MĨSOA YA MBIVILIA ĨELEETWʼE

Alomi 10:13—“Ũla Wĩkaĩlaa Ĩsyĩtwa ya Mwĩaĩi”

THAŨKA

“Kĩla mũndũ wĩkaĩlaa ĩsyĩtwa ya Yeova akatangĩĩwa.”—Alomi 10:13, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Mũndũ o na wĩva ũla wĩkaĩlaa ĩsyĩtwa ya Mwĩaĩi akatangĩĩwa.”—Alomi 10:13, King James Version.

Kĩla Ĩandĩko ya Alomi 10:13 Yonanasya

Ngai nde kyende, na nũnengete andũ onthe mwanya wa kwĩsa kũtangĩĩwa na maikwata thayũ wa tene na tene, methĩwe maumĩte mbaĩnĩ yĩva, ũko wĩva, kana me na ũkwati ũilye ata. Ĩndĩ o na vailye ũu, nĩ kana tũtetheke, no nginya twĩkaĩle ĩsyĩtwa ya Yeova, yĩla nĩyo ĩsyĩtwa ya Ngai Mwene Vinya Wʼonthe. a—Savuli 83:18.

Mbivilianĩ, ndeto ii syaĩtye “wĩkaĩlaa ĩsyĩtwa ya Yeova” syonanasya maũndũ maingĩ eka o kũmanya ĩsyĩtwa ya Ngai na kũyĩtũmĩa yĩla tũũmũthaitha. (Savuli 116:12-14) Syonanasya kana nĩtwaĩlĩte kũmũĩkĩĩa Ngai na kũmwĩkwatya atũtetheesye.—Savuli 20:7; 99:6.

Yesũ Klĩsto nĩwoonaa ĩsyĩtwa ya Ngai yĩ ya vata. Ndeto sya mbee vyũ nthĩnĩ wa ĩla mboya ya Mwĩaĩi wamanyĩisye syaĩtye atĩĩ: “Asa waitũ ũla wĩ ĩtunĩ, ĩsyĩtwa yaku yĩtaĩwe,” kana yĩthewʼe. (Mathayo 6:9) O na ĩngĩ, Yesũ nĩwoonanisye kana ethĩwa nĩtũkwenda kũkwata thayũ wa tene na tene no nginya tũmũmanye, tũmwĩwʼe, na tũimwenda Yeova.—Yoana 17:3, 6, 26.

Nĩkĩ tũtonya kwasya kana Yeova nĩwe “Mwĩaĩi” ũla ũwetetwe nthĩnĩ wa Alomi 10:13 nthĩnĩ wa King James Version? Nũndũ ndeto isu syumĩtwʼe nthĩnĩ wa Yoeli 2:32, vala ĩsyĩtwa ya Ngai, na ti ĩsyĩtwa ya ũnene “Mwĩaĩi,” yonekaa nthĩnĩ wa kĩthyomo kya tene kya Kĩevelania. b

Mĩsoa Ĩla Ĩthyũlũlũkĩte Alomi 10:13

Nthĩnĩ wa Alomi kĩlungu kya 10, Mbivilia yonanĩtye no nginya mũndũ amũĩkĩĩe Yesũ Klĩsto nĩ kana etĩkĩlwe nĩ Ngai. (Alomi 10:9) Ũndũ ũsu nũkwatĩtwe mbau nĩ mĩsoa kauta nthĩnĩ wa Maandĩko ala metawa Ũtĩanĩo Mũkũũ. Mũndũ onanasya e na mũĩkĩĩo kwa ‘kũtavanyʼa ũtheinĩ,’ kũla nĩ vamwe na kũtavanyʼa ũvoo mũseo ĩũlũ wa ũtangĩĩo kwa ala matamwĩsĩ Ngai. Nũndũ wa kĩu, angĩ nĩmakwataa mwanya wa kwonanyʼa mũĩkĩĩo ũla ũkatuma makwata thayũ wa tene na tene.—Alomi 10:10, 14, 15, 17.

Soma Alomi kĩlungu kya 10 vamwe na maelesyo ma kwongeleela.

a Ĩsyĩtwa ya Ngai yĩkwatĩkanaa ta mavinda 7,000 mavukunĩ ma tene ma Mbivilia. Kĩthyomonĩ kya Kĩevelania, ĩsyĩtwa ya Ngai yandĩkawa na nthoo inya, ila syĩtawa Tetragrammaton. Kĩthyomonĩ kya Kĩkamba ĩsyĩtwa yĩu yĩandĩkawa “Yeova”; ĩndĩ, asomi amwe monaa yaĩle kũandĩkwa “Yahweh.”

b Nĩvatonyeka aandĩki ma Mbivilia ala maĩ Aklĩsto matũmĩie ĩsyĩtwa ya Ngai yĩla maumĩĩasya Maandĩko ma “Ũtianĩo Mũkũũ” ala me na ĩsyĩtwa ya Ngai. Ĩvuku The Anchor Bible Dictionary yaĩtye: ʼVe na ũĩkĩĩthyo wa kana ila nthoo syĩtawa Tetragrammaton, ila siũngamĩe ĩsyĩtwa ya Ngai, Yahweh, nĩsyakwatĩkanaa nthĩnĩ wa ilungu imwe kana syonthe sya Ũtianĩo Mũkũũ ila syaumĩĩiwʼe nthĩnĩ wa Ũtianĩo Mweũ yĩla Maandĩko asu ma Ũtianĩo Mweũ maandĩkawa kwa ĩvinda ya mbee vyũ.ʼ (Ĩvuku ya 6, ĩthangũ ya 392) Wenda kũkwata ũvoo mwingangĩ, sisya “Jina la Mungu Katika Maandiko ya Kigiriki ya Kikristo” nthĩnĩ wa Biblia Takatifu—Tafsiri ya Ulimwengu Mpya, Nyongeza A5. Nthĩnĩ wa Appendix C2 Mbivilianĩ ya kwĩmanyĩsya (study edition) ya New World Translation of the Holy Scriptures, nĩvonanĩtwʼe Mbivilia syĩ kĩvathũkanyʼo ila itũmĩĩte ĩsyĩtwa ya Ngai nthĩnĩ wa Alomi 10:13.