Kwasya wĩa no kũtume wĩthĩwa wĩ ũndũ wĩ vinya kwĩanĩsya mavata ma mũsyĩ waku na no kũtume ũthĩnĩka mũno na wĩwʼa ũte mwĩanĩe. Kũsũanĩa maũndũ aa maatĩĩe mosanĩte nesa na myolooto ya Mbivilia no kũũtetheesye ũkomĩĩsya.

•   Ea ngewa na angĩ ĩũlũ wa ũndũ ũkwĩwʼa.

   Ũndũ Mbivilia yaasya: “Mũnyanya nĩwendanaa ĩndĩ yonthe.”—Nthimo 17:17.

   Ĩtina wa kwasya wĩa, no wĩwʼe wĩmakĩĩte, wĩ mũthatu, kana wĩ mũvũvũanu, o na no wĩwʼe wĩ vathei. Ĩndĩ yĩla watavya andũ ma mũsyĩ na anyanya maku ĩũlũ wa ũndũ ũkwĩwʼa, no maũtetheesye ũkaeka kũthĩnĩka mũno. O na no maũnenge ũtao ũtonya kũũtetheesya kũkwata wĩa.

•   Ndũkemakĩe kũvĩtũka ũndũ vaĩle.

   Ũndũ Mbivilia yaasya: “Mũikemakĩe nongi kwondũ wa ũnĩ, nũndũ ũnĩ ũkeethĩwa na mawĩmakĩo mawʼo.”—Mathayo 6:34.

   Mbivilia nĩtwĩkĩaa vinya twĩke mĩvango kwĩ tene. (Nthimo 21:5) Ĩndĩ o na vailye ũu, nĩsyokete ĩkatũtaa tũikemakĩe kũvĩtũka ũndũ vaĩle ĩũlũ wa ĩvinda yũkĩte. Mavinda maingĩ nĩtwĩmakĩaa ĩũlũ wa maũndũ o na matesaa kwĩkĩka. Wĩthĩwa wĩ ũndũ mũseango tũkeka o kĩla tũtonya mũthenya o ũsu.

   Mbivilia yĩ na ũtao mwingangĩ ũtonya kũũtetheesya ũmĩĩsye mawĩmakĩo ala ũtonya kwĩthĩwa namo. Nĩ kana wĩmanyĩsye maũndũ maingangĩ, soma kĩlungu “Jinsi ya Kukabiliana na Mkazo.”

•   Ĩka moalyũku ala maĩle ĩũlũ wa ũndũ ũtũmĩaa mbesa.

   Ũndũ Mbivilia yaasya: “Nĩneemanyĩisye ũndũ ndonya kwĩthĩwa . . . nĩ na syĩndũ mbingĩ kana nĩ mũnyivĩe.”—Avilivi 4:12.

   Alyũkana na maũndũ. Ũu nĩ vamwe na kũvĩndũa mĩtũmĩĩle yaku ya mbesa nĩ kana wĩkale kwosana na ũkwati waku. Ĩthĩwa wĩ metho ndũkelikye makoaninĩ mate ma lasima.—Nthimo 22:7.

   Nĩ kana ũkwate maũndũ matonya kũũtetheesya kũmanya ũndũ ũtonya kwĩkala kwosana na ũkwati waku, sisya kĩlungu “Ũndũ Ũtonya Kwĩka Yĩla Wanyivĩwa Nĩ Mbesa.”

•   Tũmĩa ĩvinda yaku nesa.

   Ũndũ Mbivilia yaasya: “Endeeai kwĩkalanyʼa na ũĩ . . . . mũitũmĩa ĩvinda yenyu nesa vyũ.”—Akolosai 4:5.

   O na kau yu ndũendaa wĩanĩ, endeea kwĩthĩwa na mũvango mũseo wa kũtũmĩaa ĩvinda yaku nesa. Kwĩka ũu kũkaũtetheeasya ũkekaa maũndũ nesa, na ũyĩwʼaa wĩ mwĩanĩe.

•   Alyũkana na maũndũ.

   Ũndũ Mbivilia yaasya: “Wĩanĩ wʼonthe ve ũtandĩthyo.”—Nthimo 14:23.

   Ĩtĩkĩla kũthũkũma wĩa wĩ kĩvathũkanyʼo na ũla ũnathũkũmaa. Nĩvatonyeka ũkendeka kũmantha mawĩa ala monekaa me ma kĩlasi kya nthĩ, kana mawĩa ũkũĩvwa mbesa nini kwĩ ila ũnakwataa.

•   Ndũkakwʼe ngoo.

   Ũndũ Mbivilia yaasya: “Kĩoko vuĩa mbeũ syaku, na wĩoo ndũkasiĩĩe kwʼoko kwaku; nũndũ ndwĩsĩ ila ikaĩla.”—Mũtavanʼya 11:6.

   Endeea kũmantha wĩa. Tavya angĩ kana nũũmantha wĩa. Neena na andũ ma mũsyĩ, ala wĩsene namo, ala wathũkũmaa namo, na atũi maku. Neena na ala matetheeasya angĩ kũmantha wĩa, na ũisisya matangaso ma wĩa. Mantha wĩa kũndũ kwingĩ na ũyusũsya vomu mbingĩ ũndũ vatonyeka sya kũkũlya wĩa.