Ala mavatisiwe matwʼĩka Ngũsĩ sya Yeova ĩndĩ maeka kũtavanyʼa, o na kana maeka kũmbana na ngũsĩ ila ingĩ, maivathawa. Vandũ va ũu nĩtũtataa mũno kũmamantha na kũmekĩa vinya masyokee ngwatanĩo yoo nzeo na Ngai.

 Mũndũ eeka naĩ ngito ndavetangawa kĩkundinĩ vau kwa vau. Ĩndĩ mũndũ mũvatise atwʼĩka akatũlaa mĩao ĩla yĩ Mbivilianĩ atekwĩlila, nũvathawa kana kwa ndeto ingĩ nũtengawa. Mbivilia yaĩtye nesa atĩĩ: “Mũvetei ĩndĩ ũsu mwathe, aume katĩ wenyu.”—1 Akolintho 5:13.

 Nao nata ethĩwa mũndũ nĩwatengwa na ũyĩthĩa mũka na syana no ngũsĩ? Kĩla kĩvĩndũkaa no ngwatanĩo yoo ya kĩ-ũthaithi ĩndĩ maendeeaa kwĩthĩwa me o andũ make. Aendeeaa kwĩkalanyʼa na mũka na syana syake o ta tene na mayĩka maũndũ ma mũsyĩ o ũndũ maneekaa.

 Andũ atenge no maendeee kũthi maũmbanonĩ maitũ ma ũthaithi. O na makenda no manewe ũtao umĩte Maandĩkonĩ nĩ atumĩa ma kĩkundi. Kĩeleelo kya atumĩa nĩ kũtetheesya kĩla ũmwe aĩle ĩngĩ kwĩthĩwa e Ngũsĩ ya Yeova. Andũ atenge matia mwĩkalĩle mũthũku na mayonanyʼa vyũ kana me na wendi wa kwĩkala kwosana na mĩao ĩla yĩ Mbivilianĩ, nĩmathokawʼa ĩngĩ matwʼĩke Ngũsĩ sya Yeova.