Andũ ta mbilioni itano nĩmekwĩloela Mathaũ ma Olympics ma 2024, kuma nthĩ 206 ila syĩ mathaũnĩ asu. Thomas Bach ũla nĩwe ũtongoesye kamitii ya mathaũ asu aisye atĩĩ: “Mathaũ aa nĩ ũndũ ũmwe ũtumaa nthĩ yonthe yĩthĩwa na mũuo na ngwatanĩo. Ekai tũtanĩe mũuo ũsu ũetawe nĩ mathaũ aa, twĩ ngwatanĩo o na kau tumĩte kũndũ kwĩ kĩvathũkanyʼo.”

 Mo mathaũ asu ma Olympics no meanĩsye ũndũ ũsu ũnenevete ũu? Yo ve wĩkwatyo wa kwĩsa kwĩthĩwa na mũuo wa wʼo na ngwatanĩo?

 Mathaũ ma Olympics ma mwaka ũũ nĩmakonanĩtye na maũndũ maingĩ. Mathaũ asu nĩmavuanĩtye maũndũ makonetye mwĩkalĩle na siasa, ala matumaa andũ methĩwa mate ngwatanĩo. Maũndũ asu nĩ vamwe na ũthasyo wa andũ, kũvathũlwa kwa andũ nũndũ wa langi woo, kũvathũlwa nũndũ wa ndĩni, na andũ kwĩthwa mateũkuwa ũndũ ũmwe.

 Mathaũ ma nthĩ yonthe ta asu ma Olympics nĩmatanĩthasya andũ. Ĩndĩ vandũ va kũete ngwatanĩo na mũuo, mathaũ asu nĩmaumĩlasya ũtheinĩ mĩtuo na meko ala matumaa andũ maanĩka.

 Mbivilia nĩyaathanie ĩũlũ wa mĩtuo ĩla ĩtumaa vethĩwa ve vinya andũ ũmũnthĩ kwĩthwa na ngwatanĩo. (2 Timotheo 3:1-5) Nĩ kana wĩmanyĩsye mũnango ĩũlũ wa wathani ũsu, soma kĩlungu kĩ na kyongo “Je, Biblia Ilitabiri Mitazamo na Matendo ya Watu Leo?”

 Mbivilia nĩnenganĩte wĩkwatyo wa wʼo wa kwĩsa kwĩthĩwa na mũuo na ngwatanĩo nthĩ yonthe. Yathanĩte kana andũ onthe makeethwa ngwatanĩo masumbĩkĩtwe nĩ silikalĩ ya ĩtunĩ, yĩtawa “Ũsumbĩ wa Ngai.”—Luka 4:43; Mathayo 6:10.

 Mũsumbĩ wa Ũsumbĩ ũsu, ũla nĩ Yesũ Klĩsto, akaete mũuo nthĩ yonthe. Mbivilia yaĩtye:

•   “Ala alũngalu makaaĩlaa, na kũkeethĩwa mũuo mwingĩ.”—Savuli 72:7.

•   “Akavonokasya mũthĩni yĩla wĩkayaa . . . Akoovosya mathayũ moo kuma thĩnanĩ na ũngʼendunĩ.”—Savuli 72:12, 14.

 O na ũmũnthĩ, momanyĩsyo ma Yesũ nĩmatumĩte andũ milioni mbingĩ kuma nthĩ 239 methĩwa me ngwatanĩo. O tondũ Aklĩsto maĩle kwĩka, Ngũsĩ sya Yeova nĩmemanyĩĩtye kwĩkala na mũuo. Nĩ kana ũmanye ũu ũtonyeka ata, soma ĩkaseti ya Mũsyaĩĩsya yĩ na kyongo, “Ũndũ Ũtonya Kũsinda Kĩmena.”