Ũndũ ũmwe Ngũsĩ sya Yeova ineteelete na mea maingĩ vyũ mwaka ũũ nĩ kumwʼa kwa Kĩlungu kya 1 kya vitio Ũvoo Wʼonthe Ĩũlũ wa Ũtavanyʼa wa Yesũ. Andũ milioni mbingĩ nĩmakĩloele. Kĩlungu kĩu nĩkyo kya mbee katĩ wa ilungu 18! Nĩ maũndũ meva ana-a-asa na eĩtu-a-asa mekĩte nĩ kana vitio isu iatĩanĩe ilekotiwe, na we ũkwatĩte mbau ata wĩa ũsu?

 Ilungu mbingĩ sya vitio Ũtavanyʼa wa Yesũ syĩlekotiwa ovisinĩ wa ũvonge wa Australasia, na kĩla ĩvinda meũlekoti, vethĩawa na vakuvĩ andũ 50 nginya 80. a Ala meũlekotiwa na ala meũmalekoti nĩmanengawa lĩu wa mũthenya, na wa wĩoo. Ala me Mũvĩanĩ wa Kũũngamĩa Lĩu methĩawa meekie ũtwi wa kĩla makaua kwĩ tene. Mwĩĩtu-a-asa wĩtawa Esther ũla ũthũkũmaa Mũvĩanĩ ũsu aĩtye: “Tũthooaa lĩu kwa atandĩthya me kĩvathũkanyʼo nĩ kana tũkwate syĩndũ nzeo na thooa ũla mũseo vyũ. Na kĩla ĩvinda nĩtũvĩndũaa kĩthimo kya lĩu ũla tũkũua nĩ kana tũikawanange.” Kĩla mũthenya, tũtũmĩaa vakuvĩ ndola inya sya Amelika kũĩthya mũndũ ũmwe.

 Eka o lĩu, ala meũlekotiwa na ala meũmalekoti nĩmethĩawa na vata wa kũsũvĩwa. Mo masũvĩanawa na kyaũ? Mavinda maingĩ Nthĩ ya Australia kwĩthĩawa na muutĩa na sua, na sua ya kũu yĩ kyeni kĩthũku mũno. Kwoou nĩ kana onthe masũvĩanwe na sua yĩu ũndũ vatonyeka na ũyĩthĩa mainanowʼa nĩ ũvyũvu, ana-a-asa na eĩtu-a-asa me kĩthito nĩmambaa maeema na makaseũvya kũndũ andũ matonya kũkwata muunyĩ, makaĩkĩĩthya kwĩ mauta ma kũsiĩĩanĩa andũ na kyeni kya sua (sunscreen), myavulĩ, na kĩwʼũ. Mwana-a-asa wĩtawa Kevin, ũla ũthũkũmanaa na Mũvĩa wa Kũlekoti Vitio na Syĩndũ sya Kwĩthukĩĩsya, aĩtye: “Ana-a-asa na eĩtu-a-asa aingĩ katĩ wa ala matethasya mawĩa asu methĩawa me ala maendaa kũtetheesya wĩa Mbetheli. Matethasya mawĩa asu na angĩ maingĩ menyivĩtye na me atanu. Mwa tũyĩsa kwĩanĩsya wĩa ũũ keka ti mo!”

 Tũlungu tũmwe twa vitio tũyĩsa kuma nesa vyũ, o na tũkalekotiwa ovisinĩ wa ũvonge, kũndũ nza kana nthĩnĩ wa studio. Mavindanĩ ta asu, tũlekotiaa kĩsionĩ kĩ vaasa na ovisi wa ũvonge. Nĩ kana tũlekoti kũndũ kũilye ũndũ isio sya tene ila iwetetwe Mbivilianĩ syailyĩ tũte kwonanyʼa syĩndũ ta ituĩ sya sitima, lami, na nyũmba sya matukũ aa, kaingĩ ala meũlekotiwa na ala meũmalekoti malasimĩkaa kũthi isionĩ syĩ vaasa vyũ na taoni. Nũndũ wa ũu, wĩthĩaa no nginya ngũa, syĩndũ ila ikwendeka ĩvindanĩ ya kũlekoti, o vamwe na mĩio ya kũlekoti yũmbanwʼe nesa, ĩtwawe kĩsionĩ kĩla kĩũlekotiĩwa, na ĩyĩiwa nesa. Wĩa wa kũlekoti ũtanambĩĩa, atetheesya ma ala maũngamĩe wĩa ũsu nĩmaĩkĩĩthasya kana ve na tũtuma (generators), kĩwʼũ kĩtheu kya kũnywʼa, na kũndũ kwa kwĩtethya. Ala meũlekotiwa na ala meũmalekoti makomelaa mĩsyĩ kwa Ngũsĩ ingĩ, tulelanĩ sya ngalĩ (trailer), motelinĩ kana nyũmbanĩ syakĩtwe na mbwaũ.

