwa waĩ thĩna mũna ũtathelaa, ũla watumaa ethĩwa na kyalya kingĩ kana woo ngoonĩ. (2 Akolintho 12:7) O na kau Vaulo ndaaelesya thĩna wake, nĩwatwʼĩte vyũ kũendeea kũwũmĩĩsya atetheewʼe nĩ Ngai.

 Ũmũnthĩ, o namo Aklĩsto no makwatwe nĩ mawetu kana makathĩnwʼa. Nĩmakiakiawʼa nĩ kũmanya kana vinya wa Ngai nũtonya kũmatetheesya kũmĩanĩsya na ĩtatwa o na yĩva yĩla yamakwata. O ta Vaulo, no masye ũũ mate na nzika: “Yĩla nĩ mwonzu, nĩwʼo nĩthĩawa na vinya.”—2 Akolintho 12:10.

 Ĩloele vitio ĩĩ nguvĩ wone maelesyo makuvĩ ma ĩvuku ya 2 Akolintho.