Matukũ aa Ngũsĩ sya Yeova ikwataa lĩu mwingĩ wa kĩ-veva kwĩsĩla Indaneti. Ĩndĩ kwĩ kũndũ kwingĩ ana-a-asa maitũ matatonya kũĩvĩa Indaneti. Angĩ mekalaa kũndũ Indaneti yũkaa ĩithi, kana ũkethĩa yĩ nthĩ mũno. Namo angĩ kũla maĩ kũi Indaneti o na vanini.

 Ĩndĩ yu ana-a-asa na eĩtu-a-asa aingĩ no maumye mavuku na vitio o na mate na Indaneti! Ũu ũtonyekete ata?

 Ikundi ila syĩ kũla kwĩ thĩna wa Indaneti itũmĩawa kasandũkũ ketawa JW Box. Kasandũkũ kau kethĩawa na kaindo ka Wi-Fi kathooetwe kambunĩnĩ, vulongulamu (software) ĩseũvĩwʼe Mbetheli nĩ Mũvĩa wa Kombiũta, na mavuku na vitio ila syĩ jw.org. Ngalama ya kasandũkũ kamwe nĩ vakuvĩ ndola 75 sya Amelika.

 Yĩla ana-a-asa na eĩtu-a-asa me Nyũmbanĩ ya Ũsumbĩ mavingũĩaa Wi-Fi nĩ kana makwatanyʼe syĩndũ ta simũ na JW Box, na ĩndĩ mayumya mavuku na vitio. O na ala matũmĩaa simũ ngũũ no maikwatanyʼe na kasandũkũ kau. Ĩndĩ nata ethĩwa kĩkundi kĩ kũndũ kũte Indaneti? Vekawa ata nĩ kana kasandũkũ kau kethĩwe na mavuku na vitio ila sya mĩtũkĩ? Ovisi wa ũvonge wĩkalaa ũitũmĩa ikundi isu kaindo ketawa USB, na thooa wa kamwe nĩ ta ndola 4 sya Amelika. Kaindo kau kethĩawa kekĩĩtwe syĩndũ ila syĩla kwĩkĩwa jw.org, na kwoou ikundi syakakwata, ana-a-asa no masyume matũmĩĩte JW Box.

 Ko kasandũkũ kau kamatethetye ata? Mwana-a-asa wĩ na mũsyĩ wĩtawa Nathan Adruandra, ũla wĩkalaa nthĩ ya Democratic Republic of Congo, aĩtye ũũ: “Naĩ natatie kaingĩ kumya ĩla ndulama yĩtawa ‘We Yeova, . . . Nue Nĩkwatĩtye’ na Lilikanai Mũka wa Loto. Ĩndĩ vai ĩvinda syaaĩtĩkĩla kuma, na kĩu neewʼaa kĩindulya. Ĩndĩ yu no nĩsyumye simũnĩ yakwa, na kĩu nĩkĩtũtetheeasya kũmanyĩsya syana sitũ nesa.”

 Mwana-a-asa ũmwe wa Nigeria ũtetheeasya ikundi kũmanya ũndũ itonya kũtũmĩa JW Box easya: “Ana-a-asa monaa kasandũkũ ka JW Box ke mũthĩnzĩo wa mwanya manengetwe nĩ Yeova. Matanaa mũno nũndũ yu maumasya na mĩtũkĩ mavuku na vitio ila syĩ nthĩnĩ wa Syĩndũ Ila Tũtũmĩaa Mũno Kũmanyĩsya.”

 Tũsandũkũ mbee wa 1,700 nĩtũtũmĩtwe Africa, Oceania, na South America. Mĩvango nĩendeee kwĩkwa tũtũmwe ikundinĩ ingĩ mbingangĩ. Ngalama ya tũsandũkũ tũu ĩĩvĩawa ata? Tũtũmĩaa mĩvothi ĩla yumawʼa kwondũ wa wĩa wa nthĩ yonthe, na aingĩ maumasya mĩvothi ĩsu matũmĩĩte donate.pr418.com. Nĩ mũvea mũno nũndũ wa ũlau waku wa kumya mĩvothi.