MĨSOA YA MBIVILIA ĨELEETWʼE

Mathayo 6:33—“Manthai Mbee Ũsumbĩ wa Ngai”

THAŨKA

“Endeeai ĩndĩ kũmantha mbee Ũsumbĩ na ũlũngalu wake, na syĩndũ isu ingĩ syonthe mũkongeleelwa.”—Mathayo 6:33, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Ĩndĩ manthai mbee Ũsumbĩ wa Ngai na ũlũngalu Wake, na syĩndũ ii ingĩ syonthe mũkongeleelwa.”—Mathayo 6:33, New King James Version.

Kĩla Ĩandĩko ya Mathayo 6:33 Yonanasya

Ũsumbĩ wa Ngai nĩ silikalĩ yĩ ĩtunĩ ĩla ĩkeanĩsya kwenda kwa Ngai ĩũlũ wa nthĩ. (Mathayo 6:9, 10) Mũndũ amanthaa mbee Ũsumbĩ kwa kũũtwʼĩkĩthya ũndũ ũla wa vata vyũ thayũnĩ wake. a Kĩu kyonanasya ti o kwĩthĩwa na mea ma kwĩmanyĩsya ĩũlũ wa Ũsumbĩ wa Ngai tũ, ĩndĩ nĩ vamwe na kũtavya angĩ ĩũlũ wa maũndũ maseo ala Ũsumbĩ ũsu ũkeanĩsya. (Mathayo 24:14) O na ĩngĩ mũndũ ũla ũmanthaa Ũsumbĩ, nũvoyaa wũke.—Luka 11:2.

Ũlũngalu wa Ngai ũkonetye myolooto yake ĩũlũ wa mwĩkalĩle ũla waĩlĩte na ũla ũtaĩlĩte. (Savuli 119:172) Kwoou, mũndũ amanthaa ũlũngalu wa Ngai kwa kwĩkalaa kwosana na mĩao ya Ngai ya mwĩkalĩle, ĩla kĩla ĩvinda ĩtethasya.—Isaia 48:17.

Ndeto syĩndũ isu ingĩ syonthe mũkongeleelwa, nĩ watho wa kana Ngai akeanĩasya mavata ma ala mavĩtya mbee Ũsumbĩ na myolooto yake thayũnĩ woo.—Mathayo 6:31, 32.

Mĩsoa Ĩla Ĩthyũlũlũkĩte Mathayo 6:33

Yesũ aneenie ndeto ii nthĩnĩ wa Ũtavanyʼa wa Kĩĩmanĩ, ũla ũwetetwe nthĩnĩ wa Mathayo kĩlungu kya 5-7. Vate nzika aingĩ ma ala mamwĩthukĩĩsye Yesũ maĩ ngya. Nĩmatonya kwĩthĩwa mewʼaa kana kĩla maaĩle kũthĩnĩkĩa mbee vyũ nĩ kwĩanĩsya mavata moo ma kĩ-mwĩĩ, ũndũ ũla wesaa kũtuma methĩwa na ĩvinda ĩnini ya kũmantha Ũsumbĩ. Ĩndĩ Yesũ nĩwamekĩie vinya masisye ũndũ Ngai ũsũvĩaa mĩtĩ na nyamũ ila woombie. Ngai nĩwathanĩte kwĩka ũu kwondũ wa ala mamanthaa Ũsumbĩ wake mbee.—Mathayo 6:25-30.

Ũmanyĩsyo wa Ũvũngũ Ĩũlũ wa Mathayo 6:33

Ũmanyĩsyo wa Ũvũngũ: Mũndũ ũla ũmanthaa Ũsumbĩ akeethĩwa e mũthwii.

Kĩla Mbivilia Ĩmanyĩasya: Yesũ aisye kana ala maia Ũsumbĩ wa Ngai mbee makeethĩwa na kĩla me na vata nakyo, ta lĩu na ngũa. (Mathayo 6:25, 31, 32) Ĩndĩ o na vailye ũu, ndaatwatha kana tũkakwataa o kĩla twenda, o na ndaaonanyʼa kana ũathimo wa Ngai ũkooneka kwĩsĩla ũthwii wa kĩ-mwĩĩ. O na eka ũu, Yesũ nĩwakanisye ala mamwĩthukĩĩsye ĩũlũ wa kũsembanyʼa na ũthwii, nũndũ nĩkũtonya kũtuma wĩthĩwa ne ũndũ wĩ vinya kũmantha mbee Ũsumbĩ. (Mathayo 6:19, 20, 24) Mũtũmwa Vaulo nĩwathũkũmaa na kĩthito vyũ kwondũ wa Ũsumbĩ wa Ngai, ĩndĩ o na vailye ũu mavinda amwe nĩwanyivĩawa nĩ syĩndũ sya kĩ-mwĩĩ. O ta Yesũ, nĩwakanisye angĩ ĩũlũ wa mũisyo wa kwĩkĩa kĩthito tũtwʼĩke athwii.—Avilivi 4:11, 12; 1 Timotheo 6:6-10.

Ũmanyĩsyo wa Ũvũngũ: Aklĩsto mai na vata wa kũtethya wĩa meanĩsye mavata moo.

Kĩla Mbivilia Ĩmanyĩasya: Mbivilia yaasya kana Aklĩsto nĩmaĩle kũthũkũma meanĩsye mavata moo na ma mĩsyĩ yoo. (1 Athesalonika 4:11, 12; 2 Athesalonika 3:10; 1 Timotheo 5:8) Yesũ ndaasya kana aatĩĩi make maĩle kũmantha Ũsumbĩ wʼoka; vandũ va ũu, aisye maĩle kũmantha Ũsumbĩ mbee.

Ala mamanthaa Ũsumbĩ wa Ngai mbee na methĩawa meyumĩtye kũthũkũma meanĩsye mavata moo, no mekale mate na nzika kana Ngai akamatetheeasya meanĩsye mavata ala ma lasima thayũnĩ.—1 Timotheo 6:17-19.

a Ndeto “endeeai . . . kũmantha” ialyũlĩtwe kuma ndetonĩ ya Kĩkiliki ĩla yonanasya ũndũ mũna mũndũ ũendeeaa kwĩka, na ndeto isu nitonya kũalyũlwa ta ”kũmantha ũte kũeka.” Kwoou, Ũsumbĩ waĩle kwĩthĩwa wĩ ũndũ ũla wa vata vyũ na ti ũndũ ũũtwendeesya o kwa kavinda.