Ndwĩthĩawa wĩ ũndũ wĩ laisi kwa andũ aingĩ ĩũlũ wa nthĩ kwĩanĩsya mavata moo ma kĩla mũthenya, na o ũndũ ĩvinda yĩvĩtĩte, nowʼo maũndũ maendeee kweta.

•   Kwosana na livoti ĩmwe ya nthĩ yonthe, a “Lato wa mbesa ila andũ makwataa kĩla mwei ũendeee kũtheea mũno.” O na livoti ĩsu yonanĩtye kana maũndũ maendeea ũu maendeee, veĩthĩwa “na kĩvathũkanyʼo kĩnene katĩ wa ala athwii na ala ngya” na “mĩsyĩ mingĩ ndĩĩthĩwa ĩtonya kwĩkala nesa ta tene.”

 Yo silikalĩ syĩ na ũtonyi wa kũmina kana o kwaĩlangya thĩna ũsu wa ũkwati ũendeee kwongeleka?

 Mbivilia ĩeleetye kana ve silikalĩ yĩ na ũtonyi wa kũmina mathĩna onthe ma mbesa, o vamwe na kĩvathũkanyʼo kĩla kĩthĩawa vo katĩ wa ala athwii na ala ngya. Yaĩtye kana “Ngai wa ĩtunĩ akaũngamya ũsumbĩ,” kana silikalĩ yake ĩla ĩkatongoesya maũndũ onthe ĩũlũ wa nthĩ. (Ndanieli 2:44) Silikalĩ ĩsu yasumbĩka nthĩ yonthe, vai mũndũ ũkewʼa e mũvathũle kana ta woolile. (Savuli 9:18) Ũsumbĩ wa Ngai ũkaĩkĩĩthya onthe ala makethĩwa masumbĩkĩtwe nĩwʼo, me na kyonthe kĩla mekwenda nĩ kana mekale me atanu. O na ĩngĩ, onthe makatanĩaa ũsyao wa wĩa woo.—Isaia 65:21, 22.