Nzama Ĩla Ĩtongoesye yĩ na mea ma kũtũmĩa mĩvothi ĩla yumĩtwʼe kwaka myako ya Ũsumbĩ nĩ kana ĩtũtetheesye kũendeea na wĩa wa kũtavanyʼa. Kwa ngelekanyʼo, mwakanĩ wa ũthũkũmi wa 2023, mbee wa ndola 500 nĩsyatũmĩiwe nĩ mĩvĩa ya mĩao ya movisi ma ũvonge ma Ngũsĩ sya Yeova kũthooa, kwaka, kũtũngĩĩa, na kũsũvĩa Nyũmba sya Ũsumbĩ vamwe na myako ya maũmbano manene ĩũlũ wa nthĩ yonthe. a Mbesa imwe katĩ wa isu nĩ ila itũmĩawa nĩ ikundi ĩũlũ wa nthĩ yonthe kũsũvĩa Nyũmba syoo sya Ũsumbĩ.

 O na ĩngĩ, mĩvothi ĩla yaumwʼa nĩtetheeasya kwaka na kũsũvĩa myako ya movisi ma ũvonge, ala matetheeasya kũvangĩthya na kũkwata mbau wĩa wa kũtavanyʼa ĩũlũ wa nthĩ. Nĩtũolangĩte wĩa ũla ũtethawʼa movisinĩ ma ũvonge nĩ kana wĩthĩe mbesa mbingĩ nĩsyatũmĩwa kũkwata mbau wĩa wa kwaka na kũtũngĩĩa Nyũmba sya Ũsumbĩ na sya maũmbano manene. O vamwe na ũu, mbesa mbingĩ nikwendeka kwondũ wa kũtũngĩĩa, kũseũvĩĩsya, kana kũthamĩĩsya movisi ma ũvonge vandũ vangĩ. Nĩkĩ maũndũ asu nĩ ma vata? Movisi ma ũvonge makwataa mbau ata wĩa wa vata wa kũtavanyʼa? Ekai twone.

 Movisi maingĩ ma ũvonge maakiwe mbee wa myaka 30 kana 40 mĩvĩtu! Mwana-a-asa wĩtawa Nicholas, ũla ũthũkũmanaa na Mũvĩa wa Nthĩ Yonthe wa Kũvangĩthya na Kwaka Myako ya Ũsumbĩ, aĩtye: “O na myako ĩla ĩsũvĩĩtwe nesa nĩkũaa na ĩyambĩĩa kwĩthĩwa na mathĩna manene o ũndũ ĩvinda yĩvĩtĩte. Ĩndĩ yĩla twamĩtũngĩĩa, kĩu nĩkĩtumaa yĩkala ĩvinda yĩasanga.”

 O na ĩngĩ, Mbetheli ila syĩyĩkĩaa maũndũ maingĩ nikwendeka syĩke moalyũku nĩ kana wĩthĩe nĩsyendanĩtye na mavata ma ũseũvyo. Kuma movisi maingĩ ma ũvonge maakwa, ũtalo wa atavanyʼa nĩwongelekete mũno ĩũlũ wa nthĩ. Nĩ kana tũkwate mbau wongeleku ũsu, nĩvendekaa andũ aingangĩ meyumye kũthũkũma movisinĩ asu. Nũndũ wa ũu, movisi ma ũvonge ala mbeenĩ monekaa me manene yu nĩ manini mũno!

 Ũndũ ũngĩ wa vata nĩ kũĩkĩĩthya athũkũmi nĩ asũvĩĩku. O ũndũ mũthya wa mĩthenya ĩno ya mũminũkĩlyo ũthengeee, nowʼo tũkũendeea kũkwatwa nĩ mĩisyo mingangĩ, ta ithingitho sya nthĩ. (Luka 21:11) Ĩndĩ nũndũ wa kũtũmĩa nzĩa nzaũ sya kwaka yĩla tũendeee kũtũngĩĩa myako ya movisi ma ũvonge, kĩu nĩkĩtumaa ala meũthũkũma vo methĩwa me asũvĩĩku. O na ĩngĩ, nũndũ wa moalyũku asu nĩvethĩĩtwe ve laisi kwa ana-a-asa kũtũmĩa myako ĩsu yĩla maendeee kũvangĩthya wĩa wa kumya ũtethyo ĩvinda ya mĩisyo na kũendeea kũkwata mbau wĩa wa kũtavanyʼa o na ĩtina wa mĩisyo kumĩla.

 Mwakanĩ wa ũthũkũmi wa 2023, Nzama Ĩla Ĩtongoesye nĩyavĩtũkĩthisye movisinĩ ma ũvonge 43 matũngĩĩwe. Kĩu kĩonanyʼa kana vakuvĩ nusu ya movisi ma ũvonge onthe ĩũlũ wa nthĩ, ve mwako waendeee. Kwoona ngelekanyʼo sya mawĩa amwe maendeee.