 Kũlekotia vaasa na ovisi wa ũvonge kũkuaa mbesa mbingĩ, ĩvinda yĩasya, na kwĩ mĩnoo mingĩ. Kwoou twĩ 2023, Nzama Ĩla Ĩtongoesye nĩyavĩtũkĩthisye mũvango wa kũthooa ioo sya kwonanasya vitio sya ndola milioni 2.5 sya Amelika, ila itumaa mũndũ oneka ta wĩ vandũ ve kĩvathũkanyʼo na vala wĩĩ. Tekinolongyi ĩsu ĩtũmĩaa ioo iũtuma visa syĩthĩwa syenekee nesa vyũ na kyeni kĩũtuma kĩla kĩkwoneka ioonĩ isu kĩkala ta vitio ĩendeee kũlekotiwa vandũ nza. Nũndũ wa ũu, nĩtwĩvathanaa na ngalama mbingĩ. Mwana-a-asa wĩthĩawa Kamitiinĩ ya Ovisi wa Ũvonge wa Australasia wĩtawa Darren aĩtye: “Kũtũmĩa ioo isu syonanasya vitio kũtumaa ala meũlekotiwa matanoa mũno na nĩkũtetheeasya ala meũlekoti kũtũngĩlĩĩla tũlungu tũmwe. Kwa ngelekanyʼo, tũkatwʼĩka twĩlekotia vandũ nza, twĩthĩwa na ndatĩka o nini sya kwosa vitio ya sua yĩithũa yĩtanamba kũthelekelya. Ĩndĩ tũitũmĩa ioo isu, no twonanyʼe sua yĩithũa mavinda maingĩ ũndũ tũkwenda nginya tũkesa kwosa vitio ĩla tũkwenda.”

 Kĩla ĩvinda tũũlekoti kĩlungu kĩmwe kya vitio Ũtavanyʼa wa Yesũ, andũ maana maingĩ nĩmendekaa nĩ kana malekotiwe, na angĩ aingĩ nĩmatetheeasya wĩanĩ wa kũlekoti. Mo mewʼaa ata masũanĩa kĩthito kingĩ kĩla ana-a-asa na eĩtu-a-asa mekĩaa nĩ kana mamathĩnĩkĩe?

 Mwĩĩtu-a-asa wĩtawa Amber, ũla waendie kyalo kya mbee wa kĩlomita 700 (maili 435) kuma kwake Melbourn nginya Australia nĩ kana atetheesye wĩanĩ ũsu, aandĩkie ũũ: “Kuma navika kĩwanzanĩ kya ndeke oou, ana-a-asa ma Mbetheli nĩmeethĩĩtwe mainzũvĩa nesa. Aingĩ moo nĩmanthokasya kwondũ wa lĩu kana kyai. Na yĩla twĩ vala tũũlekotia, kĩla ũmwe nĩwatumaa nĩwʼa nĩ mwĩanĩe na nendetwe. Mwa nĩnakwatie moathimo maingĩ savalĩnĩ ĩsu. O na ndyaaona wĩ mũio!”

 Nake Derek ũmwe wa ala maseũvasya vitio isu. Aĩtye: “Kuma twambĩĩa wĩa ũu, mĩvĩa mingĩ mũno nĩyĩthĩĩtwe ĩitũkwata mbau. Nĩndũngaa mũvea kwĩthĩwa na ana-a-asa na eĩtu-a-asa matũmĩaa ĩvinda, malĩ, na vinya woo wĩanĩ ũũ. Nĩmethĩawa meyumĩtye vyũ kũtethya wĩa na kwĩka angĩ nesa. Vate nzika, Yeova nũtũathimĩte ithyonthe. Nĩ na mũĩkĩĩo kana nũtanĩthawʼa nĩ wĩa ũla tũtethasya, na ũndũ ũla wa vata vyũ nĩ kana nũtanĩthawʼa nĩ ũndũ tũũtethasya.”

 Nĩ mũvea mũno nũndũ wa kũkwata mbau wĩa wa kũseũvya vitio ii na mĩvothi yaku ya ngoo ya kwenda, o vamwe na ĩla umasya kwĩsĩla donate.pr418.com.