ENDEEAI KŨSYAĨĨSYA!
Mwaka wa 2022 Wĩĩ wa Mathĩna Maingĩ—Mbivilia Yaĩtye Ata?
Mwakanĩ wa 2022, ngewa sya makaũ, mathĩna ma mbesa, na kwanangwa kwa nzeve na mawĩthyũlũlũko ninaneeneiwe mũno maũvoonĩ. No Mbivilia yĩ yoka yĩeleetye nesa vyũ kĩla maũndũ asu mekwonanyʼa.
Kĩla maũndũ ala maneekĩkie 2022 mekwonanyʼa
Maũndũ ala manaendeeie mwaka mũvĩtu nĩmanoonanisye nesa mũnango kana tũilye ĩvindanĩ yĩla Mbivilia yĩtĩte ‘mĩthenya ya mũminũkĩlyo.’ (2 Timotheo 3:1) Mĩthenya ĩsu yambĩĩe mwakanĩ wa 1914. Kwoona maũndũ ala maneekĩkie mosanĩte nesa na kĩla Mbivilia yathanie:
“Makaũ.”—Mathayo 24:6.
“Mwaka wa 2022 [Nĩwʼo] Mathĩna ma Kaũ Masyokie Europe.” a
Sisya kĩlungu kĩ na kyongo “Russia Nĩnavithũkĩie Ukraine.”
“Ũnyivu wa lĩu.”—Mathayo 24:7.
“Mwakanĩ wa 2022 Kũnaĩ Nzaa Nthũku Mũno.” b
Sisya kĩlungu kĩ na kyongo “Kaũ Ũla Ũendeee Ukraine Nũetete Ũnyivu wa Lĩu Nthĩ Yonthe.”
“Mowau ma kũkwatanwʼa.”—Luka 21:11.
“Kũsyoka kwa ũwau wa volio (polio), ĩvindanĩ o yĩla ũwau wa monkeypox ũnaingĩvĩte mũno nayo COVID-19 ĩnaendeee kwananga maũndũ, nĩkũnoonanisye nesa vyũ ũndũ mowau wa kũkwatanwʼa mathũkĩte na ũndũ mbaa andũ me thĩnanĩ mũnene.” c
Sisya kĩlungu kĩ na kyongo “Mbivilia Yaĩtye Ata Ĩũlũ wa Andũ Milioni 6 Ala Mowaĩtwe Nĩ COVID-19?”
“Maũndũ ma kũtelemya.”—Luka 21:11.
‘Ũvyũvu mwingĩ mũno, mayũa, mwaki ũũvĩvya itheka, na mbua syĩ kĩwʼũ kĩngĩ mũno. Vate nzika thano wa mwaka wa 2022 ũkalilikanawa nũndũ wa maũndũ maingĩ ta asu maneekĩkie nthĩ yonthe ala manaetie wanangĩko, matuma andũ ngili maana maingĩ makwʼa, na angĩ milioni mbingĩ matia mĩsyĩ yoo.’ d
Sisya kĩlungu kĩ na kyongo “Mbivilia Yaĩtye Ata Ĩũlũ wa Ũvyũvu Kwongeleka Mũno Kĩla Vandũ?”
“Ithokoo.”—Luka 21:9.
“Wongeleku wa ũthatu ũla laiaa me nawʼo nũndũ wa mathĩna ma mbesa, na mũno mũno kwongeleka kwa thooa wa syĩndũ, nũnatumie maandamano ma ala meũleana na silikalĩ maingĩva mũno mwakanĩ wa 2022.” e
Sisya kĩlungu kĩ na kyongo “Mbivilia Yaĩtye Ata Ĩũlũ wa Ngalama ya Syĩndũ Kwambata?”
Mwaka ũla wũkĩte ũkeethĩwa na maũndũ meva?