 Angola. Mwana-a-asa wa kamitii ya ovisi wa ũvonge wa Angola wĩtawa Matt aĩtye: “Twĩ na kĩanda kya kwona wathani ũla ũwetetwe nthĩnĩ wa Akai 2:7 ũianĩa kwa nzĩa ya mwanya. Kwa ĩvinda ya myaka ĩkũmi ũu mĩvĩtu, nĩtwonete wongeleku wa 60 ĩũlũ wa 100 wa atavanyʼa! Nĩ kana tũtonye kũtetheesya atavanyʼa asu, mũsyĩ wa Mbetheli nĩwongelekile kũndũ kũtatũ. O na ũu wĩ o vo, vala twekalaa vaĩ vanini na tũyaĩ tũtonya kũthokya andũ aingĩ moke kũthũkũmĩa vau ũndũ twendaa. Kĩu kyatumie ala mathũkũmaa Mbetheli matethya wĩa mũito na matũmĩa ĩvinda yingĩ kũthũkũma wĩa ũla manengetwe.”

 Ana-a-asa nĩmanengiwe kĩanda kya kũsisya ũndũ matonya kũnenevangya ovisi ũsu. Mbeenĩ, twoona nzĩa ĩla yaĩ laisi na nzeango nĩ kũtũngĩĩa ovisi ũla waĩ vo. Ĩndĩ ĩtina wa kwĩka ũkunĩkĩli, nĩtwoonie vate na vata wa kwananga mĩvothi tũitũngĩĩa ovisi ũsu. Vandũ va ũu, nĩtwatwie kũthooa na kũtũngĩĩa mwako waĩ vau vakuvĩ. Ũla Matt wawetwa aendeee kwasya: “Yĩla mũvango ũsu wa kũthooa na kũtũngĩĩa mwako ũsu waweteiwe ya mbee kamitiinĩ ya ovisi wa ũvonge, twoonaa ũtatonya kwĩthĩwa wĩ mũseo ta ũndũ ithyĩ ene tũtonya kwaka. Ĩndĩ yu nĩtwonete ũndũ mwako ũsu wĩanĩĩtye nesa vyũ vata ũla twaĩ nawʼo. Yeova nũathimĩte ũtwi ũsu.”

 Nĩvatonyeka Mbetheli ya Angola ĩkenda kũnenevangwʼa ĩvinda yũkĩte. Ĩndĩ mwako ũsu mweũ, nyũmba sya kũkoma syĩ vau Mbetheli itonya kwĩsa kũvĩndũwa, na ingĩ sya kũkomboa syĩ vau vakuvĩ nitumĩte ovisi wa ũvonge ũkwata mbau wĩa wa kũtavanyʼa ũla ũendeee kwongeleka na mĩtũkĩ.

 Japan. Ovisi wa ũvonge wa Japan waakiwe myaka mbee wa 40 mĩvĩtu na ũyaaĩsa kũtũngĩwa kũndũ kwingĩ. Ana-a-asa nĩmekĩĩte kĩthito kingĩ nĩ kana masũvĩe Mbetheli ĩsu, ĩndĩ o na vailye ũu, mwako ũsu ũtũmĩĩtwe kwa ĩvinda yĩasa kũte ũndũ wavangĩĩwe. Nũndũ wa ũu, nĩyĩendeee kũtũngĩĩwa kũndũ kwingĩ mũno.

 Kwa ĩvinda ya myaka kauta maũndũ Mbetheli nĩmavĩndũkĩte. Tũtavikĩte mwaka wa 2015, athũkũmi ma Mbetheli mayaĩ na vata wa kwĩyĩuĩa. Kwoou nyũmba mbingĩ sya Mbetheli ya Japan syaakĩtwe syĩ na o kaliko kanini. Ĩndĩ yu athũkũmi ma Mbetheli nĩmo mũno mũno meyĩuĩaa. Yu nĩvongeletwe ĩiko ĩnenange nyũmbanĩ sya kwĩkala nĩ kana wĩthĩe ana-a-asa ma Mbetheli no maue mateũthĩnĩka. Mwĩĩtu-a-asa ũthũkũmaa Mbetheli ya Japan wĩtawa Kumiko aĩtye, “Kwĩthĩwa na ĩiko nĩkũtumĩte nĩwʼa ta nĩ mũsyĩ na nĩkũndetheesye kũkwata mbau vyũ mĩvango myeũ ĩla ĩkwĩkwa Mbetheli.”

