Kwĩ Ngũsĩ sya Yeova Siana Ata Ĩũlũ wa Nthĩ Yonthe?
Mũtalaa ata ũndũ Ngũsĩ sya Yeova siana?
Ala matalawa ta Ngũsĩ sya Yeova no ala matavanasya ũvoo mũseo wa Ũsumbĩ wa Ngai na kĩthito kĩla mwei. (Mathayo 24:14) Asu nĩ ala avatise makatwʼĩka Ngũsĩ, vamwe na ala matambĩte kũvatiswa ĩndĩ metĩkĩlĩtwʼe kũtavanyʼa.
No nginya mũndũ aumye mbesa nĩ kana atwʼĩke ũmwe wa Ngũsĩ sya Yeova?
Aiee. Mbesa iitonya kũtuma ũmwe atwʼĩka Ngũsĩ ya Yeova, o na iitonya kũtuma mũndũ anengwa kĩanda kĩna ũseũvyonĩ witũ. (Meko ma Atũmwa 8:18-20) Mĩvothi mingĩ ĩla yumawʼa, mũndũ nĩwe ũmanyaa kĩla waumya. Kĩla ũmwe waitũ aumasya ĩvinda yake, vinya wake, o na malĩ yake kwosana na ũtonyi wake na wendi wake, nĩ kana atetheesye wĩa witũ wa nthĩ yonthe.—2 Akolintho 9:7.
Mũmanyaa ata Ngũsĩ ila itavanasya na kĩthito?
Kĩla mwei, Ngũsĩ ninenganae livoti ya ũtavanyʼa kĩkundinĩ kĩla syĩthĩawa. Livoti ĩno yumawʼa na ngenda.
Livoti isu nĩsyũmbanawʼa vamwe, na ũtalo wasyo wʼonthe ũitũmwa ovisinĩ wa ũvonge wa nthĩ ĩla kĩkundi kĩu kĩĩ. Kĩla ovisi wa ũvonge nawʼo nũtũmaa livoti ĩsu ovisinĩ ũla mũnene wa Ngũsĩ sya Yeova nthĩ yonthe.
Mũthyanĩ wa kĩla mwaka wa ũthũkũmi, a ũtalo ũla wĩ ĩũlũ vyũ wa Ngũsĩ sya Yeova kuma nthĩ syĩ kĩvathũkanyʼo nũmanyĩkaa. Ũtalo ũsu nĩwongelanawʼa, na ĩndĩ Ngũsĩ sya Yeova iimanyĩka siana ata ĩũlũ wa nthĩ yonthe. Ĩtina wa ũu, livoti ya kĩla nthĩ yonanĩtye ũthũkũmi wʼonthe, nĩyĩkĩawa kĩsesenĩ kitũ kĩlungunĩ kĩla kĩtawa: “Ĩũlũ wa Nthĩ Yonthe.” Livoti ii nitwʼĩkĩaa vinya mũno, o ũndũ syeekĩaa vinya Aklĩsto ma ĩvinda ya Atũmwa.—Meko ma Atũmwa 2:41; 4:4; 15:3.
Nĩmũtalaa ala malikanaa nenyu o na kau maitavanasya?
O na kũtwʼĩka tũitalaa ala matatavanasya, nĩtũmathokasya ikundinĩ sitũ. Aingĩ moo nĩmombanaa ũmbano wa kũlilikana kĩkwʼũ kya Yesũ. Nũndũ nĩtwĩsĩ ũtalo wa Ngũsĩ ũndũ wĩana, no tũtalĩthye ũtalo woo twaumanyʼa ĩsavu ya Ngũsĩ na ala mokie ũmbanonĩ ũsu. Mwaka wa 2023, ala mookie ũmbanonĩ ũũ wa kũlilikana kĩkwʼũ kya Yesũ maĩ 20,461,767.
Andũ aingĩ ala matokaa maũmbanonĩ maitũ, nĩmamanyĩawʼa Mbivilia mĩsyĩnĩ kwoo vate ndĩvi. Mwaka wa 2023, nthĩnĩ wa nthĩ yonthe, twaĩ na amanyĩwʼa ma Mbivilia 7,281,212 kĩla mwei. Ũtalonĩ ũsu ve amwe mamanyĩawʼa me vamwe o na kau livotinĩ matalĩtwe ta mũmanyĩwʼa ũmwe.
Nĩkĩ ũtalo wa Ngũsĩ sya Yeova ũla silikalĩ yosaa wĩthĩawa wĩ ĩũlũ kũthonoka wenyu?
Yĩla silikalĩ ĩkũtala andũ, mavinda maingĩ ĩmakũlasya mo meyĩtaa ma ndĩni yĩva. Kwa ngelekanyʼo, nthĩ ya Amelika, mũvea ũla ũtethasya wĩa wa kũtala andũ ũeleetye kana ala matalaa andũ “mendaa o kũmanya mũndũ eyĩtanĩasya na ndĩni yĩva.” Yongelete kũelesya kana, ala meũtala andũ mamatalaa kwosana na mawoni ala andũ asu me namo ĩndĩ ti kwosana na ũwʼo wa maũndũ.” Kĩvathũkanyʼo namo, ithyĩ tũtalaa ala matavanasya na makanengane livoti, ĩndĩ ti ala mekaa o kwĩyĩta Ngũsĩ.
a Mwaka witũ wa ũthũkũmi wambĩĩaa, ĩtukũ 1, Mwei wa 9 nginya matukũ 31, Mwei wa 8, mwaka ũla ũatĩĩe. Kwa ngelekanyʼo, mwaka wa ũthũkũmi wa 2015, wambĩĩie ĩtukũ 1, Mwei wa 9, 2014, nginya matukũ 31, Mwei wa 8 , 2015.
No Wendeewʼe Nĩ Ii
MAVUKU & MBULOSUA
Livoti ya Mwaka wa Ũthũkũmi ya Ngũsĩ sya Yeova Nthĩ Yonthe ya 2023
Soma wone ũndũ wĩa wa kũtavanyʼa nthĩ yonthe wa Ngũsĩ sya Yeova ũnaendeeie kuma Mwei wa 9, 2022, nginya Mwei wa 8, 2023.
MAKŨLYO MAKŨLAWʼA MAVINDA MAINGĨ
Ndonya Kwĩka Ata Ndwʼĩke Ngũsĩ ya Yeova?
Ĩandĩko ya Mathayo 28:19, 20 nĩyonanĩtye matambya atatũ mũndũ waĩle kwosa.
ĨŨLŨ WITŨ
Kũlya Ũthokewe
Kwata ũsũngĩo wa ĩkũlyo yĩkonetye Mbivilia, kana wĩmanyĩsye mũnango ĩũlũ Ngũsĩ sya Yeova.