Naeewe ndĩninĩ ya Katholeki, taoninĩ ya Rochester, kĩsionĩ kya  New York. Asyai makwa mataanĩisye nĩ na myaka nyanya. Kwoou nekalaa na inyia-akwa katĩkatĩ wa kyumwa, na wikendi ndithi kwa ĩthe-akwa. Mami ekalaa kĩsionĩ kya andũ mate na ũkwati mwingĩ, nake Tata ekalaa kĩsionĩ kya andũ athwii. Kwona ũndũ Mami wathĩnaa aitũea twĩ thanthatũ kwatumie nenda kwĩsa kũthua nĩ kana nĩtethye andũ maitũ.

 Tata endaa nĩtwʼĩka mũndũ ũweteka, na kwoou nĩwavangĩthisye nĩthi sukulu yĩ nguma ya maũndũ ma moteli. Nĩnamyendie na nalika nũndũ nasũanĩaa nĩ Ngai ũsũngĩie mboya syakwa sya kũkwata ũthwii na ũtanu. Naminie myaka ĩtano ngĩsomea mĩao ya viasala, ũndũ ndonya kũũngamĩaa moteli, na ũndũ ndonya kũtwʼĩka mũkũni mũseo wa viasala (corporate finance). Na myakanĩ o ĩsu, nathũkũmaa ũtelinĩ wa kũtha kalata taoninĩ ya Las Vegas, Nevada.

 Nĩ na myaka 22 nĩnatwʼĩkie mũnini wa mũnene wa ũteli ũmwe wa kũtha kalata. Andũ mandalaa katĩ wa andũ ala athwii na maendeee nesa, na kaingĩ naĩsaa nesa na nganywʼa mbinyu na ũkĩ ũla wa thooa mũnene vyũ. Akũni ala angĩ ma viasala mambĩaa, “Ndũkaumye metho maku mbesanĩ; isu nĩsyo isumbĩkĩte nthĩ.” Kwosana namo, mbesa nosyo syaĩ itonya kũtuma mũndũ ekala e na ũtanu wa wʼo.

 Ũndũ ũmwe natethasya wĩanĩ wakwa nĩ kũthĩnĩkĩa mavata ma athwii ala mooka Las Vegas kũtha kalata. Ĩndĩ o na kau maĩ athwii, noonaa mate atanu. O nakwa navikie vandũ naeka kwĩthĩwa na ũtanu. O ũndũ naendeeie kũthua, nowʼo nakwatiwe nĩ mawĩmakĩo maingĩ, na nowʼo naasya too ũtukũ. Mũthya nambĩĩie kwĩkũlya ve vata mwaũ wa kwĩkala thayũ. Ĩvinda yĩu neyĩtũkĩte namũkũlilye Ngai, “Nĩ va ndonya kũkwata ũtanu wa wʼo?”

 Ĩvindanĩ yĩu, eĩtu elĩ tũsyaanĩwʼe nĩmathamĩĩie Las Vegas. Maithamĩĩa kũu maĩ manatwʼĩka Ngũsĩ sya Yeova. Nĩmanengae mavuku moo na ngalea, ĩndĩ nĩneetĩkĩlile kũsoma Mbivilia ĩ yakwa twĩ vamwe. Mbivilianĩ ĩsu, ndeto ila Yesũ ũneenete syaandĩkĩtwe na langi mũtune. Na nũndũ nĩmeesĩ nĩneetĩkĩlaa ndeto syonthe sya Yesũ, nĩsyo matwie kũneeneaa. O na ĩngĩ, nĩnasomie Mbivilia ĩsu nĩ nyioka.

 Ve maũndũ maingĩ nasomie manzengyʼa. Kwa ngelekanyʼo, Yesũ aisye: “Na mũkĩvoya mũikatũngĩlĩĩle ndeto o ila ila o tondũ andũ ma mbaĩ ingĩ mekaa, nĩkwĩthĩwa masũanĩaa kana makeewʼĩka nũndũ wa kũneena ndeto mbingĩ.” (Mathayo 6:7) Kĩu nĩkyanzengʼisye nũndũ ve mũthembi wanengete visa wa Yesũ, na akandavya kana navoya mboya ya Asa Waitũ mavinda ĩkũmi vamwe na Ngethi Malia mavinda ĩkũmi nĩsyaĩĩsye visa ũsu, Ngai akanengae mbesa syonthe ila ngwenda. Ĩndĩ mũsoa ũsu watumie nĩsũanĩa, ‘Kũvoya mboya isu tyo ũndũ ũmwe na kũtũngĩlĩĩla ndeto o ila ila?’ O na ĩngĩ, nĩnoonie ndeto ii sya Yesũ: “Mũikete mũndũ o na wĩva asa wenyu ĩũlũ wa nthĩ, nũndũ Asa wenyu nĩ ũmwe, Ũla wĩ ĩtunĩ.” (Mathayo 23:9) Kwoou neekũlilye, ‘Nĩkĩ nyie na andũ ala angĩ ma Katholeki twĩtaa athembi maitũ “Father”?’

