Rachel, ũla yu wĩkalaa Dominican Republic, aĩtye atĩĩ: “Ndisyawa mũsyĩ witũ nĩwamũthũkũmaa Yeova. Ĩndĩ ũndũ wa kũmakya nĩ kana, yĩla navikisye myaka mũonza, ĩthe wakwa nĩwaekie kũmbana na Ngũsĩ sya Yeova na ambĩĩa kũvĩnga ũla wʼo. Atumie vethĩwa ve vinya mũno kwakwa kũmũthaitha Yeova. Kwa ngelekanyʼo, mavinda amwe nĩwambathaa kũnthooea simũ, kũndwaa tũkatembee Disneyland, kana kũnenga mbesa neetĩkĩla kũeka kũmũthũkũma Yeova! O na mavinda amwe nĩwangũnaa ngundi aitata kũnthingʼĩĩsya nĩmũtie Yeova. Ayĩka ũu aasya kana neethĩwa ndatonya kũneena kana kũtembea, ngeethĩwa ndatonya kũthi maũmbanonĩ. Ĩndĩ kĩu kĩyaatuma nĩeka kũmũthũkũma Yeova. Na mavinda onthe nĩnĩkĩaa kĩthito nĩthi maũmbanonĩ.

 “Ĩthe wakwa aĩkĩĩthasya kana ndanambũa inyia wakwa e vakuvĩ. O na ambĩaa natata kũtavya inyia wakwa ũndũ wambũaa, nũkũmũũmĩsya. Yĩla inyia wakwa wakũlya ĩũlũ wa mawũũmĩsye ala naĩ namo, ĩthe wakwa amwĩaa kana maumanĩte na masoesi ala wanengae ma kũkita karate.

 “Nũndũ naĩ mũnini mũno, nĩnakĩaa kũtavya inyia wakwa kĩla kyaendeee. Na kwoou namũtavasya Yeova. Nĩnaendaa kũtembea kĩthekanĩ kyaĩ ĩtina wa nyũmba yitũ kĩsionĩ kya Maryland, Amelika. Kĩthekanĩ kĩu, vaĩ na mũtĩ ũmwe mwanake mũno wa mwaloni ũla nalĩsaa, na ndyĩkalĩla ũkava ũmwe waĩ mũlũmu, na ĩndĩ ndyambĩĩa kũneena na Yeova. Namũtavasya ũndũ ngwĩwʼa ngoonĩ, maũndũ ala navangĩte kwĩka kwondũ wake neana, na namwĩsũvaa andetheesye nginya yĩla nĩvika vu. O na nĩnamũtavasya maũndũ ala ngeka nalika nthĩ nzaũ, mũsyĩ ũla ngethĩwa nawʼo, na ũndũ ngatana kwĩthĩwa na mũuo na ũtanu, kũte na woo na wia.

 “Yĩla ĩthe wakwa watataa kũnthingʼĩĩsya nĩmũtie Yeova kwa kũmbatha syĩndũ kana kũmbũa, mavinda onthe neewʼaa Yeova aingiakisya na aimbĩkĩa vinya. Ngai nĩwandetheeisye kwĩkala nĩ mũĩkĩĩku na nĩ mũlũmu.

 “Navatisiwe nĩ na myaka 10, na ĩtina wa myaka ĩlĩ noosa ũvainia. Mbeenĩ, ĩthe wakwa ndeesĩ kana nĩneekĩte maũndũ asu elĩ. Ĩndĩ yĩla wesie kũmanya, angũnie ngundi nginya ũkambu wakwa wakitũka.

 “Andũ amwe mambĩaa kana ndyaaĩlĩte kwosa ũvainia nũndũ naĩ mũnini, na maĩ na wia nũndũ moonaa ta ndaeleetwe nesa ũito wa ũtwi ũsu neekĩte. Ĩtina wa ĩvinda nĩnoonie Ngũsĩ mbingĩ sya mũika kĩsionĩ kitũ ila italũmanĩtye na Yeova. Kĩla mavĩtĩtye mbee no kwĩtanĩthya na kũthi vatĩnĩ syĩ kĩvathũkanyʼo. Na maũndũ asu meekaa moonekaa me ma kwendeesya! O na mavinda amwe neewʼaa ndyenda kwĩka tamo. Neekũlasya, ‘Nĩkĩ ndaeka kũtavanyʼa, na ndyĩtanĩthya ta andũ ala angĩ ma ĩika yakwa?’ Ĩndĩ yĩla nambĩĩa kwĩwʼa ũu, nĩnaneenaa na Yeova ĩũlũ wa ũndũ ũsu.

