Danielle nĩ Ngũsĩ ya Yeova na ekalaa South Africa. Mũthenya ũmwe nĩwoonie kamũvuko katiĩtwe nĩ mũndũ mũkaawanĩ mũna. Yĩla wavingũie kamũvuko kau, eethĩie ke na mboosi yĩ na mbesa na syĩndũ ingĩ sya vata. Danielle nĩwatwie kũmantha mwene wa kamũvuko kau. Kwoou nĩwatatie kũsisya nthĩnĩ one kana nũkũkwata namba ya vosita ya mwene kana namba ya simũ, ĩndĩ kĩla woonie no ĩsyĩtwa ya mwene. Na nũndũ kamũvukonĩ kau vaĩ ka kaati yoonanĩtye vengi ĩla mũndũũme ũsu ũtũmĩaa, Danielle nĩwatatie kũmũmantha kwĩsĩla yo ĩndĩ ndaamũkwatya. Danielle ndaakwʼa ngoo aeke kũmũmantha. Nĩwaendeeie kũngʼangʼana na ĩtina akwata namba ya simũ yoonanĩtwʼe lisitinĩ mũndũũme ũsu waandĩkĩwe nĩ ndakĩtalĩ na akũna namba ĩsu. Yĩla wakũnie, mũthũkũmi wa sivitalĩ ũla woosie nĩweetĩkĩlile kũmũnenga namba ya mũndũũme ũsu.

 Mũndũũme ũsu nĩwasengʼie mũno yĩla wakwatie simũ kuma sivitalĩnĩ ĩsu na atavwʼa kana Danielle nũkwatie kamũvuko kake na eenda kũmũtũngĩa. Yĩla waendie kwosa, akomanie na Danielle na ĩthe. Nĩmatũmĩie mwanya ũsu kũmũtavya nĩkĩ matatie kũmũmantha na kĩthito mũno. Mamwĩie kana mo nĩ Ngũsĩ sya Yeova, na nĩmatataa maatĩĩe myolooto ya Mbivilia thayũnĩ woo. Na mamwĩa kana kĩu nĩkyo kĩtumaa menda kwĩthĩwa me aĩkĩĩku mavinda onthe.—Aevelania 13:18.

 Ĩtina wa masaa meana ũndũ mũna, mũndũũme ũsu nĩwatũmĩie Danielle na ĩthe ũtũmane amatũngĩĩte mũvea ĩngĩ nũndũ wa kũmũtũngĩa kamũvuko kake na mboosi yake. Amaandĩkĩie atĩĩ: “Nĩmũtũngĩa mũvea mũno nũndũ wa kwĩkĩa kĩthito kya kũmantha. Nĩnĩnatanie mũno kũkomana nenyu na mũsyĩ wenyu. Mwĩ ngoo nzeo na nĩmwendanĩte na ndikolwa ninywʼe. Na nũndũ nĩmũnambĩkie nesa mũno nĩenda kũmũnenga mũvothi mũnini nũndũ nĩnĩsĩ nĩmwĩyĩimĩte maũndũ maingĩ nĩ kana mũmũthũkũme Ngai. Vate nzika kĩko kĩu mũneekie nĩkĩnoonanisye nesa kana mwĩ andũ aseo. Danielle nũnoonanisye nĩ mũĩkĩĩku na nũlũmanĩtye na Ngai wake vyũ. Mwa nĩngũmũtũngĩa mũvea mũno na Ngai nĩaathime wĩa wenyu wa kũtavanyʼa.”

 Ĩtina wa myei mĩvũthũ, ĩthe wa Danielle nĩwakomanie ĩngĩ na ũla mũndũũme, na mũndũũme ũsu amũelesya kĩla kyeekĩkie o ĩvinda ĩkuvĩ ĩtina wa kũkwata kamũvuko kake kala waaĩtye. Amũeleisye kana mũthenya ũmwe aithooa syĩndũ nĩwoonie mboosi ĩvalũkĩte nthĩ. Na amũelesya kana yĩla wamanyie mũndũ mũka ũla waaĩtye mboosi ĩsu nĩwamũtũngĩie na amũtavya kĩla kyatumie eka ũu. Eeie mũndũ mũka ũsu kana ĩvinda yĩte vaasa we mwene nĩwaaĩtye mboosi yake na ũla wamyonie amũtũngĩa nũndũ aĩ na ngoo nzeo. Aisye atĩĩ: Kĩko kĩmwe kya ngoo ntheu o na ethĩwa nĩ kĩnini nĩũtuma mũndũ ũngĩ enda kwĩka oou na kĩu kĩituma andũ onthe mekalanyʼa nesanga.”