Meekĩaa Ngũa syĩ na Kĩlaka kya Kona Itatũ kya Langi wa Nzambalaũ
Maud ekalaa France na athũkũmaa sukulunĩ ĩmwe kũtetheesya syana ila itetonya yĩla iendeee kũsoma. O mĩtũkĩ kĩlasinĩ kĩmwe syana syasomaa ĩũlũ wa kambi sya Nazi na ũaani mwingĩ ũla waendeeie nthĩ ya Germany. Avungwa kambinĩ isu meekĩaa ngũa itumĩĩwe kĩlaka kya langi mũna kĩla kyatũmĩawa ta ũvano. Nĩ kana mũndũ amanye nĩkĩ mũvungwa wovetwe, aĩ atonya o kũsisya ũndũ kĩlaka kĩu kĩtilĩtwe na langi wakyo.
Mũndũũme ũmwe waĩ mwalimũ aineenea ilaka sya kona itatũ sya langi wa nzambalaũ ila syatumĩĩawa ngũanĩ sya avungwa amwe aisye: “Nĩĩsilya ilaka isu syatumĩĩawa ngũanĩ sya aũme ala makomaa na aũme na aka ala makomaa na aka.” Ĩtina wa ĩsomo yĩu, Maud nĩwaneenie nake na amũelesya kana Nazi yatũmĩaa ilaka sya mũthemba ũsu kũvana Ngũsĩ sya Yeova. a Mwĩĩtu-a-asa ũsu nĩweeie mwalimũ ũsu kana no amũetee ũvoo mwingangĩ ũeleetye ũndũ ũsu. Mwalimũ ũsu nĩweetĩkĩlile na akũlya Maud aelesye kĩlasi kyonthe ũvoo ũsu wamũeteie.
Ĩvindanĩ yĩngĩ syana iineenea o ũndũ ũsu na mwalimũ ũngĩ kĩlasinĩ, mwalimũ ũsu nĩwatũmĩie kyati kyoonanĩtye ilaka syĩ kĩvathũkanyʼo ila syeethĩawa ngũanĩ sya avungwa. Kyati kĩu nĩkyoonanĩtye nesa kana ilaka sya kona itatũ sya langi wa nzambalaũ syatumĩĩawa ngũanĩ sya avungwa ala maĩ Ngũsĩ sya Yeova. Ĩtina wa ĩsomo yĩu, Maud nĩwoonisye mwalimũ ũsu ũvoo mũna ũkonetye kĩla masomaa. Mwalimũ ũsu nĩwamwĩthukĩĩisye na akũlya Maud aelesye kĩlasi kyonthe ũvoo ũsu.
Maud akwete syĩndũ sya kũmanyĩsya ila watũmĩie
Maud avangĩte kũtũmĩa ndatĩka 15 kũelesya kĩlasi ũvoo ũsu, ĩndĩ yĩla ĩvinda yavikie eeiwe: “Twĩkũnenga ĩsaa yĩima” Ambĩĩie na kũmonyʼa vitio yonanĩtye ũndũ Ngũsĩ sya Yeova syathĩnĩiwʼe kambinĩ ya Nazi. Yĩla vitio ĩsu yavikie vandũ vaeleetye ĩũlũ wa syana 800 sya Ngũsĩ sya Yeova ila syavathanĩtwʼe na asyai, Maud nĩwambie kũmyũngamya na asomea kĩlasi ũvoo mũna waandĩkĩtwe nĩ syana itatũ katĩ wa isu. Vitio yathela, Maud asomeie kĩlasi valũa waandĩkĩtwe mwaka wa 1940 nĩ kĩmwana kya myaka 19 kyeetawa Gerhard Steinacher, kĩla kyaumĩte mũsyĩ waĩ na wumo wa Australia. Kĩmwana kĩu kyaĩ kambinĩ ĩsu na kyaandĩkĩie asyai makyo valũa ũsu vatiele o masaa manini kyũawe. b
Maud nĩwakwatie mwanya wa kũneenea ũvoo ũsu na kĩlasi kĩngĩ. Nũndũ wa ũkũmbaũ ũsu woonanisye, yu kĩla ĩvinda alimũ asu meũmanyĩsya ĩũlũ wa kambi sya mathĩna sya Nazi nĩmawetaa ũndũ Ngũsĩ sya Yeova syathĩnĩiwʼe kwʼo.
a Ĩvindanĩ ya Kaũ wa Kelĩ wa Nthĩ Yonthe, Ngũsĩ sya Yeova nthĩ ya Germany, ila ĩvindanĩ yĩu syeetawa Bibelforsche (Amanyĩwʼa ma Mbivilia), nĩsyoovetwe nũndũ wa kũlea kũkwata mbau kyama kya Nazi.
b Gerhard Steinacher asilĩilwe kũawa nũndũ wa kũlea kũlika itanĩ sya kaũ sya Germany. Valũanĩ ũsu aandĩkie atĩĩ: “Nĩ o mwana mũnini. Na ndyũngama nĩ mũlũmu ate o Mwĩaĩi anengie ũkũmbaũ, na ũu nĩwʼo ngũmũvoya.” Kwakya kũla kwaatĩĩe, Gerhard nĩwooaiwe. Mbũanĩ yake vaandĩkĩtwe ndeto ii: “Akwie nũndũ wa ndaĩa yake kwa Ngai.”
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Nĩ Kyaũ Kyakwatie Ngũsĩ sya Yeova Ĩvindanĩ ya Ũla Ũaani Mũnene?
No ũsengʼe mũno wamanya ũsũngĩo.
MOSŨNGĨO MA MAKŨLYO MA MBIVILIA
Nĩkĩ Ngai Waekie Ayuti Aingĩ Moawe Ĩvinda Yu?
Andũ aingĩ nĩmekũlĩtye nĩkĩ Ngai wĩ wendo ũekete mathĩna ta asu methĩwe kwʼo. Mbivilia nĩnenganĩte mosũngĩo maseo!