Ũndũ Ngai Ũthĩnĩkĩaa Ala Matewʼaa
Ũmũnthĩ ũũ ve na andũ vakuvĩ milioni 70 ala matewʼaa nthĩ yonthe, na aingĩ maneenaa matũmĩĩte kĩthyomo kĩmwe katĩ wa ithyomo 200 sya ala matewʼaa. Ũndũ wa kũmakya nĩ kana, andũ ala matewʼaa kaingĩ nĩmakuawa naĩ nĩ andũ angĩ o tondũ ũvoo ũũ ũatĩĩe wonanĩtye:
“Ĩũlũ wa nthĩ yonthe, ũthasyo wa ala matewʼaa na ala matewʼaa nesa nũkothaa kũvũthĩĩwʼa.”—National Association of the Deaf (U.S.).
“Andũ ala matewʼaa nthĩnĩ wa nthĩ ila ite ũkwati mwingĩ methĩawa katĩ wa andũ ala ngya vyũ, mayĩthĩawa na ũthasyo wa kũkwata kĩsomo kĩla kyaĩlĩte, mawĩa, na kũmanya maũndũ ala maendeee.”—World Federation of the Deaf.
Ngai ewʼaa ata nũndũ wa andũ ala matewʼaa? Mbivilia yaĩtye ata ĩũlũ wa andũ ala matewʼaa? Na Ngũsĩ sya Yeova imatetheeasya ata ũmũnthĩ?
Woni wa Ngai Ĩũlũ wa Ala Matewʼaa
Mbivilia yonanĩtye kana Yeova a Ngai nũthĩnĩkĩaa ala matewʼaa. Endaa makuwe nesa na maitetheka nesa nĩ kĩsomo kĩla ũnenganae.
Ĩandĩko: “Ndũkaumanĩe ala mate matũ.”—Alivai 19:14.
Kĩla Ĩandĩko yĩu yonanasya: Mĩao ya Yeova ĩvindanĩ ya Aisilaeli nĩyasũvĩaa ũthasyo wa ala matewʼaa.
Ĩandĩko: “Ngai nde kyende.”—Meko ma Atũmwa 10:34.
Kĩla Ĩandĩko yĩu yonanasya: Yeova nũsũvĩaa andũ onthe ma syĩthĩo syĩ kĩvathũkanyʼo, maumĩte kũndũ kwĩ kĩvathũkanyʼo, maneenaa ithyomo syĩ kĩvathũkanyʼo, o vamwe na ala matewʼaa.
Ĩandĩko: “Yesũ alika ndũanĩ . . . , [aitavanyʼa] ũvoo mũseo wa Ũsumbĩ.”—Mathayo 9:35.
Kĩla Ĩandĩko yĩu yonanasya: Yesũ ookie kũũ ĩũlũ wa nthĩ nĩ kana amanyĩsye andũ ĩũlũ wa Ũsumbĩ wa Ngai na kĩla wonanasya kwa andũ—o vamwe na ala matewʼaa.—Mathayo 6:10.
Ĩandĩko: Yesũ nĩwatumie “ala matewʼaa nthĩ mewʼa, na ala mataneenaa maneena.”—Maliko 7:37.
Kĩla Ĩandĩko yĩu yonanasya: Yesũ nĩwoonanisye kĩla Ũsumbĩ wa Ngai ũkeanĩsya yĩla ala matewʼaa nthĩ makethĩwa matonya kwĩwʼa na kũneena. Ĩvindanĩ yĩu, Yesũ nĩwatũmĩie kĩthyomo kya ala matewʼaa kũneena na mũndũũme ũmwe ũtewʼaa atanamba kũmũtũngĩa ũtonyi wake wa kwĩwʼa na kũneena.—Maliko 7:31-35.
Ĩandĩko: “Matũ ma ala au matũ [makalindũka].”—Isaia 35:5.
