Aiee, ndĩni ya Ngũsĩ sya Yeova ndyumanĩte na mũndũ (cult). Ithyĩ twĩ Aklĩsto, na tũtataa ũndũ tũtonya tũatĩĩe momanyĩsyo ma Yesũ Klĩsto vamwe na ngelekanyʼo ĩla watũtiĩe.

 Andũ maeleasya ndeto “cult” kwa nzĩa syĩ kĩvathũkanyʼo. Ĩndĩ kwasũanĩa maelesyo elĩ katĩ wa ala manenganĩtwe, na ũisisya nĩkĩ kwosana na maelesyo ithyĩ tũtesa kwĩtwa cult.

•   Amwe monaa cult nĩ ndĩni nzaũ yambĩlĩĩlwʼe na ĩĩkĩĩaa maũndũ me kĩvathũkanyʼo na ndĩni ila ingĩ. Ngũsĩ sya Yeova iyaaĩka kwambĩĩsya ndĩni nzaũ. Ĩndĩ tũthaithaa ũndũ Aklĩsto ala maĩ ĩvinda ya atũmwa mathaithaa. Ngelekanyʼo ya Aklĩsto asu na mũthaithĩle woo niandĩkĩtwe Mbivilianĩ. (2 Timotheo 3:​16, 17) Tũĩkĩĩaa kana Maandĩko Matheu nĩmo maĩle kũtũtavya nĩ mũthaithĩle wĩva waĩle, na nĩ wĩva ũtaĩle.

•   Angĩ monaa cult nĩ mũthemba mũthũku mũno wa ndĩni weekie kũkavũka ndĩninĩ ĩngĩ nenange, na wĩthĩawa ũtongoewʼe nĩ mũndũ mũna. Ngũsĩ sya Yeova mayĩkwatasya mũndũ o na wĩva amatongoesye. Ĩndĩ tũatĩĩa kĩla Yesũ wawetie. Atavisye aatĩĩi make atĩĩ: “Mwĩaĩi wenyu nĩ ũmwe, nĩwe Klĩsto.”​—Mathayo 23:10.

 Vandũ va ndĩni ya Ngũsĩ sya Yeova kwĩthĩwa yĩ ndĩni nthũku kana cult, ĩsu nĩ ndĩni ĩtumaa athaithi mayo maendeea nesa, vamwe na ala me ũtũinĩ. Kwa ngelekanyʼo, ũtavanyʼa witũ nũtumĩte andũ aingĩ maekana na mĩkalĩle mĩthũku, ta kũnywʼa ndawa sya kũmila vamwe na ũthengi. O na eka ũu, nĩtwĩthĩawa na ilasi sya kũmanyĩsya ala matesĩ kũsoma na kũandĩka, o na methĩwe matwĩe nthĩ yĩva. Na ũndũ ũngĩ nĩ kana nĩtwendete mũno kũtetheesya ala makwatwa nĩ mĩisyo mĩnene. Tũtataa ũndũ tũtonya twĩthĩwe na mwĩkalĩle mũseo, o tondũ Yesũ weaĩe aatĩĩi make.​—Mathayo 5:​13-​16.