Ngũsĩ sya Yeova nitũmĩaa Mbivilia syĩ kĩvathũkanyʼo yĩla mekwĩmanyĩsya. Ĩndĩ nĩtwendete mũno kũtũmĩa Mbivilia ya New World Translation of the Holy Scriptures, ithyomonĩ ila ĩkwatĩkanaa. Na kĩtumi nũndũ Mbivilia ĩsu nĩtũmĩĩte ĩsyĩtwa ya Ngai, ndĩ na mavĩtyo, na yĩ laisi kũeleeka.

•   Nĩtũmĩĩte ĩsyĩtwa ya Ngai. Aalyũli amwe ma Mbivilia nĩmaemete kũnenga Mũandĩkĩthya wayo ndaĩa ĩla ĩmwaĩlĩte. Kwa ngelekanyʼo, Mbivilia ĩmwe nĩwetete masyĩtwa ma andũ mbee wa 70 ala matetheeisye wĩanĩ wa kũmyumĩthya. Ĩndĩ, Mbivilia o ĩsu ĩkavetanga vyũ ĩsyĩtwa ya Mũandĩkĩthya wayo ũla nĩ Yeova Ngai.

   Kĩvathũkanyʼo na ũu, Mbivilia ya New World Translation nĩyĩkĩĩte ĩsyĩtwa yĩu ĩtheu Mbivilianĩ mavinda ngili siana ũna, o kũla yaĩ Maandĩkonĩ ma mbee, na masyĩtwa ma ala maĩ kamitiinĩ ya kũmyumĩthya maiwetetwe.

•   Ndĩ na mavĩtyo. Ti Mbivilia syonthe ialyũlĩte nesa ũvoo ũla waĩ maandĩkonĩ ma tene ma Mbivilia. Kwa ngelekanyʼo, Mbivilia ĩmwe ĩalyũlĩte Mathayo 7:13 atĩĩ: “Likĩlai mbingĩlonĩ ĩla ntheke, nũndũ mbingĩlo nĩ nthanthau ĩla ĩelete ĩianĩ ya mwaki, na nzĩa ĩla ĩelete vo yĩ laisi kwĩsĩla.” Ĩndĩ, maandĩko ma mbee ma Mbivilia matũmĩĩte ndeto “wanangĩkonĩ” ĩndĩ ti “ĩianĩ ya mwaki.” Nĩvatonyeka aalyũli asu makethĩwa matũmĩie ndeto “ĩianĩ ya mwaki” nũndũ maĩkĩĩa kana ala athũku makavĩvwʼa tene na tene ĩianĩ ya mwaki. Ĩndĩ woni ũsu ndũkwatĩtwe mbau nĩ Mbivilia. Na nĩkyo kĩtumi Mbivilia ya New World Translation ĩalyũlĩte ndeto isu atĩĩ: “Likĩlai mbingĩlonĩ ĩla ntheke, nũndũ mbingĩlo nĩ nthanthau na nzĩa nĩ mbaamu ĩla ĩelete wanangĩkonĩ, namo nĩ aingĩ ala mesĩlaa vo.”

•   Yĩ laisi kũeleeka. Mbivilia ĩalyũlĩtwe nesa ti o ĩla ĩte na mavĩtyo, ĩndĩ nĩyaĩle kwĩthĩwa ĩisomeka nesa na ĩtũmĩĩte ndeto syĩ laisi kũelewa. Kwasũanĩa ngelekanyʼo ĩno. Nthĩnĩ wa Alomi 12:11, mũtũmwa Vaulo atũmĩie ndeto ila syaalyũlwa ndeto kwa ndeto syonanasya “vevanĩ ũtheũkĩte.” Nũndũ ndeto ila syonanasya ũu iyĩelekaa nesa Kĩsũngũnĩ kya matukũ aa, Mbivilia ya New World Translation ĩtũmĩĩte ndeto syĩ laisi mũsoanĩ ũsu. Yaĩtye kana Aklĩsto maĩle ‘kwakana vevanĩ.’

 Eka o kwĩthĩwa ĩtũmĩĩte ĩsyĩtwa ya Ngai, ĩte na mavĩtyo, na yĩ laisi kũeleeka, ve ũndũ ũngĩ wa kwendeesya ĩũlũ wa Mbivilia ya New World Translation. Ĩnyaĩĩkawʼa vate ndĩvi. Nũndũ wa ũu, andũ milioni mbingĩ nĩmatonya kũsoma Mbivilia kwa kĩthyomo kyoo ene, o na ala mate na ũtonyi wa kũmĩthooa.