Nasyaĩwe taoninĩ nini yĩtawa San Juan Chancalaito, ĩla yĩ kĩsionĩ kya Chiapas, nthĩ ya Mexico. Ithyĩ twĩ ma mbaĩ ya Chol, ĩla yumanĩte na mbaĩ ĩmwe nene yĩtawa Maya. Kwitũ tũsyaĩtwe twĩ 12, na nyie nĩ wa katano. Nĩtwemanyĩasya Mbivilia na Ngũsĩ sya Yeova nĩ na syana ila tũsyaanĩwʼe yĩla naĩ mũnini. Ũndũ wa kũmakya nĩ kana ndyaatĩĩa maũndũ ala nemanyĩisye yĩla naĩ mũnini.

 Ndivikya myaka 13 nĩnatũmĩaa ndawa sya kũmila na nĩnooyaa syĩndũ syeene. Nĩ na myaka ĩsu nĩnaumie mũsyĩ na nambĩĩa kwĩkala kũndũ kwĩ kĩvathũkanyʼo. Nauma vamwe ndithi vangĩ. Nĩ na myaka 16 nĩnambĩĩie kũthũkũma mũũndanĩ wa vangi. Nathũkũmangie vau ta mwaka ũmwe ũu, na ĩndĩ ũtukũ ũmwe tũkuĩte vangi waĩ mwingĩ na ĩsiwa, twathyũlũlũkwa nĩ aũme meeyovete mĩio ya kaũ nesa. Aũme asu maĩ ma kĩkundi kĩngĩ kyatesaa vangi taitũ. Mambĩĩe kũtwĩkya isasi ĩndĩ nyie navonokeie kwĩyĩkya ũsĩnĩ, na nathambĩa nathi kumĩla ĩtheo vandũ vaasa. Kuma vu nakĩie nathi kwĩkalaa Amelika.

 Nĩ Amelika naendeeie kũthoosya ndawa sya kũmila na neelikya mathĩnanĩ angĩ maingĩ. Nĩ wa myaka 19, nĩnakwatiwe na nekwʼa yela nũndũ wa ũvenani, na nũndũ nĩnatatie kũaa mũndũ. Nĩ kũu yela nĩnalikanile na kĩkundi kya imaamai, na naendeea kwĩka maũndũ angĩ ma ũngʼendu. Nũndũ wa ũu, anene ma yela nĩmanthamisye mandwaa yela yoveawa andũ ala maemie, yĩ vandũ vetawa Lewisburg, Pennsylvania.

 Nĩ yela ya Lewisburg, mwĩkalĩle wakwa nĩwaendeeie kũthũkĩĩa. Nũndũ naĩ neesolile movano ma kĩkundi kĩu kya imaamai mwĩĩnĩ wakwa, nalikanile ĩngĩ laisi mũno na imaamai sya kĩkundi o kĩu ila syaĩ yelanĩ ĩsu. Naendeeie kwĩthĩwa nĩ mũngʼendu mũnango, na nduuthĩ yakilasya yookĩla ũkethĩa nĩ o vo. Ĩvinda yĩmwe nĩ na imaamai sya kĩkundi kitũ nĩtwokitie na imaamai sya kĩkundi kĩngĩ kĩwanzanĩ kya yela ĩsu. Twokitie kaũ mũvyũ mũno tũtũmĩĩte ndata ila itũmĩawa kũthaũka mũvĩla wa baseball na syũma ila andũ mokĩlasya mayĩka masoesi ma mwĩĩ. Asikalĩ ma yela malasimĩkie kũtwĩkĩsya nzeve ya kumya methoi nĩ kana kaũ ũsu ũthele. Ĩtina wa vau, aũngamĩi ma yela nĩmatwie nĩthĩwe ũmwe katĩ wa avungwa athũku ala maaĩlĩte kũsiĩĩwa vyũ ũkethĩa o na ndyona mwanya wa kumaala. Nathataa ũkethĩa ndikiitĩka, na naneenaa naĩ vyũ. Waĩ ũndũ wĩ laisi mũno kwakwa kũkũna andũ. O na nĩnatanaa kwĩka ũu. Ndyeelilaa nũndũ wa maũndũ ala neekaa o na ethĩwa mathũkĩte ata.

 Nĩ nthĩnĩ wa kasũmba kala noovetwe, nĩnambĩĩie kũsoma Mbivilia nũndũ ndyaĩ na ũndũ ũngĩ wa kwĩka, na nakothaa kũtinda vo. Ĩtina mũsikalĩ ũmwe nĩwanengie kavuku keetawa Unaweza Kuishi Milele Katika Paradiso Duniani. a Nĩendeee kũsoma kavuku kau ka kwĩmanyĩsya Mbivilia, nĩnalilikanile maũndũ amwe namanyĩĩtwʼe nĩ mũnini ĩvinda yĩla nasomaa Mbivilia na Ngũsĩ sya Yeova. Nĩvo ĩndĩ nasũanĩie ũndũ mwĩkalĩle wakwa wathũkĩte kwa myaka mingĩ nũndũ wa ũngʼendu wakwa. O na nĩnasũanĩie ĩũlũ wa andũ ma mũsyĩ witũ. Nũndũ eĩtu elĩ nĩsyanĩwʼe namo nĩmatwʼĩkĩte Ngũsĩ sya Yeova, nasũanĩie, ‘Mo makekala thayũ tene na tene.’ Na ĩndĩ neekũlya-ĩ, ‘Nĩkĩ o nakwa ndeka oou?’ Vau nĩ vo natwʼĩĩe vyũ kũalyũla mwĩkalĩle wakwa.

