Kwosana na Kĩsese kya Maũvoo ma Katholeki (Catholic News Service), twĩ Matukũ 25, Mwei wa 3, 2022, Vovu Francis nĩwaũngamie mbee wa mũvwʼanano wa Meli “alalĩtye, na akunamĩtye mũtwe wake, na ambĩĩa kũvoya ate kumya wasya,” mbokanĩ ĩla yeekĩiwe ĩkanisanĩ ya St. Peterʼs Basilica. “Nĩwamwĩsũvie Meli” amanenge mũuo. Livoti ya Maũvoo ya Vatican yongelile kwasya kana ‘Vovu nĩwavoyie Mũtheu Meli nĩ kana andũ methĩwe atheu, mũno mũno Russia na Ukraine.ʼ

 We wĩona ata? Nĩ ũndũ waĩlĩte kũvoya mĩvwʼanano kana kũmĩtũmĩa ũthaithinĩ? Sũanĩa mĩsoa ĩĩ yĩ Mbivilianĩ:

•   “Ndũkeseũvĩsye mũvwʼanano mwasũvye, o na mũvwʼano o na wĩva wa kĩndũ kĩ ĩtunĩ ĩũlũ, kana kĩla kĩ kũũ nthĩ, kana kĩla kĩ manzĩnĩ ĩtheo wa nthĩ: ndũkamĩkunamĩe, o na ndũkamĩthũkũme; nũndũ nyie Yeova Ngai waku nĩ Ngai wĩ kĩwĩu.”—Kuma 20:4, 5. a

•   “Mĩvwʼanano yoo nĩ vetha na thaavu, wĩa wa moko ma andũ. Yĩ na makanywʼa, ĩndĩ ndĩneenaa; yĩ na metho, ĩndĩ ndĩonaa; yĩ na matũ, ĩndĩ ndĩwʼaa; yĩ na manyiũũ, ĩndĩ ndĩnyungĩaa; yĩ na moko, ĩndĩ ndĩkwatangaa; yĩ na maũũ, ĩndĩ ndĩendaa; o na ndĩumasya wasya mĩmeonĩ yayo. Ala mamĩseũvasya makeethĩwa mailyĩ tayo; ĩĩ, kĩla mũndũ ũla ũmĩĩkĩĩaa.”—Savuli 115:4-8.

•   “Ninyie Yeova, nĩyo syĩtwa yakwa; na ũnene wakwa ndikanenga ũngĩ, kana ndaĩa yakwa kũmĩnenga mĩvwʼanano myasũvye.”—Isaia 42:8.

•   “Kĩai ũthaithi wa mĩvwʼanano.”—1 Akolintho 10:14.

•   “Ĩvathanei na mĩvwʼanano.”—1 Yoana 5:21.

 Nĩ kana ũkwate ũvoo mwingangĩ ĩũlũ wa kĩla Mbivilia yaasya ĩũlũ wa kũtũmĩa mĩvwʼanano ũthaithinĩ, soma kĩlungu “Maoni ya Biblia—Sanamu,” kana wĩloele vitio We Ngai Nĩwĩtĩkĩlĩtye Kũtũmĩa Mĩvwʼanano Ũthaithinĩ?

 O na ĩngĩ no wendeewʼe nĩ kĩla Mbivilia yaĩtye ĩũlũ wa ilungu ii:

•   “Mbivilia Yaasya Ata Ĩũlũ wa Meli Ũla Ũteesĩ Mũndũũme?”

•   “Je, Usali kwa Bikira Maria?”

•   “Miujiza na Mizuka—Je! Ni Ishara Zitokazo kwa Mungu?”

•   “Nĩ Kyaũ Kĩkaete Mũuo Ĩũlũ wa Nthĩ?”

Photo credit: Vincenzo Pinto/AFP via Getty Images