Mwakanĩ wa 2023 ala me na ũtũĩka maũndũnĩ ma ũiiti nĩmanamanyie kana thĩna wa mũndũ kwĩwʼa ta wĩ weka nĩ thĩna mũnene kwa ũima wa mwĩĩ na waĩlĩte kwoswa kwa ũito. Yo thĩna ũsu no ũminwe?

•   Ndakĩtalĩ mũnene wĩtawa Vivek Murthy na wĩkalaa Amelika aĩtye, “Yĩla twambĩĩa kwĩwʼa ta twĩ oka na tweevathana na angĩ no tũlikye ũima witũ wa mwĩĩ mũisyonĩ na tũyasya ũtanu witũ.” Ongelile kwasya: “Ve ũndũ tũtonya kwĩka tũkitane na thĩna ũsu.”Ata? “Kwa kwĩkaa tũmaũndũ tũnini kĩla mũthenya nĩ kana tũlũlũmĩĩlye ngwatanĩo yitũ vamwe na ala angĩ.” a

 Mũndũ ndewʼaa ta wĩ weka o yĩla weevathana na andũ ala angĩ tu. Andũ amwe nĩmewʼaa ta me oka o na yĩla me katĩ wa andũ aingĩ. O na wĩthĩwe nĩkĩ ũkwĩwʼa ta wĩ weka, Mbivilia no ĩkũtetheesye. Yĩthĩawa na motao matonya kũtũtetheesya tũeke kwĩwʼa ta twĩ oka kwa kũlũlũmĩĩlya ngwatanĩo yitũ na ala angĩ.

 Eaa ngewa nesa na ala angĩ. Ndũkeke o kũtavya andũ ala angĩ ũndũ ũkwĩwʼa ĩndĩ methukĩĩsye nesa yĩla meũneena. O ũndũ woonyʼa mũno wĩana andũ ala angĩ kana nũkwendeewʼa nĩmo, nowʼo ngwatanĩo yaku namo ĩkalũlũmĩĩlaa.

•   Mwolooto wĩ Mbivilianĩ: “Mũteũmantha kwĩyĩuna o inywʼĩ ene, ĩndĩ kũmauna ala angĩ o namo.”—Avilivi 2:4.

 Mantha anyanya me kĩvathũkanyʼo. Ĩthĩwa wĩyũmbanĩtye kwambĩĩsya ũnyanya na andũ me na ũkũũ wĩ kĩvathũkanyʼo, me na syĩthĩo syĩ kĩvathũkanyʼo kana maumĩte nthĩ ingĩ.

•   Mwolooto wĩ Mbivilianĩ: “Vingũai ngoo syenyu vyũ.”—2 Akolintho 6:13.

 Nĩ kana ũkwate ũvoo mwingangĩ ĩũlũ wa ũndũ ũtonya kwambĩĩsya ũnyanya na andũ ala angĩ, soma kĩlungu “Kutosheleza Tamaa Yetu ya Kuwa na Marafiki.”