Ve ĩvinda mwana-a-asa wĩtawa Joshua, ũla wĩkalaa Amelika, weeyumisye atavanyʼa Guyana kwa kavinda. Aĩtye atĩĩ: “Ndyĩsĩ ũndũ ndonya kũelesya ũtanu ũla nakwatie yĩla neeyumisye kũtavanyʼa kĩsionĩ kĩ na vata mũnene wa atavanyʼa!” Nthĩ ĩsu yĩ Amelika ya Ĩtheo a yĩthĩawa na andũ aingĩ me na wendi mũnene wa kwĩmanyĩsya ĩũlũ wa Yeova, na nũndũ wa ũu, ana-a-asa na eĩtu-a-asa ala matavanĩtye kũu makwatĩte ũtanu mwingĩ mũno o ta Joshua. Nĩ maũndũ meva tũtonya kwĩmanyĩsya kuma kũla kwĩ ana-a-asa na eĩtu-a-asa asu meyumasya kũtavanyʼa isionĩ ĩla syĩ na vata mũnene? Maũndũ asu matonya ũkũtethya ata wĩyũmbanyʼe kũtavanyʼa isionĩ syĩ nthĩ ĩngĩ, ethĩwa ũsu nĩwʼo mũvango waku?

 Mwana-a-asa wĩtawa Linel atambĩte kũthi kũtavanyʼa Guyana nĩwatavanĩtye kĩsionĩ kĩ kwoo Amelika kĩtatavanawʼa mũno. Aĩtye: “Nĩtwatũmiwe twĩ atavanyʼa 20 tũkatavanyʼe kĩsionĩ kĩmwe kĩ vaasa na taoni, ngalĩko ya West Virginia. Syumwanĩ isu ilĩ natanĩie ũtavanyʼa mũno na natanĩa mũno ũnyanya vamwe na atavanyʼa ala angĩ twaĩ namo. Maũndũ asu mavĩndũie thayũ wakwa vyũ! Kuma ĩvinda yĩu natwie kwĩkaa kyonthe kĩla ndonya nĩmũthũkũme Yeova.”

 Mwana-a-asa wĩtawa Garth na mũka, Erica, nĩmambĩĩie kũvindĩĩsya ĩũlũ wa kũtavanyʼa nthĩ ila syĩ na vata mũnene wa atavanyʼa, na manyuva kũtavanyʼa nthĩ ya Guyana. Nĩ kyaũ kyatumie manyuva Guyana? Erica aĩtye: “Nĩ na mũemewa nĩtweesĩ mwana-a-asa ũmwe na mũka ala maĩ manathamĩĩie kũu. Kĩthito kyoo kingĩ na kwenda wĩa ũla maendeee kũtethya nĩsyatũthangaaisye o naitũ tũthi kwʼo.” Erica na Garth nĩmatanĩie mũno kũtavanyʼa Guyana myaka ĩtatũ. Maiweta ĩũlũ wa ĩvinda yĩu maasya kana kĩu kyaĩ “kĩanda kya mwanya mũno.” Garth aĩtye: “Nĩtwasamie tweewʼa ũndũ kũtavanyʼa isio syĩ kũasa na kũla twĩkalaa kwĩanyʼa mũyo.” Mwana-a-asa Garth na mũka nĩmesie kwĩtwa Sukulu ya Ngileati, na yu me nthĩ ya Bolivia.

 Myolooto ya Mbivilia ĩtwĩkĩaa vinya tũikeyũmbĩĩe maũndũ maingĩ mate ma lasima thayũnĩ. (Aevelania 13:5) O na ĩngĩ nĩtwĩkĩaa vinya tũsũanĩe nesa maũndũ onthe ala makonetye motwi manene ala tũkwenda kwĩka thayũnĩ witũ tũtanamba kũmeka. (Luka 14:26-33) Motwi asu nĩ ta kũtwʼa kũthi nthĩ ĩngĩ. Garth aĩtye: “Tũtaendete Guyana, nĩ na Erica twaĩ no nginya tũolange maũndũ thayũnĩ witũ. Maũndũ asu maĩ ta kũthoosya viasala witũ, nyũmba yitũ, na syĩndũ syonthe ila twaiĩte nyũmba tũte kũitũmĩa. Kwĩka maũndũ asu onthe nĩkwakuie myaka yĩana ũna. Ĩndĩ myakanĩ ĩsu nĩtwaendeeie kũvindĩĩsya ĩũlũ wa wendi witũ wa kũtavanyʼa Guyana, o na nĩtwaendaa kũtembea nthĩ ĩsu kĩla mwaka.”

