Nasyaĩwe taoninĩ ya Calgary, ĩla yĩ Alberta, Canada. Yĩla naĩ kaũkenge, asyai makwa nĩmathaisye mũtwaano woo, na nũndũ wa ũũ, nĩ na inyia-akwa twathamĩĩa kwa asyai make. Ũmau na ũsũa nĩmatwendete mũno, na nĩ mũnini naĩ mũtanu vyũ. No nĩlilikanaa nesa vyũ ũndũ myaka ĩsu naĩ na mũuo wingĩvĩte.

 Ĩndĩ maũndũ makwa maalyũkile vyũ nĩ na myaka mũonza, yĩla Mami wasyokeanĩie na Tata, na twathamĩĩa St. Louis, Missouri, Amelika. Vau nĩ vo namanyĩie ũndũ Tata wathũkĩte. Kwa ngelekanyʼo, mũthenya wa mbee kũthi sukulu nzaũ, nĩnathĩniwʼe mũno nĩ syana ila ingĩ na nyie ndyaaĩyũkitĩa. Yĩla Tata wamanyie kĩu, athatie na angũna mũno o na kwĩ ũndũ syana isu syangũnĩte nĩ sukulu! Kĩu kyatumie nĩsũanĩa nũseo kwĩyũkitĩa, na kwoou nambĩĩa kũkita na syana ila ingĩ nĩ o na myaka mũonza.

 Tata aĩ ngoo nthũku mũno na kĩu nĩkyathatasya Mami. Mavinda maingĩ matindĩaa kũumangana. Nambĩĩe kũnywʼa ũkĩ na kũtũmĩa ndawa sya kũmila nĩ na myaka 11. Nĩnaendeeie kwĩthĩwa nĩ mũngʼendu mũnango na natindĩaa kũkita na andũ angĩ nzĩanĩ. Ndyĩsa kũtwʼĩka nĩnamina sekondalĩ, naĩ mũngʼendu vyũ.

 Yĩla navikisye myaka 18, nĩneeyĩandĩkĩthisye kĩkosinĩ kya ita sya U.S. Marine Corps. Ũngʼendu wakwa wavulanwʼa na masoesi ala nakwatie nĩ kũu watumie ndwʼĩka mũndũ mũthũku mũno wĩsĩ kũaana. Ĩtina wa myaka ĩtano, nĩnaumie itanĩ nĩ kana ngasomee maũndũ ma kĩlĩko nũndũ nendaa kũandĩkwa nĩ mũvĩa ũla ũkunĩkĩlaa syĩko sya ũngʼendilĩ (Federal Bureau of Investigation). Nĩnambĩĩie masomo yunivasiti ĩmwe yĩ Amelika, na naendeea namo ĩtina wa kũsyoka Canada.

 Nĩ yunivasiti nĩnambĩĩie kwĩwʼa nditũlwa ngoo vyũ nĩ andũ na nthĩ. Noonaa andũ meyendete, maũndũ ĩũlũ wa nthĩ mailye vathei, na noonaa mathĩna ma andũ mailye ta matesa kũthela. Nambĩĩe kwona nesa kana andũ mayĩsa kũtuma nthĩ yĩthĩwa vandũ vaseo va kwĩkala.

 Nũndũ ndyoonaa kĩeleelo kya thayũ, nĩneelikilye ũthenginĩ vyũ, na nambĩĩa kũtũmĩa mũno ndawa sya kũmila, kũsembanyʼa na mbesa, na kũlaalaa. Kĩla nasũanĩaa no vala ngũthi kwĩtanĩthya kana aka ala ngũkoma namo. Na nũndũ wa kwĩthĩwa na ũtũĩka wa kaũ ũla namanyĩĩtwʼe itanĩ, natindĩaa kũkita na andũ. Noonaa ndonya kũtwʼa nĩ kyaũ kyaĩle na nĩ kyaũ kĩtaĩle, na kwoou nĩnalikĩlĩlaa kũla noona andũ mayĩkwa maũndũ mataĩle. Ĩndĩ ũwʼo nĩ kana, naendeee kũtwʼĩka ngombo ya ũngʼendu vyũ.

