Ũlũsani ũla anene ma silikalĩ methĩawa nawʼo nĩ thĩna wĩthĩawa ĩũlũ wa nthĩ yonthe, na nũtumĩte kwĩthĩwa na mathĩna maingĩ. a Kwa ngelekanyʼo, ĩvindanĩ ya ũwau wa COVID-19, andũ nĩmatũlile mũtĩ anene ma silikalĩ nthĩ mbingĩ nũndũ wa kũtũmĩa mbesa ila syavathĩtwe sya kũkitana na ũwau wa ũsu nĩ kana meyĩune. Ũlũsani ũsu nĩwatumie andũ malea kũkwata ũiiti ũla mendaa, na nũndũ wa ũu aingĩ mathĩna mũno na makwʼa.

 Ũlũsani silikalĩnĩ ũtumaa maũndũ methĩwa me momũ vyũ. David Cameron, ũla waĩ mũnene silikalĩnĩ ya United Kingdom, aisye atĩĩ: “Ũlũsani no ũelekanwʼe na ũlũalũĩ ũla ũkwatĩtye nthĩ syonthe.”

 O na ũu wĩ o vo, no tũĩkĩĩe vyũ kana o mĩtũkĩ ũlũsani wʼonthe ũla wĩthĩawa silikalĩnĩ ũkathela. Nĩkĩ? Sisya wone kĩla Mbivilia yaĩtye Ngai ũkeka.

 Mbivilia yaĩtye ũũ ĩũlũ wa Ngai: “Nyie Yeova, nendaa [sila] wa katĩ, nĩmenaa ũngʼei vamwe na ũthũku.” b (Isaia 61:8) Yĩla andũ mathĩna nũndũ wa meko ma ũlũsani, Ngai nũmanyaa. (Nthimo 14:31) Athanĩte atĩĩ: “Nũndũ wa ngya kũthĩna,  . . Oyu nĩngũkĩla.”—Savuli 12:5.

 Ngai akeeka ata? Vandũ va kũvĩndũa silikalĩ ila syĩ kwʼo ũmũnthĩ, akaivetanga vyũ na ayĩũngamya silikalĩ yake ya ĩtũnĩ ĩla yĩtĩtwe “Ũsumbĩ wa Ngai.” (Maliko 1:14, 15; Mathayo 6:10) Mbivilia yaĩtye: “Ngai wa ĩtunĩ akaũngamya ũsumbĩ . . . ũkatilanga ilungu na kũmina mosumbĩ asu onthe, nawʼo ũkekalaa tene na tene.” (Ndanieli 2:44) Yĩla Ngai wĩĩka ũu, akeethĩwa amina ũlũsani ũla wĩ kwʼo ũmũnthĩ.

 Twĩsĩ ata kana silikalĩ ya Ngai ĩla nĩ Ũsumbĩ wake ĩikethĩwa na ũlũsani? Kwasũanĩa maũndũ aa maatĩĩe.

1.  1. Vinya. Ũsumbĩ ũsu ũkwataa vinya kuma kũla kwĩ Ngai Mwene Vinya Wʼonthe.—Ũvuanyʼo 11:15.

    Nĩkĩ ũndũ ũsu nĩ wa vata: Nĩ kana silikalĩ sya andũ ithũkũme, syĩkwatasya mbesa ila syumawʼa nĩ andũ. Kaingĩ kĩu kĩtumaa anene ma silikalĩ moya, mosa ĩvaki, na maitwaĩĩsya maũndũ ũndũ mekwenda. Ĩndĩ o na vailye ũu, Ũsumbĩ ũũ ũtongoewʼe nĩ Ngai Mwene Vinya Wʼonthe, na kwoou mavinda onthe ũkeethĩawa ũtonya kwĩanĩsya mavata ma andũ.—Savuli 145:16.

2.  2. Mũsumbĩ. Ngai nũmũnyuvĩte Yesũ Klĩsto ethĩwe Mũsumbĩ wa Ũsumbĩ ũsu.—Ndanieli 7:13, 14.

    Nĩkĩ ũndũ ũsu nĩ wa vata: O na asumbĩ ala aseo vyũ ma andũ methĩawa matonya kũkengwa meke maũndũ mataĩle. (Mũtavanʼya 7:20) Kĩvathũkanyʼo na ũu, Yesũ nĩwonanĩtye ũtheinĩ kana we ndesa kwosa ĩvaki. (Mathayo 4:8-11) Kwongeleela kĩu, mavinda onthe atongoeawʼa nĩ wendo wa wʼo kwelekela ala ũsumbĩkĩte na nĩwendeeawʼa vyũ nĩmo.—Savuli 72:12-14.

3.  3. Mĩao. Mĩao ya Ũsumbĩ wa Ngai nĩ mĩlũngalu na nĩtanĩthasya ala mamĩatĩĩaa.—Savuli 19:7, 8.

    Nĩkĩ ũndũ ũsu nĩ wa vata: Kaingĩ mĩao ya andũ ndĩeleekaa, nĩvinyĩĩaa ala mamĩatĩĩaa, kana ndĩatĩĩawa ũndũ vaĩle. Na ũu ũituma kwĩthĩwa na ũlũsani. Kĩvathũkanyʼo na ũu, mĩao ya Ngai nĩyosanĩte na kĩlĩko na nĩtethasya ala mamĩatĩĩaa. (Isaia 48:17, 18) Kwongeleela kĩu, mĩao ĩsu ndĩkonetye o meko me moka, ĩndĩ nĩ vamwe na kĩeleelo kya kwĩka maũndũ. (Mathayo 22:37, 39) Kwa wʼo Ngai nũtonya kũsoma ngoo, na nũtonya kũĩkĩĩthya kana mĩao ĩsu yaatĩĩwa kwa nzĩa ĩkwonanyʼa ĩnee.—Yelemia 17:10.

 Nĩtũũkũthokya wĩmanyĩsye maũndũ maingangĩ ĩũlũ wa watho ũla wĩ Mbivilianĩ ũkonetye silikalĩ ya ĩvinda yũkĩte ĩla ĩtakethĩwa na ũlũsani.

•   Nĩ kana wĩmanyĩsye itumi ingĩ ĩtatũ syonanĩtye nĩkĩ Ũsumbĩ wa Ngai ũtakesa kwĩthĩwa na ũlũsani, soma kĩlungu “Ũsumbĩ wa Ngai nĩ Silikalĩ Ndĩkĩĩku.”

•   Ĩloele vitio Ũsumbĩ wa Ngai Nĩ Kyaũ? nĩ kana wĩmanyĩsye maũndũ maingangĩ ĩũlũ wa silikalĩ ya Ngai na kĩla ĩkeka vaa ĩũlũ wa nthĩ.

•   Tata mũvango witũ wa kwĩmanyĩsya Mbivilia vate ndĩvi nĩ kana wone ũndũ ũtonya kũtetheka nĩ mawatho ala me Mbivilianĩ.