Kĩla Ĩandĩko yĩu yonanasya: Yeova nĩwaathanie kana ala matewʼaa nthĩ makeewʼa.—Isaia 29:18.
Ũndũ Ngũsĩ sya Yeova Itetheeasya Ala Matewʼaa Ũmũnthĩ
Ngũsĩ sya Yeova nitavanasya ũvoo wa Ngai wa wĩkwatyo kwa ala matewʼaa ĩũlũ wa nthĩ. Syĩkaa ata nĩ kana ianĩsye kĩu? Nĩtumasya Mbivilia na vitio sya kwĩmanyĩsya Mbivilia kwa ithyomo mbee wa 100 sya ala matewʼaa. O na ĩngĩ nĩtũmanyĩasya andũ Mbivilia na kwĩka maũmbano ma Kĩklĩsto tũtũmĩĩte kĩthyomo kya ala matewʼaa. Twĩkaa maũndũ asu onthe vate ndĩvi kwa onthe ala mekwenda ũtethyo wa Ngai. Nĩkĩ? Nũndũ Yesũ atwĩaĩe atĩĩ: “Mwanengiwe mana, nenganai mana.”—Mathayo 10:8.
No ũkwate maũndũ aa kĩsesenĩ kana ũkaumya simũnĩ yaku syĩndũnĩ ii iatĩĩe:
Kĩsese kya JW.ORG. Walika kĩsesenĩ, tina kaũvano kala kethĩawa vaaya ĩũlũ kethĩawa konanĩtye kĩthyomo nĩ kana ũnyuve ũvoo kĩthyomonĩ kĩla ũkwenda kĩthyomonĩ kya ala matewʼaa.
Vulongulamu ya JW Library Sign Language. Weekĩa vulongulamu ĩno simũnĩ yaku, ũkethĩawa ũtonya kumya vitio kĩthyomonĩ kya ala matewʼaa kana kũsyĩloela.
Nĩ Kĩsomo Kĩva kya Mbivilia Tũtũmĩaa Kũtetheesya Ala Matewʼaa?
Mbivilia ya kĩthyomo kya ala matewʼaa. Mbivilia ya Kĩsũngũ ya Ũalyũlo wa Nthĩ Nzaũ wa Maandĩko Matheu kĩthyomonĩ kya ala matewʼaa kya Amelika, nĩyo yaĩ Mbivilia ya Mbee vyũ ĩũlũ wa nthĩ kumwʼa yĩ nima kĩthyomonĩ kya ala matewʼaa. Mbivilia ya Ũalyũlo wa Nthĩ Nzaũ yu nĩkwatĩkanaa yĩ nima kana ĩte nima ithyomonĩ sya ala matewʼaa, ve na ithyomo mbingĩ iendeee kwongeleka kĩla mwaka. (Wenda kũkwata ithyomo mbingangĩ kana kũsoma Mbivilia kĩsesenĩ, sisya ĩsandũkũ yĩ na kyongo, “ Mbivilia ya Ũalyũlo wa Nthĩ Nzaũ kĩthyomonĩ kya ala matewʼaa.”)
Sisya vitio yĩ na kyongo, Biblia Tafsiri ya Ulimwengu Mpya Inapatikana Katika Lugha ya Ishara ya Marekani nĩ kana ũmanye wĩa ũla tũtethasya kumĩthya Mbivilia ya kĩthyomo kya ala matewʼaa.
Nĩ kana waĩlangye ũsomi waku wa Mbivilia, no wĩkĩe Vulongulamu ya JW Library Sign Language simũnĩ yaku. Vulongulamu ĩno no yĩũtetheesye kũnyuva mĩsoa ĩla ũkwenda Mbivilianĩ ya kĩthyomo kya ala matewʼaa.
Dmytro na Vita nĩ asyai matewʼaa ĩndĩ syana syoo nĩsyĩwʼaa. Sisya wone ũndũ mũsyĩ woo ũtethekete nũndũ wa kwĩloela Mbivilia ya kĩthyomo kya ala matewʼaa kĩla mũthenya.