 Nĩnĩlilikanaa mũthenya ũmwe nĩ na mũnyanyawa twaĩ kasũmbanĩ ka nthĩ ka nyũmba yakwa tũmilĩtwe vyũ nĩ ndawa sya kũmila, na tũyĩyumbanĩsya kũtũma na kĩmbithĩ ndawa ya kũmila yĩtawa marijuana kũndũ kũngĩ ĩkatewe. Nĩvo wangũlilye kana nĩnĩĩkĩĩaa Ngai. Namũsũngĩie ũũ, “Ethĩwa Ngai nĩwe ũetete mathĩna ala me kũũ nthĩ, ndikwenda kũmũmanya!” Mũthenya ũla waatĩĩe, nĩnaendie wĩanĩ mweũ mũthenya wa mbee, na ũmwe wa athũkũmi ma vau aĩ ũmwe wa Ngũsĩ sya Yeova. Angũlilye ũũ, “We nĩwonaa Ngai ta we ũetete mathĩna ala me kũũ nthĩ?” Nĩnasengʼie mũno nũndũ ĩyoo yake naĩ nĩwetete kĩndũ ta kĩu, na kĩu kyatuma nenda kũmanya mũnango. Myei thanthatũ ĩla yaatĩĩe, nĩtwaneeneie maũndũ maingĩ mũno, na nĩwambonasya mosũngĩo ma Mbivilia ma makũlyo amwe me vinya vyũ naĩ namo ĩũlũ wa thayũ.

 Mwĩĩtu ũla twaĩ ndũũ na twekalanasya ĩmwe ndendaa ndimũtavya maũndũ ala naendeee kwĩmanyĩsya. Wakyumwa ũmwe nĩnamũtavisye kana nĩnathoketye Ngũsĩ syĩse kũka mũsyĩ kwitũ twĩmanyĩsye vamwe Mbivilia. Mũthenya ũla waatĩĩe, nauma wĩanĩ neethĩie akuie syĩndũ syonthe nyũmba na angola. Noona ũu, naumaalile nza na naĩa mũno. O na nĩnamũvoyie Ngai na namwĩsũva andetheesye. Yĩu nĩyo yaĩ ĩvinda yakwa ya mbee kũtũmĩa mboyanĩ ĩsyĩtwa ya Ngai mwene, Yeova.—Savuli 83:18.

 Ĩtina wa mĩthenya ĩlĩ, nĩneemanyĩisye Mbivilia ya mbee na Ngũsĩ. Maĩ mũndũ na mũka, na mathi naendeeie kũsoma ĩvuku yĩla mandiĩe ya kwĩmanyĩsya yeetawa, Unaweza Kuishi Milele Katika Paradiso Duniani, nginya nayĩmina ũtukũ ũsu. a Kĩla neemanyĩisye ĩũlũ wa Yeova Ngai na Mwana wake, Yesũ Klĩsto, nĩkyangiitie ngoo. Nĩnamanyie kana Yeova e ĩnee na kana nũũmĩaa oona tũithĩna. (Isaia 63:9) O na nĩnakiitiwe mũno nĩ kũmanya kana Ngai nũmbendete, na kũmanya nthembo ĩla Mwanae waumisye kwondũ wakwa. (1 Yoana 4:10) Neetavisye kana Yeova eethĩĩtwe ambũmĩĩsye “nũndũ ndendaa o na ũmwe . . . anangwe, ĩndĩ endaa onthe mavikĩe kwĩlila.” (2 Vetelo 3:9) Nĩnamanyie kana Yeova eendaa nĩtwʼĩke mũnyanyae.—Yoana 6:44.

 Nĩnambĩĩie kũendaa maũmbanonĩ o kyumwa kĩu. Nĩnaĩthĩtye nzwʼĩĩ, nĩneekĩaa mĩnaĩ, na nailye kũtelemya andũ, ĩndĩ Ngũsĩ syanguie nesa ta naĩ mũndũ wa mũsyĩ itoonete mĩtũkĩnĩ. Syeekie ta Aklĩsto ma wʼo. Nambĩĩie kwĩwʼa ta naĩ mũsyĩ vamwe na ũmau wakwa na ũsũa, ĩndĩ weethĩa nĩona vaa ve vaseango.

