“Kilyai, mũmanye ninyie Ngai: Nganenevwʼa katĩ wa i mbaĩ, nganenevwʼa nthĩ.”—Savuli 46:10, The Bible in Kikamba, 1974.

 “Usyai, na mũimanya kana nyie nĩ Ngai. Nganenevwʼa katĩ wa mbaĩ, nganenevwʼa ĩũlũ wa nthĩ.”—Savuli 46:10, King James Version.

 Ngai nũthuthĩtye kĩla ũmwe witũ amũthaithe na aimanya kana nĩwe waĩle kũsumbĩka ĩũlũ wa nthĩ yonthe. Mũndũ ũla ũkwenda kwĩsa kwĩkala ĩũlũ wa nthĩ tene na tene aĩlĩte kũmanya ũtonyi na ũkũmũ wake.—Ũvuanyʼo 4:11.

 “Kilyai, mũmanye ninyie Ngai.” Mbivilia imwe ialyũlĩte ndeto isu sya mbee ta “usyai.” Kĩu kĩtumĩte andũ aingĩ maelewa naĩ kana nĩ mwĩao andũ mekale mavindĩtye kanisanĩ. Ĩndĩ ndeto ya Kĩevelania ĩla ĩalyũlĩtwe “kilyai, mũmanye ninyie Ngai,” nĩ ũtao kuma kwa Yeova a Ngai aitavya andũ make kuma mbaĩnĩ syonthe, aimathuthya maeke kũmũvĩnga na maimanya kana e weka no we waĩlĩte kũthaithwa.

 Ndeto ta isu sya kũthangaasya syĩ nthĩnĩ wa Savuli 2. Kĩlungunĩ kĩu, Ngai athanĩte kana akoosea ĩtambya ala mamũvĩngaa. Kĩvathũkanyʼo na ũu, ala mamanyaa ũkũmũ wa Ngai nĩmamwĩkwatasya amatongoesye, amekĩe vinya, na aimanenga ũĩ. Nũndũ ‘nĩmevithaa nthĩnĩ wake’ methĩawa me atanu na me asuvĩĩku na mũno mũno mavindanĩ ala momũ.—Savuli 2:9-12.

 “Nganenevwʼa katĩ wa i mbaĩ, nganenevwʼa nthĩ.” Ĩvindanĩ ya tene, Yeova Ngai nĩwaneneviwʼe yĩla watũmĩie vinya wake mwingĩ kũsũvĩa andũ make. (Kuma 15:1-3) Ĩvinda yũkĩte, akanenevwʼa mũno vyũ yĩla kĩla mũndũ ĩũlũ wa nthĩ ũkenyivĩsya ũkũmũ wake na aimũthaithaa no we.—Savuli 86:9, 10; Isaia 2:11.

 Ĩvuku yĩmwe yĩtĩte Savuli 46 “wathi wa kũtaĩa ũtonyi wa Ngai, ũla wĩ vinya mwingĩ na ũsũvĩaa andũ make.” Yĩla andũ ma Ngai mekwina Savuli 46, nĩmoonanasya kana nĩmekwatĩtye ũtonyi wa Yeova wa kũmasũvĩa na kũmatetheesya. (Savuli 46:1, 2) Ndeto isu nĩsyamalilikanilye kana mavinda onthe Yeova ethĩawa vamwe namo.—Savuli 46:7, 11.

 Nĩ kana maĩkĩĩe vyũ kana Yeova Ngai e na ũtonyi wa kũmasũvĩa, ĩvuku yĩu ya Savuli nĩyamekĩie vinya masũanĩe ĩũlũ wa maũndũ ma ũsengyʼa ala Yeova wamekĩte. (Savuli 46:8) Mũno mũno Savuli ĩsu yaneeneete ũtonyi wake wa kũmina kaũ vyũ. (Savuli 46:9) Kwa nzĩa ĩngĩ, Yeova nĩwaminie kaũ ĩvindanĩ ya tene kwa kũmasiĩĩa andũ make kumana na mbaĩ ila syaĩ amaitha moo. O na ũu wĩ o vo, Mbivilia nĩyathanĩte kana o mĩtũkĩ Ngai akilye aneeka ũu kwa nzĩa nene na kũmina kaũ ĩũlũ wa nthĩ yonthe.—Isaia 2:4.

 We Yeova nũtetheeasya athaithi make ũmũnthĩ? Ĩĩ. Nĩkyo kĩtumi mũtũmwa Vaulo wamekĩie vinya Aklĩsto mamwĩkwatye Yeova amatetheesye. (Aevelania 13:6) Ndeto ila syĩ nthĩnĩ wa Savuli 46 itwĩkĩaa vinya tũendeee kũmũĩkĩĩa Yeova na ũtonyi wake wa kũtũsũvĩa. Nitũtetheeasya kũmwona Ngai ta “wĩvitho witũ na vinya witũ.”—Savuli 46:1.

 Ĩloele vitio ĩĩ nguvĩ wone maelesyo makuvĩ ma ĩvuku ya Savuli.