Ngũsĩ sya Yeova iyĩendaa kaũnĩ nũndũ wa itumi ii:

1.   Kũmwĩwʼa Ngai. Mbivilia yaĩtye kana athũkũmi ma Ngai “makatusya mbyũ syoo itwʼĩke mĩthya ya maembe ma ngʼombe” na kana “[matikemanyĩsya] kaũ ĩngĩ.”—Isaia 2:4.

2.   Kũmwĩwʼa Yesũ. Yesũ eeie mũtũmwa Vetelo ũũ: “Tũngĩa ũvyũ waku vandũ vawʼo: nũndũ onthe ala makwataa ũvyũ makaanangwa na ũvyũ.” (Mathayo 26:52) Kwoou Yesũ oonanisye kana aatĩĩi make maikakua mĩio ya kaũ.

    Amanyĩwʼa ma Yesũ nĩmaatĩĩaa mwĩao wake wa kwĩthĩwa ‘mate ma nthĩ’ kwa kũlea kwĩlikya siasanĩ. (Yoana 17:16) Mayĩkaa maandamano maileana na maũndũ ma kaũ o na mailikĩlĩĩlaa ala matwʼa kũtwʼĩka asikalĩ ma ita.

3.   Kwenda angĩ. Yesũ eeie amanyĩwʼa make ũũ: “Mwĩthĩwe mũkyendana.” (Yoana 13:34, 35) Amanyĩwʼa asu maĩ mese kũtwʼĩka ana-a-asa ma nthĩ yonthe vate ũmwe ũkũkita na mwana-a-asa ũngĩ kana mwĩĩtu-a-asa.—1 Yoana 3:10-12.

4.   Ngelekanyʼo ya Aklĩsto ma ĩvinda ya atũmwa. Ĩvuku yĩmwe (Encyclopedia of Religion and War) yaĩtye ũũ: “Aatĩĩi ala ma tene vyũ ma Yesũ maleile vyũ kwĩlikya kaũnĩ na itanĩ,” nũndũ nĩmeesĩ kwĩka ũu “kũyosanĩte na mwolooto wa wendo ũla Yesũ wamanyĩisye na ũndũ wameaĩe mende amaitha moo.” Nake mũsomi ũmwe wa maũndũ ma ndĩni wa Germany wĩtawa Peter Meinhold aisye atĩĩ aiwetea amanyĩwʼa ma Yesũ ma tene: “Mũndũ ndaĩ atonya kwĩthĩwa mũsikalĩ na ayĩthĩwa Mũklĩsto ĩvindanĩ yĩmwe.”

 Ngũsĩ sya Yeova nĩ andũ ma vata ũtũinĩ na iivalaanasya mũuo wa nthĩ ila syĩkalaa. Nĩtũnengete ndaĩa silikalĩ kwosana na mĩao ĩno ya Mbivilia:

•   “Kĩla mũndũ nĩethĩwe e mwĩwi wa ala me na ũkũmũ.”—Alomi 13:1.

•   “Mũnengei Kaisali syĩndũ sya Kaisali; na Ngai syĩndũ sya Ngai.”—Mathayo 22:21.

 Kwoou nĩtũatĩĩaa mĩao, tũkaĩva koti, na tũileanaa na mĩvango ya silikalĩ ya kũtetheesya andũ mekale me eanĩe.