 Maũndũ ala neemanyĩasya Mbivilianĩ nĩmambĩĩie kũalyũla mwĩkalĩle wakwa. Nĩneenziwe, naekana na ũlaalai, na naeka kũtũmĩa ndawa sya kũmila na ũkĩ. (1 Akolintho 6:9, 10; 11:14) Yu nendaa kũmwendeesya Yeova. Na kwoou kĩla ĩvinda neemanyĩsya kana ve ũndũ mũna neekaa ũũmenete, ndyeeteteaa. Vandũ va ũũ, neewʼaa ta natonywa ngoonĩ. Neetavasya, ‘Ndyaĩle kũendeea kwĩka ũndũ ũũ.’ Na vate kweteela, nĩnoosaa ĩtambya ya kũalyũla mosũanĩo na meko makwa. Nũndũ wa ũu, nĩnambĩĩie kwona mosyao ma kwĩka maũndũ ũndũ Yeova wendaa. Twĩ Matukũ 29, Mwei wa 7, 1989, myei thanthatũ kuma nambĩĩa kwĩmanyĩsya Mbivilia, nĩnavatisiwe natwʼĩka ũmwe wa Ngũsĩ sya Yeova.

 Mbivilia nĩndetheetye kũalyũla mwĩkalĩle wakwa vyũ. Mbeenĩ, nathokowa nĩ mũndũ mũthũku, neekaa kũkita nake. Ĩndĩ yu nĩkĩaa kĩthito vyũ nĩthĩwe “na mũuo na andũ onthe.” (Alomi 12:18) Ndyĩsa kwasya nĩkĩte ũu na vinya wakwa mwene, ĩndĩ nĩmũtũngĩaa Yeova mũvea nũndũ wa vinya wa Ndeto yake na veva wake mũtheu.—Akalatia 5:22, 23; Aevelania 4:12.

 Vandũ va kwĩthĩwa nĩ ngombo ya ndawa sya kũmila, ũngʼendu, na ũlaalai, yu ndataa vyũ nĩmwendeesye Yeova Ngai na ndimũnenga kĩla kĩseo vyũ. Ũndũ ũmwe nĩkaa nĩ kũtetheesya angĩ o namo mamũmanye. Myaka mĩvũthũ ĩtina wa kũvatiswa, nĩnathamĩĩie nthĩ ĩngĩ nĩ kana nĩtetheesye kũtavanyʼa isionĩ ila syĩ na vata mũnene wa atavanyʼa. Kwa ĩvinda ya myaka mingĩ nĩndanĩĩte kũmanyĩsya andũ aingĩ Mbivilia na kwona ũndũ ĩalyũlĩte mathayũ moo. O na nĩndanaa mũno nũndũ inyia-akwa nĩwatwʼĩkie ũmwe wa Ngũsĩ sya Yeova, na ũndũ ũmwe wamũtetheeisye kwĩka ũu nĩ kwona moalyũku ala neekĩte mawoninĩ na mwĩkalĩlenĩ wakwa.

 Twĩ mwaka wa 1999, nĩnaminie sukulu ĩla oyu yĩtawa Sukulu ya Atavanyʼa ma Ũsumbĩ, nĩ nthĩ ya El Salvador. Sukulu ĩsu nĩyamanyĩisye na yandetheesya kwĩthĩwa mũsitalĩnĩ wa mbee wĩanĩ wa kũtavanyʼa, kũmanyĩsya, na kũĩthya malondu ma Yeova kĩkundinĩ. Mwakanĩ o ũsu, nĩnatwaie mũka wakwa mwendwa, Eugenia. Ũmũnthĩ, ithyelĩ twĩ atavanyʼa ma ĩvinda yonthe nthĩ ya Guatemala.

 Yu vandũ va kwĩthĩwa nĩkwʼĩte ngoo, nĩthĩawa na ũtanu mwingĩ mũno. Kũatĩĩa momanyĩsyo ma Mbivilia nĩkũnthaĩtye ũkombonĩ wa ũlaalai na ũngʼendu, na kũkatuma nĩtanĩa thayũ usũĩte wendo wa wʼo na mũuo.