Nthĩnĩ wa Livoti ya 6 ya Nzama Ĩla Ĩtongoesye ya 2020, Mwana-a-asa Geoffrey Jackson nĩwaumisye ũvoo wa kwĩkĩa vinya mũno. Ũvoonĩ ũsu aisye: “Ĩvinda yĩ navu ĩtina, kũkwata lĩu wa kĩ-veva kwĩsĩla simũ tũnoonaa wĩ ũndũ wĩ vinya mũno. Ĩndĩ yu twĩsengʼa maũndũ methĩwa mailye ata ĩvindanĩ yĩĩ kwĩ na ũwau wa kũkwatanwʼa ta keka kũi syĩndũ ta JW Library. Kwa myaka mingĩ, Yeova ethĩĩtwe aendeee kũtũmbanyʼa kwondũ wa ĩvinda yũmũ ta yĩĩ.” We nũkwĩtĩkĩlana na ndeto isu?

 Yeova ethĩĩtwe aitũmbanyʼa ata? Nĩ wĩa wĩva watethiwʼe nĩ kana vulongulamu ya JW Library ĩseũvwʼe, na nĩ maũndũ meva mekawa nĩ kana vulongulamu ĩsu ĩthũkũme nesa na ĩyaĩlangwʼa?

 Mweinĩ wa 5, 2013, Nzama Ĩla Ĩtongoesye nĩyakũlilye mũvĩa wĩ ovisinĩ ũla mũnene wĩtawa MEPS Programming ũseũvye vulongulamu yĩ na ĩla Mbivilia ya New World Translation yeekiwe moalyũku. Mwana-a-asa ũthũkũmaa mũvĩanĩ ũsu wĩtawa Paul Willies aisye: “Kũvika vau, tũyaĩ twaaumya vulongulamu o na ĩmwe ya simũ (mobile app) na tũkamĩkĩa vala vulongulamu isu syĩkĩawa (app store). Ĩndĩ nĩtwaseũvisye kĩkundi kya andũ meana ũna, twaũngamya mawĩa amwe twaendeesye, na twatetheanĩsya na mĩvĩa ĩngĩ kũsola na kũseũvya vulongulamu ĩsu vamwe na maũndũ ala me nthĩnĩ wayo. Nĩtwamũvoyaa Yeova tũteũtĩĩa, nake nĩwatũtetheeisye kũseũvya vulongulamu ĩsu. Myei o ĩtano kuma twambĩĩa kũmĩseũvya, nĩyaumiwʼe ũmbanonĩ wa kĩla mwaka!”

 Wĩa ũla ũngĩ waaĩle kũtethwʼa nĩ kwĩkĩa syĩndũ mbingangĩ na sya ithyomo mbingangĩ vulongulamunĩ ĩsu. Tũivika Mwei wa 1, 2015, ũtalo mũnene wa mavuku ma Kĩsũngũ ala twaĩ namo nĩmeekĩĩtwe, na ĩtina wa o myei thanthatũ, andũ maĩ matonya kumya mavuku asu na ithyomo ingĩ maana maingĩ.

 Kuma ĩvinda yĩu, ana-a-asa nĩmaseũvĩĩsye vulongulamu ĩsu kwa nzĩa syĩ kĩvathũkanyʼo, makongela vitio, makekĩa syĩndũ syonthe ila itũmĩawa maũmbanonĩ ma kĩkundi vandũ vamwe, na maketĩkĩlya andũ makwate maũndũ ala me Ĩvukunĩ ya Ũkunĩkĩli matina mĩsoa ya Mbivilia.