 Ĩndĩ yĩla nasomie ĩvuku ya Yakovo Mbivilianĩ, nowʼo nambĩĩe kũsũanĩa kelĩ ĩũlũ wa maũndũ ala nasembanasya namo. Yakovo aandĩkie ũũ kĩlungunĩ kya 4: “Mũyĩsĩ kana ũnyanya na nthĩ nĩ ũmaitha na Ngai? Kwoou mũndũ o na wĩva ũla wendaa kũtwʼĩka mũnyanyae wa nthĩ, etwʼĩkĩthasya mũmaitha wa Ngai.” (Yakovo 4:4) Mũsoa wa 17 nĩwʼo wangiitie mũno. Waĩtye: “Ethĩwa mũndũ nĩwĩsĩ kwĩka ũla waĩle na ndawĩkaa, ethĩawa ayĩka naĩ.” Ĩtina wa kũũsoma, nakũnĩie eĩtu-a-mwaitũ simũ na namatavya kana nĩngũkola kũthũkũma wĩa ũla nathũkũmaa. Na kĩtumi nũndũ andũ ala nakomanaa namo maĩ na mwĩkalĩle noonaa yu ũte mũseo, ta kũtha kalata na ĩtomo.

 Nĩnendaa mũno kũseũvya ngwatanĩo yakwa na Ngai, na vamwe na asyai makwa na ala nĩsyaanĩwʼe namo. Nũndũ wa ũu, nĩnavangie kũolanga maũndũ makwa nĩ kana nĩkwate ĩvinda ya kwĩanĩsya kĩu. Ĩndĩ kĩu kĩyaĩ laisi. Kwa ngelekanyʼo, ĩvindanĩ yĩu nĩnathiwe kwambatwʼa kĩlasi wĩanĩ wakwa wa kũthũkũmana na moteli ma kũtha kalata, na wĩa ũsu nathawa waĩvaa kũndũ kwĩlĩ kana kũtatũ kwa mũsaala ũla nakwataa. Ĩndĩ kũvoya ĩũlũ wa ũndũ ũsu kwatumie nĩmanya kana ndikwenda kũendeea na maũndũ ala neekaa. Na kwoou nĩnakolile wĩa wakwa, na nathamĩĩa kwa inyia-akwa, kasũmbanĩ kala watũmĩaa ta garage. Kawĩla kala nambĩĩe kũthũkũma kaĩ ka kũseũvya mathangũ ala moteli maandĩkaa malĩu ala makasitoma matonya kũthooa (laminating menus).

 Ĩndĩ o na kau Mbivilia nĩyatumĩte nambĩĩa kwĩka motwi maseango thayũnĩ, ndyaĩ naaĩsa kwĩtĩkĩla kũkinya maũmbanonĩ ma Ngũsĩ sya Yeova. Mũthenya ũmwe eĩtu ala tũsyaanĩwʼe mangũlilye nĩmeneaa Ngũsĩ kĩ. Nakwa nameie: “Kĩtumi nũndũ Ngai wenyu ekaa kũaanyʼa mĩsyĩ. Kamwanya kala ngwataa ka kwĩthĩwa na andũ ma mũsyĩ nĩ yĩla kwĩ na Kĩlisimasi na mboka ya mĩthenya ya kũsyawa, na inywʼĩ mũitanĩaa maũndũ asu.” Ũmwe woo nĩwambĩĩie kũĩa na angũlya: “Wĩthĩawa va matukũ ala angĩ? Mavinda onthe twĩthĩawa tũkweteele ũtũthokee. Ĩndĩ wĩsaa kwenda kũka o yĩla sikũkũ isu syavika, na o na matukũnĩ asu wendaa kũka no ũndũ wĩsũanĩa nĩ lasima.” Ndeto isu neewie syakiita vandũ na nambĩĩa kũĩa o take.

 Yĩla nesie kũmanya ũndũ Ngũsĩ sya Yeova syendete mĩsyĩ yasyo mũno wĩana, na namanya kana ninyie naisũanĩaa naĩ, nĩnaendie ũmbanonĩ ũmwe Nyũmbanĩ ya Ũsumbĩ. Vau nĩ vo nakomanĩie na mwalimũ mũseo mũno wa Mbivilia weetawa Kevin, na ambĩĩa kũmanyĩsya Mbivilia.

 Kevin na mũka matwʼĩte kwĩkala mateũsembanyʼa na malĩ nĩ kana makwate ĩvinda yingangĩ ya kũmanyĩsya andũ Mbivilia. Na mbesa ila makwataa nĩsyamatetheeisye kũthi Africa na Central America nĩ kana matetheesye kwaka movisi ma Ngũsĩ. Maĩ atanu na mendene mũno. Namasisya neetavasya, ‘Ũũ nĩwʼo ngwenda kwĩkala.’

 Mũthenya ũmwe Kevin nĩwambonisye vitio yonanĩtye ũtanu ũla amisonalĩ makwataa. Vitio ĩsu yatumie nĩtwʼa kwĩsa kũlika ũthũkũminĩ ũsu. Ĩtina wa kwĩmanyĩsya Mbivilia na kĩthito kwa ĩvinda ya myei thanthatũ, nĩnavatisiwe mwaka wa 1995 natwʼĩka ũmwe wa Ngũsĩ sya Yeova. Kuma ĩvinda yĩu, vandũ va kũmũvoyaa Ngai anenge ũthwii, nambĩĩie kũmũvoyaa atĩĩ: “Ndũkanenge ũkya kana ũthwii.”—Nthimo 30:8.

 Nĩnakwatie ũthwii wa wʼo, ĩndĩ ũthwii ũla nakwatie ti wa mbesa, nĩ wa kĩ-veva. Nesie kũtwaa mwĩĩtu-a-asa mũseo mũno twakomanĩie Honduras wĩtawa Nuria. Nĩtwatanĩie kwĩthĩwa twĩ amisonalĩ nthĩ ya Panama, na yu twĩ ũthũkũminĩ o ũsu nthĩ ya Mexico. Ndeto ii sya Mbivilia nĩ sya wʼo ki: “Ũathimo wa Yeova, nawʼo nũthuasya; na ndawongelanasya na woo”!—Nthimo 10:22.