 Wĩa ũla ũtethawʼa Mbetheli ya Japan nũkwataa mbau kwa nzĩa nene mũno wĩa wa nthĩ yonthe. (Mathayo 28:19, 20) Mbetheli ĩsu nĩ ĩmwe katĩ wa ilĩ ila itumbĩthasya Mbivilia yĩ nima. Kwoou wĩa ũmwe mũnene ũendeee kũtethwʼa nthĩnĩ wa Mbetheli ĩsu nĩ kũĩkĩĩthya ve na mũtambo wa kũnywʼa kĩtoo na kũkolanyʼa tũthangũ tũla tũtilĩtwe nĩ kana onthe ala mathũkũmaa vala vatumbĩthĩawʼa mavuku mekale me asũvĩĩku. Kũthooa na kwĩkĩa mũtambo ũsu kwatũmĩie vakuvĩ ndola milioni ĩmwe, ĩndĩ nũĩkĩĩthasya kana ovisinĩ ũsu wĩa wa kũtumbĩthya na kũnyaĩĩkya lĩu wa kĩ-veva nĩwaendeea.

 Ana-a-asa nĩmaĩkĩĩthisye kana nĩmaendeea kumĩthya Mbivilia o Mbetheli ĩendeee kũtũngĩĩwa. Mwana-a-asa wĩtawa Trey, ũla wĩthĩawa kamitiinĩ ya ovisi wa ũvonge wa Japan, aĩtye: “Mbetheli ĩno ĩendeee kũtũngĩĩwa, ũseũvyo witũ nĩwaendeee kumĩthya Mbivilia kwa ithyomo mbingĩ, na vaĩ na vata wa ingĩ mbingĩ ĩũlũ wa nthĩ yonthe. Mĩvĩa yĩ kĩvathũkanyʼo na mavundi nĩmaaĩlĩte kũthũkũma me ngwatanĩo nĩ kana mamanye yĩla masinĩ nzaũ syĩkwĩkĩwa, na yĩla mavuku meũtumbĩthwʼa.” O vamwe na mawetu asu, vakuvĩ Mbivilia 220,000 nĩsyaumĩthawʼa kĩla mwei katĩkatĩ wa Mwei wa 3 na Mwei wa 8, 2023, na yĩu nĩ ĩvinda yĩla wĩa mwingĩ waendeee kũtethwʼa vala mavuku matumbĩthĩawʼa. Na wĩa ũsu watethiwʼe vate mbesa mbingangĩ iũtũmĩwa.

 Ũndũ ũngĩ ũtumĩte Mbetheli ya Japan yĩthĩwa na vata wa kũtũngĩĩwa nĩ kũĩkĩĩthya mwaki watũmĩwa mũnini. Syĩndũ ila itũmĩaa kyeni kya syũa kumya mwaki (solar panels) nikwĩkĩwa ingĩ nzaũ, ila iũtuma ndola 120,000, ila inatũmĩawa kĩla mwaka kwondũ wa mwaki, isũvĩwa. O na ndĩlĩsya nzaũ syĩ na ioo itatũ ikwatanĩtwʼe nikwĩkĩwa, ila iũtũmĩa mwaki mũnini, na kĩu nĩkĩũsũvĩa vakuvĩ ndola 10,000, ila inatũmĩawa kĩla mwaka. O na kau kwĩkĩa syĩndũ isu na ndĩlĩsya isu nĩkũũtũmĩa mbesa mbingĩ, nĩvatonyeka ikasũvĩa mbee wa ndola milioni 3.5, ila inatũmĩawa kwondũ wa mwaki, iitwʼĩka kana nĩsyesa kwanangĩka. O na ĩngĩ, nĩũsũvĩa mawĩthyũlũlũko.

 Movisi aa elĩ meonanyʼa nĩ wĩa wĩana ata ũkwenda kũtethwʼa nĩ kana Mbetheli sitũ iendeee kũkwata mbau wĩa wa kũtavanyʼa. O na ũu wĩ o vo, wĩa ũsu ti mũthelu. Mwana-a-asa wĩtawa Aaron, ũla ũthũkũmanaa na Mũvĩa wa Nthĩ Yonthe wa Kũvangĩthya na Kwaka Myako ya Ũsumbĩ, aĩtye, “Ana-a-asa nĩmatethetye wĩa mwingĩ, ĩndĩ ve na wĩa ũngĩ mwingĩ wa kũtethya.” Wĩa ũsu ũkeanĩwʼa ata? Aendeee kwasya: “Eka mĩvothi ya ũlau ĩla yũngamĩaa wĩa ũsu wa vata ũendeee, nĩtũũtũngĩa mũvea onthe ala meeyumisye na ala maendeee kwĩka mĩvango makwate mbau wĩa ũsu ĩvindanĩ yũkĩte. Ana-a-asa nĩmaendeee kwonanyʼa nesa vyũ kwa kwĩyumya na kumya mĩvothi kana Yeova nũendeee kũathima wĩa ũsu.”—Savuli 110:3.

 Wĩa witũ wa kwaka na kũtũngĩĩa myako ũtetheeawʼa na mĩvothi ya ngoo ya kwenda, na mingĩ yayo yumawʼa kwĩsĩla donate.pr418.com. Nĩ mũvea mũno nũndũ wa ũlau waku.