Zarina avatisĩiwe Russia na atwʼĩka ũmwe wa Ngũsĩ sya Yeova, na ĩndĩ asyoka kwoo Central Asia avangĩte kũthi kũmanyĩsya twĩlĩtu twake twĩlĩ nĩ kana twĩane twĩsĩ ũwʼo. Nũndũ ndaĩ na mbesa imwĩkalya na syana syake, ekalaa nyũmba ya lumu ũmwe vamwe na asyai make na kĩmwana masyaanĩwʼe na mũka wakyo. Asyai make mamwĩie ndakaatate kũmanyĩsya twĩlĩtu twake ũwʼo wa Mbivilia. O na masyokie meea i syana ikaaneenee na nyinyia maũndũ ma Mbivilia.

 Zarina asũanĩie mũno ũndũ ũtonya kũtetheesya syana syake syĩmanyĩsye ĩũlũ wa Yeova. (Nthimo 1:8) O na avoyaa Yeova mũno amũnenge ũĩ na aimũtetheesya amanye nzĩa ila ũtonya kũtũmĩa kũimanyĩsya. Na ĩndĩ ambĩĩa kwĩka kwosana na mboya syake. Aendaa na twĩlĩtu twake kũtembea na ĩndĩ aineena natwʼo ĩũlũ wa wũmbi. Kwĩka ũu kwatumie twĩlĩtu tũu twambĩĩa kwendeewʼa nĩ Mũmbi.

 Ĩtina, Zarina nĩwesie kũvindĩĩsya nzĩa ũtonya kũtũmĩa nĩ kana amanyĩsye syana syake maũndũ maingangĩ atũmĩĩte ĩvuku Mbivilia Yo Ĩmanyĩasya Ata? a Oosaa tũthangũ na ayumĩĩsya tũlungu na makũlyo kuma ĩvukunĩ yĩu. Na nĩ kana syana ielewe nesanga tũlungu twa ĩvuku yĩu, nĩwongeleelaa maelesyo make tũthangũnĩ tũla waandĩkaa. Amina kwĩka ũu, oosaa venzoo na tũthangũ tũu na aivitha ungu wa masinĩ ya kũvũa ngũa ĩla yeethĩawa yiĩtwe mbavu. Twĩlĩtu twake twathi mbavu vala ve masinĩ, twosaa tũthangũ tũu tũkasoma na ĩndĩ tũyĩandĩka mosũngĩo ma makũlyo.

 Zarina atũmĩie nzĩa ĩsu kwĩmanyĩsya na syana syake ilungu ilĩ sya ĩvuku Mbivilia Ĩmanyĩasya matambĩte kũthamĩĩa vandũ vangĩ me atatũ, we na twĩlĩtu twake. Ĩtina wa kũthama, aĩ atonya kũmanyĩsya syana syake ũwʼo ateũvĩngĩĩswa nĩ mũndũ. Twĩlĩtu tũu twavatisiwe Mwei wa 10, 2016. Twatanie mũno kwona ũndũ nyinyia watwʼo watũmĩie ũĩ na ũmanyi nĩ kana atũmanyĩsye Mbivilia.