O tondũ twonete kaũnĩ ũla ũendeee Ukraine, atongoi ma ndĩni ila syĩyĩtaa sya Kĩklĩsto, nĩmekĩaa aatĩĩi moo vinya malike kaũnĩ. Kwasisya wone ũndũ atongoi asu makwataa mbau ngalĩko syonthe sya ala mekũkita:

•   Ĩkaseti yĩmwe ya The Jerusalem Post, ya Matukũ 16, Mwei wa 3, 2022, nĩyawetie ndeto syaneeniwe nĩ mũtongoi ũmwe wa ndĩni wĩtawa Metropolitan Epiphanius I kuma taoni ya Kyiv. Yaisye: “Nĩtũũtũngĩa mũvea mwingĩ mũno asikalĩ maitũ onthe ala meyumĩtye matetee nthĩ yoo ya Ukraine ndĩkanangwe nĩ mũmaitha . . . Manyai kana twĩendeea kũmũkwata mbau vyũ, nĩtũmwendete na nĩtũũmũvoyea kuma ngoonĩ.”

•   Ĩkaseti yĩtawa Reuters yaandĩkie ũũ Matukũ 3, Mwei wa 4, 2022, “Mũtongoi wa ĩkanisa ya Russian Orthodox Church, nĩweekie ũmbano wa mwanya kwondũ wa asikalĩ ma Russia Wakyumwa ũmwe na amekĩa vinya matate matetee nthĩ yoo, o tondũ asikalĩ ma Russia ʼme oka matonya kwĩka.ʼ O ĩvindanĩ yu, silikalĩ ya Russia nĩyaendeee na mũvango wayo wa kũkita nthĩ ya Ukraine.”

 Mo Aklĩsto nĩmaĩle kwĩlikya kaũnĩ? Yo Mbivilia yaĩtye ata?

 Mbivilia yonanĩtye kana aatĩĩi onthe ma wʼo ma Yesũ Klĩsto mayĩlikasya kaũnĩ.

•   “Tũnga ũvyũ waku vala wĩkalaa, nũndũ ala matũmĩaa ũvyũ makaminwa na ũvyũ.”—Mathayo 26:52.

   Yo kwa wʼo mũndũ ũla wĩtĩkĩlanaa na kaũ kana ũendaa kaũnĩ akokite, ethĩawa aatĩĩe ndeto isu ya Yesũ?

•   “Nĩngũmũnenga mwĩao mweũ kana, mwendane inywʼĩ kwa inywʼĩ; o tondũ nyie namwendie, o nenyu mwendane o ta ũu. Nũndũ mweeka ũu andũ onthe makamanya kana mwĩ amanyĩwʼa makwa—ethĩwa mũkeethĩwa na wendo katĩ wenyu.”—Yoana 13:34, 35.

   Yo mũndũ ũla ũkwataa kaũ mbau nĩwĩthĩawa ayonanyʼa wendo ta ũla Yesũ waisye ũkatumaa andũ mamanya amanyĩwʼa make kana aatĩĩi make?

 Nĩ kana ũkwate ũvoo mwingangĩ, soma kĩlungu kĩ na kyongo “Je, Ukristo Unaunga Mkono Vita?”

 Yo nĩ ũndũ wosanĩte na kĩlĩko kwasya kana Aklĩsto mayaĩle kwĩlikya makaũnĩ ma ũmũnthĩ? Ĩĩ. Mbivilia yathanie kana ĩvindanĩ yitũ, ĩvinda yĩla yĩtawa “mĩthenya ya mũminũkĩlyo,” kũkeethĩwa na andũ kuma mbaĩ syonthe ala ‘matakemanyĩsya kaũ ĩngĩ’ na makeeka ũu maatĩĩe momanyĩsyo ma Yesũ.—Isaia 2:2, 4.

•   Nĩ kana ũmanye mũnango soma ilungu syĩ ĩkasetinĩ ya Mũsyaĩĩsya syĩ na kyongo, “Ngai Ethĩawa na Woni Mwaũ Ĩũlũ wa Kaũ?”

 O mĩtũkĩ Yeova, a ʼNgai wa mũuo,ʼ nũkũtũmĩa silikalĩ yake ya ĩtunĩ avonokye andũ kuma “thĩnanĩ na ũngʼendunĩ.”—Avilivi 4:9; Savuli 72:14.

•   Nĩ kana ũmanye ũndũ ũkeanĩsya ũndũ ũsu ĩloele vitio yĩ na kyongo Ũsumbĩ wa Ngai Nĩ Kyaũ?