ENDEEAI KŨSYAĨĨSYA!

Andũ ma Saenzi Nĩmanasongangisye Mbee Saa ya Mũthenya wa Wanangĩko—Mbivilia Yaĩtye Ata?

THAŨKA

Kwĩ Matukũ 24, Mwei wa 1, 2023, andũ ma saenzi nĩmanasongangisye Saa ya Mũthenya wa Wanangĩko a yathengeanga ũtukũ katĩ. Maasya saa ĩsu yĩthĩawa ĩyonanyʼa mũminũkĩlyo wa nthĩ.

“‘Saa ya Mũthenya wa Wanangĩko,’ ĩla yonanasya mũisyo ũla andũ matonya kwĩyĩetee mo ene, nĩnasongangiwʼe Wakelĩ yathengeangĩa ũtukũ katĩ mũno kwĩ ĩvinda yĩngĩ o na yĩva, nũndũ wa maũndũ ta kaũ ũla ũendeee Ukraine, kũkĩa kaũ wa nuclear, na mũisyo ũla ũtonya kũkwata nthĩ nũndũ wa ũalyũku wa nzeve.”—AFP International Text Wire.
“Wakelĩ andũ ma saenzi nĩmanaisye kana ‘Saa ya Mũthenya wa Wanangĩko’ nĩnasongangiwʼe weethĩa ĩtielye sekendi 90 ũtukũ katĩ ũvike, na ũu watuma andũ methĩwa me vakuvĩ mũno vyũ na Alimaketoni kwĩ ĩvinda yĩngĩ o na yĩva.”—ABC News.
“Kĩkundi kya andũ ma saenzi kuma nthĩ syĩ kĩvathũkanyʼo nĩkĩnaumisye ũkanyʼo kyasya kana yu andũ meoneka matonya kwĩyĩetea wanangĩko mũnene kwĩ ĩvinda yĩngĩ o na yĩva.”—The Guardian.

Kwʼo kwanangwa kwa andũ na nthĩ ĩno kwĩ vakuvĩ mũno? Yo nĩtwaĩlĩte kũkĩa kĩla kĩtonya kwĩkĩka ĩvinda yũkĩte? Mbivilia yaĩtye ata?

Kĩla kĩkekĩka ĩvinda yũkĩte

Mbivilia yaĩtye kana “nthĩ nĩyĩkalaa tene na tene,” na ve andũ ala “makatũa vo kũvika tene na tene.” (Mũtavanʼya 1:4; Savuli 37:29) Kwoou vaiĩ ĩvinda andũ makatuma nthĩ ĩno ĩtekalĩka.

Ĩndĩ Mbivilia nĩwetete kana kũkeethĩwa na mũminũkĩlyo. Kwa ngelekanyʼo, nĩwetete kana “nthĩ nĩkũvĩta.”—1 Yoana 2:17.

Nĩ kenda ũmanye kĩla Mbivilia yonanasya yĩla ĩkũneenea mũminũkĩlyo wa nthĩ, soma kĩlungu kĩ na kyongo, “Je, Ulimwengu Utakwisha Karibuni? Apokalipsi Ni Nini?”
Nĩ kana ũmanye kĩla Mbivilia yaĩtye ĩũlũ wa maũndũ ala makethĩwa ĩvinda yũkĩte, soma kĩlungu kĩ na kyongo, “Mwisho wa Ulimwengu Utakuja Lini?”

Endeea Kwĩthĩwa na Woni Ũla Waĩlĩte

Mbivilia no ĩtũtetheesye kũendeea kwĩthĩwa na woni ũla waĩlĩte o na kau nthĩ ĩno yusĩe mathĩna. Ata?

Mbivilia nĩtũnengae ũtao ũtonya kũtũtethya ũmũnthĩ. (2 Timotheo 3:16, 17) Kwa ngelekanyʼo, soma kĩlungu kĩ na kyongo, “Jinsi ya Kudhibiti Wasiwasi,” nĩ kana wone ũndũ Mbivilia ĩtonya kũũtetheesya ũendeee kwĩthĩwa na woni ũla waĩlĩte o na kau kwĩ mathĩna.
Mbivilia nĩtũnengete wĩkwatyo wa wʼo wa ĩvinda yũkĩte. (Alomi 15:4) Nĩeleetye nesa maũndũ ala matonya kwĩkĩka yu na ĩvindanĩ yũkĩte, na kĩu nĩkĩtumaa tũũngama twĩ alũmu o na kũtwʼĩka maũndũ nthĩ maendeee kũthũkĩĩa.

Nĩ kana ũtetheke mũno nĩ Mbivilia, twĩũthokya ũtate mũvango witũ wa kũmanyĩwʼa Mbivilia vate ndĩvi.

a “Saa ya Mũthenya wa Wanangĩko nĩ mũvango ũseũvĩtwʼe wa kũnenga andũ ũkanyʼo mamanye kana twĩ vakuvĩ mũno kwananga nthĩ ĩno nũndũ wa kũseũvya syĩndũ sya tekinolongyi itonya kũete mũisyo. Saa ĩsu nĩ ya ngelekanyʼo, kana kĩndũ kĩtũlilikanasya mĩisyo ĩla twaĩlĩte kwĩvathana nayo ethĩwa nĩtũkwenda tũvote kũendeea kwĩkala nthĩ ĩno.”—Bulletin of the Atomic Scientists.