 Vulongulamu ya JW Library ĩvingũawa kĩla mũthenya syĩndũnĩ ta simũ milioni 8, na mbee wa milioni 15 kĩla mwei! Ĩndĩ nĩ kyaũ kĩkawa nĩ kana vulongulamu ĩsu ĩendeee kũthũkũma nesa simũnĩ? Mwana-a-asa Willies aĩtye: “Vai ĩvinda vulongulamu ya simũ yĩsaa kũtwʼĩka nĩyathela kũseũvĩĩwʼa vyũ. Twĩkalaa twongelete syĩndũ nzaũ nĩ kana tũmyaĩlangye yĩthĩwe laisi kũtũmĩa. Na nũndũ vulongulamu ila itumaa syĩndũ ta simũ ithũkũma nesa (operating systems) syĩkalaa iiseũvĩĩwʼa, no nginya o naitũ twĩkale tũvĩndũĩte vulongulamu yitũ nĩ kana yĩendeee kũthũkũma nesa syĩndũnĩ isu. O na ĩngĩ, o ũndũ ũtalo wa mavuku na vitio ila syĩ JW Library waendeea kwongeleka, wĩthĩaa no nginya twaĩlangye na tũiseũvĩĩsya software sitũ.” Yu tũũneena, nthĩnĩ wa JW Library ve na mavuku ta 200,000 na vitio na syĩndũ sya kwĩthukĩĩsya mbee wa 600,000, tũtalĩte ithyomo syonthe!

 Eka o kombiũta, ve syĩndũ ingĩ syendekaa nĩ kana vulongulamu ĩsu ĩendeee kwaĩlangwʼa. No nginya tũĩvĩe laĩsenzi iana ũna sya kũtũmĩa vulongulamunĩ sya kombiũta. Laĩsenzi ĩmwe tu yĩvĩthawʼa ndola 1,500 sya Amelika kĩla mwaka. Eka ũu, mũvĩa wa MEPS Programming ũtũmĩaa vakuvĩ ndola 10,000 sya Amelika kĩla mwaka kũĩva kambuni syĩ kĩvathũkanyʼo ila iseũvasya syĩndũ ila tũtũmĩaa kũĩkĩĩthya kana vulongulamu yitũ nĩyaendeea kũthũkũma nesa simũnĩ, tambuletinĩ, na kombiũtanĩ nzaũ.

 Vulongulamu ya JW Library nĩtumĩte mbesa ila itũmĩawa wĩanĩ wa kũtumbĩthya, kũkwatanyʼa, na kũtwaa mavuku kũndũ kwĩ kĩvathũkanyʼo ioleka mũno. Kwa ngelekanyʼo, kwasũanĩa kavuku ka Kũneenea Maandĩko Kĩla Mũthenya. Mwakanĩ wa 2013, twatumbĩthisye tũvuku tũu vakuvĩ milioni 12. Ĩndĩ mwakanĩ wa 2020 twatumbĩthisye ta milioni itano, o na kau ũtalo wa atavanyʼa nthĩ yonthe wongelekete na ta andũ 700,000 kuma mwaka wa 2013. Nĩkĩ vaĩ ũalyũku ũsu? Nũndũ ana-a-asa na eĩtu-a-asa aingĩ masomaa ĩandĩko ya kĩla mũthenya nthĩnĩ wa JW Library. a

 O na ĩngĩ, vulongulamu ya JW Library nĩtethetye andũ aingĩ ala mamĩtũmĩaa. Kwa ngelekanyʼo, Geneviève, ũla wĩkalaa Canada, aĩtye kana nĩmũtetheesye kwĩmanyĩasya ateũtĩĩa. Aĩtye: “Kũneena wʼo, ta keka nĩthĩawa naĩle kũmbanyʼa mavuku ala ngũtũmĩa kwĩmanyĩsya, mwa ndikwona ta nĩthĩwa ndyĩmanyĩsya kĩla kwakya. Ĩndĩ nũndũ wa vulongulamu ĩsu, nosaa tambuleti yakwa na ndyĩthĩa kyonthe kĩla ngwenda vo. Kwĩmanyĩsya ndeũtĩĩa nĩkũtumĩte mũĩkĩĩo wakwa ũlũlũmĩĩla na kũkatuma nĩmũthengeea Yeova mũnango.”

