Ũvũngũ: Andũ ma Ngũsĩ sya Yeova maemaa kũtanĩa Isita nũndũ ndĩni yoo ti ya Kĩklĩsto.

 Ũwʼo: Tũĩkĩĩaa kana Yesũ Klĩsto nĩwe mũtangĩĩi witũ na nĩtũtataa ũndũ tũtonya ‘tũatĩĩae nyaĩĩ syake’—1 Vetelo 2:21; Luka 2:11.

 Ũvũngũ: Inywʼĩ mũiĩkĩĩaa kana Yesũ nĩwathayũũkiwʼe.

 Ũwʼo: Nĩtũĩkĩĩaa vyũ kana Yesũ nĩwathayũũkiwʼe na kana kũthayũũkwʼa kwake nĩ kwa vata mũno kwa Aklĩsto. O na ĩla tũũtavanyʼa nĩtũmanyĩasya ala angĩ ĩũlũ wa ũndũ ũsu.—1 Akolintho 15:3, 4, 12-15.

 Ũvũngũ: Mũimakaa syana syenyu iteũtanĩa maũndũ sikũkũnĩ ya Isita.

 Ũwʼo: Twendete syana sitũ mũno na ũndũ ũsu ũtumaa twĩyumya vyũ kũimanyĩsya na kũitetheesya syĩkale syĩ na ũtanu.—Tito 2:4.

•   Sikũkũũ ya Isita ndĩwetetwe Mbivilianĩ.

•   Yesũ atiie atwĩaĩa tũlilikanae kĩkwʼũ kyake ĩndĩ ti ũthayũũkyo wake. Kĩla mwaka nĩtwĩkaa ũmbano wa kũlilikana kĩkwʼũ kyake ĩvinda ya kwĩka ũu yavika. Twĩkaa ũu tũatĩĩe kalenda ka Mbivilia.—Luka 22:19, 20.

•   Maũndũ ala mekawa ĩvindanĩ ya Isita maumanĩte na syĩthĩo sya tene syakonanĩtye na ũsyai. Kwoou, tũĩkĩĩa kana maũndũ asu matumaa Ngai atesa kwĩtĩkĩla sikũkũ ĩsu. Ngai “nĩ Ngai wĩ kĩwĩu” na kwoou we ndendete ũthaithi ũkonanĩtwʼe na imanyĩo ũtetĩkĩla.—Kuma 20:5; 1 Asumbĩ 18:21.

 Tũĩkĩĩaa kana twĩ na itumi nzeo vyũ syumĩte Mbivilianĩ sya kũema kũtanĩa Isita. Mbivilia ĩtwĩkĩaa vinya tũtũmĩae “ũĩ mwĩanĩu na kĩlĩko” vandũ va kwĩkaa o kũatĩĩa syĩthĩo sya andũ. (Nthimo 3:21; Mathayo 15:3) Mũndũ atũkũlya ũndũ twonaa Isita nĩtũmũtavasya ĩndĩ tũimũthingʼĩĩasya aatĩĩe woni ũsu. We mwene niwe wĩtwʼĩaa kĩla ũkwenda kwĩka.—1 Vetelo 3:15.