 Ĩndĩ nĩneesĩ kana yaĩ no nginya nĩtetheewʼe nĩ kana nĩalyũke vyũ. Kwoou ũndũ wa mbee, namũvoyie Yeova Ngai namwĩsũva andetheesye. Na ĩndĩ naandĩkĩa ovisi wa ũvonge wa Ngũsĩ sya Yeova wa Amelika valũa nĩkũlĩtye nĩmanyĩwʼe Mbivilia. Ovisi wa ũvonge nĩwavangie andũ ma kĩkundi kĩla kyaĩ vakuvĩ na vala noovetwe mamanthe. Nũndũ ĩvindanĩ yĩu vai mũndũ ũte wa mũsyĩ witũ weetĩkĩlĩtwʼe kũka kũmbona, mũndũũme ũmwe waĩ Ngũsĩ kĩkundinĩ kĩu nĩwambĩĩe kũnandĩkĩa valũa na kũndũmĩa mavuku maeleetye Mbivilia, ala mandetheeisye neethĩwa na wendi mwingangĩ wa kũalyũla mwĩkalĩle wakwa.

 Neekie maendeeo manene nginya natwʼa kwĩvathana vyũ na kĩkundi kya imaamai kĩla neethĩĩtwe nakyo kwa myaka mingĩ. Nũndũ twoovetwe o kyovo kĩmwe nĩ na mũnene wa kĩkundi kĩu, ĩvinda yĩmwe twaumaalwʼa tũthyũmũe nĩnamũtavisye kana nĩenda kũtwʼĩka Ngũsĩ ya Yeova. Nasengʼie mũno yĩla wambĩie atĩĩ: “Ethĩwa nũtwʼĩte vyũ kwĩka ũu, nĩ sawa. Nyie ndyĩsa kũvĩngana na Ngai. Ĩndĩ ethĩwa kĩla ũkwenda no kuma kĩkundinĩ kitũ, no wĩsĩ ũndũ veũthi.”

 Ĩtina wa myaka ĩlĩ, andũ ala mathũkũmaa yela nĩmambĩĩe kwona ũndũ mwĩkalĩle wakwa wavĩndũkĩte. Nũndũ wa ũu, mambĩĩa kũngua nesanga. Kwa ngelekanyʼo, asikalĩ nĩmakolile kũmbĩkĩa mbĩngũ yĩla mandwaĩte ngathambe. O na mũsikalĩ ũmwe nĩwookie vala nĩĩ na ambĩkĩa vinya nĩendeee kwĩka moalyũku. Ũndũ wa kũsengyʼa, mwakanĩ wa mũthya wa kyovo kyakwa, aũngamĩi ma yela ĩsu nĩmatwie kũnthamĩĩsya kambinĩ ĩtaĩ na ũseesei mwingĩ ĩndĩ yaĩ o vakuvĩ na yela ĩsu. Mwaka wa 2004, kyovo kyakwa kya myaka ĩkũmi nĩkyathelile na natũngwa kwitũ Mexico nĩkuĩtwe nĩ mbasi ya yela.

 Ĩtina wa kũsyoka Mexico, nĩnamanthie Nyũmba ya Ũsumbĩ ya Ngũsĩ sya Yeova. Naendie ũmbanonĩ wakwa wa mbee nĩkĩĩte yunivomu ya yela nũndũ nosyo ngũa ila syĩ kavaa naĩ nasyo. O na kũtwʼĩka ndyaĩ mũtheu mũno, andũ kĩkundinĩ kĩu nĩmanthokisye nesa. Yĩla noonie ũndũ manguie nesa, nĩnamanyie nesa kana asu nĩmo Aklĩsto ma wʼo. (Yoana 13:35) Ĩtina wa ũmbano ũsu, atumĩa nĩmeekie mĩvango nambĩĩe kũmanyĩwʼa Mbivilia. Ĩtina wa mwaka ũmwe nĩnatwʼĩkie ũmwe wa Ngũsĩ sya Yeova yĩla navatisiwe kwĩ Matukũ 3, Mwei wa 9, 2005.

 Mwei wa 1, 2007, nĩnatwʼĩkie mũthũkũmi wa ĩvinda yonthe, na nambĩĩa kũtũmĩa masaa 70 kĩla mwei kũmanyĩsya andũ angĩ Mbivilia. Mwakanĩ wa 2011, nĩnaminie Sukulu ya Mbivilia ya Ana-a-asa Matatwaanĩte (yu yĩtawa Sukulu ya Atavanyʼa ma Ũsumbĩ). Sukulu ĩsu nĩyandetheeisye mũno nĩanĩsye ianda ila nĩnengetwe kĩkundinĩ.

 Mwakanĩ wa 2013, nĩnatwaanie nĩ na kĩveti kyakwa, Pilar. Aeleasya na ũtanu kana ndonaa ta inyie neekaa maũndũ ala nĩmũtavasya. Ndyaaĩsa kũsyokea maũndũ ala neekaa ĩvinda ĩvĩtu o na vanini. Nyie na kĩveti kyakwa tũĩkĩĩaa kana moalyũku ala neekie monanasya nesa vyũ vinya wa Mbivilia wa kũalyũla andũ.—Alomi 12:2.

 Nĩwʼaa ndeto ila Yesũ wawetie ĩandĩkonĩ ya Luka 19:10 ingonetye. Aisye atĩĩ: “[Nookie] kũmantha na kũtangĩĩa kĩla kyaaĩte.” Yu ndyĩwʼaa ta naaie. O na ndiendaa nĩũmĩĩtye andũ angĩ tondũ neekaa mbeenĩ. Mbivilia nĩndethetye mũno nũndũ yu nĩkalaa thayũ wĩ kĩtumi, nĩkalanasya nesa na andũ angĩ, na ũndũ ũla wa vata mũno vyũ nĩ kana nĩ na ngwatanĩo nzeo na Mũmbi wakwa, Yeova.