 Ũndũ ũngĩ mũndũ waĩle kũsũanĩa nĩ ũndũ ũkakwataa mbesa sya kwĩyĩkalya e nthĩ ya ũeninĩ. Ana-a-asa na eĩtu-a-asa amwe ala mathamĩĩe nthĩ ingĩ matavanyʼe kwʼo methĩawa matonya kũthũkũma kũu ethĩwa mĩao ya nthĩ isu nĩkũmetĩkĩlya. Angĩ maendeeaa o kũthũkũma mawĩa ala manathũkũmaa me kwoo kwĩsĩla kombiũta ikwatanĩtwʼe na Indaneti ũkethĩa mũndũ no athũkũmĩe kombiũtanĩ yĩ mũsyĩ e o nthĩ ĩngĩ. Angĩ namo monaa nĩ kavaa makenũkaa ĩtina wa ĩvinda yĩana ũna nĩ kana makathũkũme na maisyoka. Mwana-a-asa wĩtawa Paul na mũka Sinead masyokaa kwoo Ireland yĩmwe kwa mwaka makathũkũme na maisyoka. Kwĩka ũu kwamatetheeisye kũtavanyʼa Guyana kwa ĩvinda ya myaka 18, ĩla nĩ vamwe na myaka mũonza ĩtina wa kelĩtu koo kũsyawa.

 Ĩandĩko ya Savuli 37:5 yaĩtye: “Mwiĩe Yeova nzĩa yaku; mũĩkĩĩe we, nake akeeka.” Mwana-a-asa ũngĩ wĩtawa Christopher na mũka, Lorissa, kuma nthĩ ya Amelika maĩ na kĩthito kya kũvoya kĩla ĩvinda ĩũlũ wa mũvango woo wa kũtavanyʼa nthĩ ya ũeninĩ. O na ĩngĩ, ũthaithinĩ woo wa mũsyĩ nĩmasũanĩaa me vamwe maũndũ ala maaĩle kwĩka nĩ kana matonye kwĩanĩsya mĩvango yoo. Maũndũ amwe masũanĩaa nĩ moseo na mothũku ma kũthamĩĩa nthĩ ĩngĩ. Nũndũ mendaa kũthamĩĩa nthĩ matelasimĩka kwĩmanyĩsya kĩthyomo kĩngĩ, matwie kũthamĩĩa Guyana nũndũ Kĩsũngũ nĩkyo kĩneenawa mũno kũu.

 Ĩtina wa vau, nĩmeekie kwosana na mwolooto ũla wĩ ĩandĩkonĩ ya Nthimo 15:22, yĩla yaĩtye: “Vala vate ũtao, maũndũ ala masũanĩĩtwe kwĩkwa nĩmanangĩkaa; ĩndĩ vala ve wingĩ wa atai nĩmalũlũmĩlawʼa.” Nũndũ wa ũu, nĩmaandĩkĩie ovisi wa ũvonge ũla ũũngamĩe wĩa wa kũtavanyʼa Guyana, b maeleetye kana no mende kwĩyumya matavanyʼe kũu. Ĩvindanĩ o yĩu, nĩmakũlĩĩilye mũno ĩũlũ wa maũndũ ma ũiiti, nzeve ya kũu, na syĩthĩo sya Guyana. Ovisi wa ũvonge nĩwasũngĩie valũa woo na wamakwatanyʼa na atumĩa ma kĩkundi kĩla mesaa kũthamĩĩa.

 Ũla mwana-a-asa ũwetiwe mwambĩĩonĩ wĩtawa Linel yu nĩ mũsyaĩĩsya wa kũthyũlũlũka nthĩ ya Guyana. O nake atambĩte kũthi kũu nĩwasũanĩie mwolooto ũla wĩ nthĩnĩ wa Nthimo 15:22. Aĩtye: “Eka o kũmbanyʼa mbesa kwondũ kũthama, nĩnaneenie na atavanyʼa angĩ ala meeyumĩtye makathi kũtavanyʼa nthĩ sya ũeninĩ. O na nĩnaneeneie ũndũ ũsu na andũ ma mũsyĩ, atumĩa ma kĩkundi kĩla naĩ, na mũsyaĩĩsya witũ wa mũthyũlũlũko. O na ĩngĩ nĩnasomie mavuku me kĩvathũkanyʼo ma ũseũvyo ala maeleetye ĩũlũ wa kũtavanyʼa kũla kwĩ na vata mũnene wa atavanyʼa.”

 Atavanyʼa aingĩ monaa ne ũndũ wa ũĩ kwamba kũthi kwona ũndũ maũndũ mailye nthĩ ĩla mekwenda kũthamĩĩa. Mwana-a-asa wĩtawa Joseph na mũka Christina maĩtye: “Twambie kũthi Guyana na twavekala myei ĩtatũ. Kwĩka ũu nĩkwatũtethisye kũmanya ũndũ kũu kwĩthĩawa kũilye na ũndũ kwĩkalangawa. Na ĩndĩ twenũka, twavanga maũndũ maitũ nesa na twathama.”