 “Nĩ na myaka ta 15, mũndũ ũmwe wathũkũmaa kambunĩnĩ yĩsĩkĩe mũno ya maũndũ ma wanake nĩwangũnĩie. Mendaa kũndĩva mbesa mbingĩ nĩ kana ngathũkũme namo ovisinĩ woo, taoninĩ ya Milan, Italy. Neewie mũyo mũno nũndũ naĩ nambĩĩe kũtũmĩwa kũkathĩĩa syĩndũ syoo, kumĩla makasetinĩ, o na kwonanyʼa ngũa sya mbesa mbingĩ nĩ kũla kambunĩ iendaa kwonanyʼa syĩndũ ila ithooasya. Neethĩĩtwe nĩ vainia wa kĩla ĩvinda vakuvĩ myaka ĩtatũ, na nasũanĩaa, ‘Wĩa ũũ no ũndetheesye kũkwata mbesa itoetye nĩ kana nĩendeee kwĩthĩwa nĩ vainia kwa ĩvinda yĩasa!’ O na ĩngĩ, ĩthe wakwa aĩ atũtiie, na kwoou noonaa kana mbesa isu syaĩ itonya kũtetheesya inyia wakwa kwĩanĩsya mavata maitũ.

 “Nĩnavoyie ĩũlũ wa ũndũ ũsu. O na nĩnaneenie na inyia wakwa, ũla weethĩĩtwe e vainia kwa myaka mingĩ, na naneena na mũtumĩa ũmwe wa kĩkundi ũla namwendete na namũnengete ndaĩa. O na ĩngĩ, o tondũ nakothaa kwĩka, nĩnaendie ũla mũtĩnĩ na navoya mũno ĩũlũ wa ũndũ ũsu. Yeova nĩwasũngĩie mboya syakwa kwĩsĩla ũla mũtumĩa wa kĩkundi, na ambonyʼa ndeto sya mũsoa ũmwe wĩ Mbivilianĩ. Syĩ nthĩnĩ wa Mũtavanʼya 5:4, vala vaĩtye: ‘Yĩla weevĩtĩa Ngai wĩvĩto, ndũkethĩwe na kĩkono kya kũwĩanĩsya. Ĩanĩsya ũla weevĩtie.’ Nĩneevĩtĩte kũmũthũkũma Yeova na ngoo yonthe, na nĩnakĩaa nũndũ wĩa ũũ waĩ ũtonya kwananga ngwatanĩo yakwa na Yeova. Kwoou nĩnatwie kũlea wĩa ũsu.

 “O na kau nĩnakwatiwe nĩ maũndũ asu nĩendeee kwĩana, nĩnesie kũtwʼĩka mũndũ mũima! Yu nĩ na mũsyĩ mũtanu nĩ na mũemewa, Jaser, na kamwana kaitũ, Connor, kala ke na myaka kenda. Jaser nĩ mũtumĩa wa kĩkundi, na Connor nĩ mũtavanyʼa ũte mũvatise. Nĩthĩĩtwe ũthũkũminĩ wa ĩvinda yonthe vakuvĩ myaka 27.

 “Mavinda maingĩ nĩnĩsũanĩaa ũndũ naneenaa na Yeova kwa ĩvinda yĩasa ũla mũtĩnĩ wa mwaloni kĩthekanĩ kĩla kyaĩ ĩtina wa nyũmba yitũ. Nĩnamwĩsũvaa Yeova andetheesye, na nĩwĩkĩte ũu kwa nzĩa ya kwendeesya mũno. Nũnengete vinya, akangiakisya, na akandongoesya. Thayũnĩ wakwa wʼonthe, Yeova nũmbonetye ĩngĩ na ĩngĩ ũndũ we ne ĩthe ũseũvĩte. Nĩ mũtanu mũno nũndũ nĩnanyuvie kũmũthũkũma na ngoo yonthe. Ũsu nĩwʼo ũtwi ũla mũseo vyũ naaĩka.”