Andũ ĩũlũ wa nthĩ maendeee kũmĩanĩsya na ũvyũvu wĩ ĩũlũ mũno, vamwe na mathĩna manene ala maumanaa na ũalyũku ta ũsu wa nzeve. Kwoona livoti ii iatĩĩe:

•    “Mwei ũũ wa thanthatũ nĩwʼo ũnaĩ na ũvyũvu ũla mwingĩ vyũ kuma yĩla andũ mambĩĩie kũthima ũvyũvu ĩũlũ wa nthĩ, myaka 174 mĩvĩtu.”—National Oceanic and Atmospheric Administration, U.S. Department of Commerce, Matukũ 13, Mwei wa 7, 2023.

•    “Nthĩ ya Italy, Spain, France, Germany, na Poland, syĩ na ũvyũvu wĩ ĩũlũ mũno, ũla ũtonya kũvika 48°C [118°F] ithamanĩ sya Sicily na Sardinia. Ũsu nũtonya kwĩthĩwa newʼo ũvyũvu ũla wĩ ĩũlũ vyũ waaĩthĩwa Europe.”—European Space Agency, Matukũ 13, Mwei wa 7, 2023.

•    “Nũndũ nthĩ ĩendeee kwĩthĩwa na ũvyũvu mwingĩ, twĩkwatĩtye kwona mbua mbingĩ mũno, yĩ na kĩwʼũ kingĩ mũno, ĩla ĩkatumaa kwĩthĩwa na wanangĩko mwingĩ.”—Stefan Uhlenbrook, mũũngamĩi wa hydrology, water and cryosphere nthĩnĩ wa World Meteorological Organization, Matukũ 17, Mwei wa 7, 2023.

 Kwongeleka kwa livoti sya ũalyũku ta ũsu wa nzeve nĩkũtumĩte wĩmakĩa? Sisya wone kĩla Mbivilia ĩwetete ĩũlũ wa ũndũ ũũ waĩle kũthĩnĩkĩwa na mĩtũkĩ.

 Ĩĩ. Kwongeleka kwa ũvyũvu ĩũlũ wa nthĩ yonthe, o vamwe na moalyũku angĩ ma nzeve, nĩkwosanĩte na maũndũ ala Mbivilia yathanie makekĩka ĩvindanĩ yĩĩ. Kwa ngelekanyʼo, Yesũ athanie kana tũkoona “maũndũ ma kũtelemya,” kana “maũndũ ma kũsengyʼa na ma kũkĩwa.” (Luka 21:11; Good News Translation) Wongeleku wa ũvyũvu nthĩ yonthe nũtumĩte aingĩ methĩwa na wia mayona kana andũ makaananga nthĩ vyũ.

 Aiee. Ngai oombie nthĩ yĩthĩwe mũsyĩ witũ tene na tene, na kwoou ndaketĩkĩlya andũ mamyanange. (Savuli 115:16; Mũtavanʼya 1:4) O na athanĩte “kũmananga ala manangaa nthĩ.”—Ũvuanyʼo 11:18.

 Mbivilia yonanĩtye kana Ngai e na ũtonyi wa kũsũvĩa nthĩ ndĩkanangwe, na ũu nĩwʼo ũkeka.

•    “[Ngai] nũkilĩthasya kĩseve kĩnene, ũkethĩa itulumo syawʼo nivindĩtye.” (Savuli 107:29) Ngai e na ũtonyi wa kũsiĩĩa mavinya ma wũmbi.O na ĩngĩ e na ũtonyi wa kũseũvya kũla mawĩthyũlũlũko manangĩtwe, na aivetanga maũndũ ala matumaa andũ mathĩna nũndũ wa moalyũku ma nzeve.

•    “Nũmyũkĩaa nthĩ, na kũmĩnyithya, nũmĩnoasya mũno.” (Savuli 65:9) Ngai akaete moathimo, na aitwʼĩkĩthya nthĩ ĩno valatiso.

 Nĩ kana wĩmanyĩsye mũnango watho ũla wĩ Mbivilianĩ wa ũndũ nthĩ ĩkatwʼĩkĩthwʼa nzaũ, sisya kĩlungu kĩ na kyongo, “Ni Nani Atakayeiokoa Dunia?”