Vitio imanyĩasya Mbivilia. Ngũsĩ sya Yeova nĩsyumĩtye vitio kĩthyomonĩ kya ala matewʼaa ila itetheesye andũ kũelewa, na kũtũmĩa ũtao ũla wĩ Mbivilianĩ kwondũ wa . . .
Kwĩmanyĩsya Mbivilia na mũndũ mwenene. Ĩmanyĩsye ũvoo ũla wĩ Mbivilianĩ ũtũmĩĩte kĩthyomo kya ala matewʼaa kwosana na ũtonyi na ĩvinda yaku ũtetheewʼe nĩ mũndũ ũngĩ. Kũlya ũtetheewʼe kwĩmanyĩsya Mbivilia vate ndĩvi.
Jeson Senajonon ekalaa nthĩ ya Philippines. Sisya wone ũndũ kwĩmanyĩsya Mbivilia kwamũtetheeisye kwĩthĩwa na ngwatanĩo ya vakuvĩ vamwe na Ngai.
Mario Antúnez aĩ mũtongoi wa ndĩni nthĩ ya Honduras. Ĩmanyĩsye wone ũndũ wakwatie mosũngĩo ma makũlyo make kuma Mbivilianĩ, o tondũ ũeleetye ngewanĩ yake yĩ na kyongo, “Naĩ na Makũlyo Maingĩ Mũno.”
Maũmbano na maũndũ ma mwanya. Ĩũlũ wa nthĩ yonthe,twĩthĩawa na ikundi na tũkundi twa ithyomo sya ala matewʼaa, vala ala matewʼaa makomanaa kwondũ wa ũthaithi kĩla kyumwa. O na ĩngĩ, kĩla mwaka nĩtwĩthĩawa na maũndũ ma mwanya makonetye kwĩmanyĩsya Mbivilia tũtũmĩĩte kĩthyomo kya ala matewʼaa. Maũmbanonĩ asu, ala methĩawa mayĩalyũla kĩthyomo kya ala matewʼaa nĩmakwataa moko ma ala matekwĩwʼa kana kwona nĩ kana wĩthĩe no makwatye kĩla meũtavwʼa. O na ĩngĩ, nĩtumasya mavuku ma mũandĩko wa ala matonaa vate ndĩvi.
Mantha kĩkundi kĩla kĩ vakuvĩ naku.
Ĩmanyĩsye ĩũlũ wa maũmbano maitũ manene na ma mũthyũlũlũko ala twĩkaa kĩla mwaka.
Endaa Ũmbanonĩ wa Kũlilikana Kĩkwʼũ kya Yesũ, ũla nĩwʼo ũndũ wa mwanya vyũ twĩkaa kĩla mwaka.
José Luis Ayala ekalaa Mexico. Asyaiwe atekwĩwʼa na ĩtina aeka kwona. Ĩmanyĩsye wone ũndũ watetheeiwʼe atwʼĩka mwalimũ mũseo wa Mbivilia.
a Yeova nĩyo ĩsyĩtwa ya Ngai. (Savuli 83:18) Sisya kĩlungu kĩ na kyongo “We Yeova Nũũ?”
No Wendeewʼe Nĩ Ii
ŨNDŨ MĨVOTHI YAKU ĨTŨMĨAWA
Ala Matewʼaa Mayũlĩte
Twĩ na vitio sya ithyomo mbee wa 100 sya ala matewʼaa! Vitio isu syumĩthawʼa na ikanyaĩĩkwʼa ata?
ĨŨLŨ WITŨ
Kũlya Ũthokewe
Kwata ũsũngĩo wa ĩkũlyo yĩkonetye Mbivilia, kana wĩmanyĩsye mũnango ĩũlũ Ngũsĩ sya Yeova.