 Nĩ kana atavanyʼa ala meyumĩtye kũtavanyʼa isionĩ syĩ na vata mũnene matanĩe kũmũthũkũma Yeova me nthĩ sya ũeninĩ, wĩthĩaa no nginya methĩwe na ngoo ya kwĩyumya vyũ na mayĩthĩwa na wendi wa kũmanyĩa syĩthĩo sya kũla mathi. Kwa ngelekanyʼo, ala kwoo ne kũthithu na maithamĩĩa kũndũ kũvyũ methĩaa kũu kũvyũ kwĩ tũsamũ twingĩ tũtambũkaa kũũ nthĩ mataatwona kwoo. Joshua, ũla ũwetiwe mwambĩĩonĩ, aĩtye: “Nyie mwa ndyaamanyĩa kwona tũsamũ twingĩvĩte ũu. O na nĩona tũsamũ tũla twĩ Guyana ta twaĩ tũnene mũno kũvĩtũka! Ĩndĩ o ũndũ ĩvinda yavĩtĩte nowʼo naendeeie kũmanyĩa. O na nĩnamanyie mũndũ aĩle kwĩkalaa nyũmba yake yĩ ntheu ethĩwa ndekwenda tũsamũ tũu tũilika nyũmba. Kwa ngelekanyʼo, aĩle kũthambasya mĩio ĩla yĩ kĩko, kwĩkya takataka, na aithambasya nyũmba kĩla ĩvinda.

 O na ĩngĩ, nĩ kana mũndũ amanyĩe kwĩkala nthĩ ya ũeninĩ, no nginya amanyĩe malĩu ala maĩsawa kwʼo na aimanya ũndũ malĩu asu mauawa. Joshua aĩtye: “Nĩ na mwana-a-asa ũla nekalaa nake, twakũlilye ana-a-asa na eĩtu-a-asa ma kũu matũmanyĩsye kũua malĩu ma kũu kwoo. Twamanya kũua lĩu mũna, twathokasya anyanya kũma kĩkundinĩ kĩla twaĩ makoka tũkaĩsanĩa. O na tweethĩie ĩsu yaĩ nzĩa nzeo ya kũmanya ana-a-asa na eĩtu-a-asa asu na kũtuma ndũũ namo.”

 Nake Paul na mũka, Kathleen, maiweta ĩũlũ wa syĩthĩo sya nthĩ sya ũeninĩ maĩtye atĩĩ: “Twaĩ no nginya twĩmanyĩsye kwĩka maũndũ ala metĩkĩlĩkĩte nĩ andũ ma kũla twathamĩĩie. Na nũndũ twathamĩĩie kũndũ kũvyũ, yaĩ no nginya twĩmanyĩsye kwĩkĩa ngũa ila syĩkĩawa nĩ andũ ma kũu. Ũsu waĩ ũndũ mweũ vyũ kwitũ. Nũndũ wa ũu, nĩtwendaa kwĩthĩwa na wĩnyivyo na tũyĩka moalyũku, ĩndĩ twĩ metho tũikatũle myolooto ya Mbivilia. Anyanya maitũ kĩkundinĩ na andũ kĩsionĩ kĩla twatavanasya nĩmoonaa ũndũ tweekĩĩte kĩthito tũmanyĩe kwĩkala kũu, na kĩu nĩkyatumaa mendeewʼa nithyĩ.”

 Ũla mwana-a-asa wĩtawa Joseph na mũka Christina mawetete ũndũ wosanĩte na mawoni ma ana-a-asa na eĩtu-a-asa aingĩ. Maĩtye: “Moathimo nĩmo methĩawa me maingĩ kũvĩta mawetu ala mũndũ ũtonya kũkomana namo aitavanyʼa nthĩ ya ũeninĩ. Kwĩka maũndũ meũ na mate laisi kwitũ nĩkwatũtethisye tweemanyĩsya kwĩkaa maũndũ ala ma vata vyũ thayũnĩ. Maũndũ amwe twonaa ta mo ma vata twambĩĩie kũmona mate ma vata o na vanini. Maũndũ ala tweeyoneie ĩvindanĩ yĩu matumie tũtwʼa kwĩka kyonthe kĩla tũtonya tũmũthũkũme Yeova. Kuma ĩvinda yĩu twĩwʼaa twĩ atanu na twĩ eanĩe vyũ.”

 Nake Erica, ũla ũwetiwe mbeenĩ, aĩtye: “Kũthi kũtavanyʼa kũla kwĩ na vata mũnene wa atavanyʼa kwatũtetheeisye nĩ na mũemewa kũmanya nesa ũndũ tũtonya kũmũĩkĩĩa Yeova vyũ. Nĩtwonete aitũtetheesya kwa nzĩa tũtaĩ twaasũanĩa. Maũndũ asu twoonie mayĩkĩka thayũnĩ witũ, matumie mũtwaano witũ wĩthĩwa wĩ mũlũmu vyũ na matuma twendana mũno.”