Vai mũndũ ũtonya kũweta nesa kĩla kĩkekĩka 2023. Kĩla twĩsĩ nĩ kana o mĩtũkĩ Ũsumbĩ wa Ngai, kana silikalĩ ya ĩtunĩ, nũkũete moalyũku manene kũũ nthĩ. (Ndanieli 2:44) Silikalĩ ĩsu ĩkamina vyũ maũndũ ala matumaa andũ mathĩna na ĩyĩĩkĩĩthya kana kwenda kwa Ngai nĩkweekwa ĩũlũ wa nthĩ.—Mathayo 6:9, 10.
Nĩtũũkwĩkĩa vinya ũatĩĩe ũtao ũla Yesũ Klĩsto wanenganie yĩla waisye, “endeeai kũsyaĩĩsya,” na ũisyaĩĩsya wone ũndũ maũndũ ala maendeee ĩũlũ wa nthĩ mekwĩanĩsya wathani wa Mbivilia. (Maliko 13:37) Twĩũkũlya ũtũmanthe nĩ kana ũmanye mũnango ũndũ Mbivilia ĩtonya kũũtethya ũmũnthĩ na ũndũ ĩtonya kũũnenga we, na mũsyĩ waku wĩkwatyo wa wʼo wa ĩvinda yũkĩte.
a AP News, “Mwaka wa 2022 [Nĩwʼo] Mathĩna ma Kaũ Masyokie Europe,” ũvoo waandĩkiwe nĩ Jill Lawless, Matukũ 8, Mwei wa 12, 2022.
b World Food Programme, “Thĩna wa Lĩu wa Nthĩ Yonthe.”
c JAMA Health Forum, “Kwĩkala Ĩvindanĩ ya Mowau ma Kũkwatanwʼa—Kuma ũwau wa COVID-19 nginya wa Monkeypox, Volio, na Ũwau wĩtawa X,” ũvoo ũandĩkĩtwe nĩ Lawrence O. Gostin, JD, Matukũ 22, Mwei wa 9, 2022.
d Earth.Org, “Nĩ Kyaũ Kĩetete Moalyũku Manene ma Nzeve Mataaoneka ma Thano wa 2022?” ũvoo ũandĩkĩtwe nĩ Martina Igini, Matukũ 24, Mwei wa 10, 2022.
e Carnegie Endowment for International Peace, “Maandamano Maingĩ Nthĩ Yonthe Mwakanĩ wa 2022 Manaetetwe nĩ Ũthatu Nũndũ wa Mathĩna ma Mbesa,” ũvoo ũandĩkĩtwe nĩ Thomas Carothers na Benjamin Feldman, Matukũ 8, Mwei wa 12, 2022.
No Wendeewʼe Nĩ Ii
MŨSYAĨĨSYA
O Mĩtũkĩ Ngai Akavetanga Mathĩna Onthe
Twĩsĩ ata kana o mĩtũkĩ Ngai akoosa ĩtambya ya kũmina mathĩna na ũsili ũte wa katĩ?
MOMANYĨSYO MA VATA MA MBIVILIA
Ũsumbĩ wa Ngai Nĩ Kyaũ?
Ĩla Yesũ waĩ ĩũlũ wa nthĩ, amanyĩisye ĩũlũ wa Ũsumbĩ wa Ngai kwĩ ũvoo ũngĩ o na wĩva. Kwa myaka maana maingĩ, andũ methĩĩtwe maivoya Ũsumbĩ ũsu wũke.
MOMANYĨSYO MA VATA MA MBIVILIA
Ũsumbĩ wa Ngai Wambĩĩie Kũsumbĩka 1914
Mbee wa myaka 2600 mĩvĩtu, Ngai nĩwaveveeie mũsumbĩ waĩ na vinya mũno aota ndoto ĩla yĩendeee kwĩanĩa ũmũnthĩ.
ĨŨLŨ WITŨ
Kũlya Ũthokewe
Kwata ũsũngĩo wa ĩkũlyo yĩkonetye Mbivilia, kana wĩmanyĩsye mũnango ĩũlũ Ngũsĩ sya Yeova.