 O na ĩngĩ, vulongulamu ĩsu nĩtethetye mũno ĩvindanĩ yĩĩ ya ũwau wa COVID-19. Charlyn, ũla wĩkalaa Amelika, aĩtye: “Nĩkwĩthĩwa ũwau wa COVID-19 nũnyaĩĩkĩte nthĩ yonthe, ndyĩla kwona mavuku ala mela kumwʼa me matumbĩthye kwa ĩvinda ya mbee wa mwaka ũmwe yu. Ĩndĩ JW Library nĩtũnengete kyonthe kĩla tũkwenda nĩ kana mũĩkĩĩo witũ ũendeee kũlũlũmĩĩla, na nĩngũmũtũngĩa Yeova mũvea mũno nũndũ wayo.”

 Nake Faye, ũla wĩkalaa Philippines, nũeleetye ũndũ aingĩ matonya kwĩtĩkĩlana nawʼo. Aĩtye: “Maũndũ onthe ala nĩkaa nĩyake kĩ-veva me vulongulamunĩ ĩsu ya mwanya. Kĩndũ kya mbee kĩla nĩkaa kĩla kwakya nĩ kũlika vo nzome. Yĩla ngũtethya mawĩa ma mũsyĩ, nĩthukĩĩasya syĩndũ o vo. Novo nũmbanasya maũmbano. Novo nĩyũmbanĩasya kwĩmanyĩsya Mbivilia. Novo nĩloelaa vitio yĩla ndakwatene. Na novo nzomaa ilungu kana Mbivilia yĩla noletye lainĩ vandũ. Mwa vulongulamu ĩsu ndĩ maela.”

 Vangĩ vulongulamu ĩsu ĩtethetye mũno nĩ ũtavanyʼanĩ. Kwa ngelekanyʼo, ve ĩvinda mwĩĩtu-a-asa ũmwe wa Cameroon e ũtavanyʼanĩ wendaa kũtũmĩa ĩandĩko ĩna wonete mwĩĩtu-a-asa ũngĩ aiyĩtũmĩa syumwa mbũthũ syavĩtĩte. Ĩndĩ ndalilikanaa nĩ ĩandĩko yĩva. Aĩtye: “Ũseo nĩ kana nĩnalilikene ndeto imwe syĩ ĩandĩkonĩ yĩu. Kwoou nĩnavingũie vulongulamu ĩsu, nathi kwa Mbivilia, na namantha ndeto isu nalilikene. Vau kwa vau nĩnakwatie ĩandĩko yĩla namanthaa. Vulongulamu ĩsu nĩndetheeasya kũkwata mĩsoa mingĩ ĩla nũlawa nĩyo mavinda amwe.”

 Mĩvothi yaku ya ngoo ya kwenda ĩla wumasya ũtũmĩĩte nzĩa ila ieleetwʼe nthĩnĩ wa donate.pr418.com nĩyo ĩtumĩte tũseũvya vulongulamu ya JW Library, tũkamĩsũvĩa nĩ kana ĩthũkũme nesa, na tũkamyaĩlangya nĩ kana ana-a-asa na eĩtu-a-asa maitũ nthĩ yonthe matetheke. Nĩ mũvea mũno nũndũ wa ũlau waku.

1. Mwei wa 10, 2013—Vulongulamu ĩsu nĩyaumiwʼe yĩ na ĩla Mbivilia ya New World Translation yĩkĩtwe moalyũku

2. Mwei wa 1, 2015—Mavuku angĩ ma Kĩsũngũ nĩmekĩiwe, na maatĩĩwa nĩ ma ithyomo ingĩ maana maingĩ

3. Mwei wa 11, 2015—Nĩvongelilwe kĩndũ kya kwĩkĩa langi

4. Mwei wa 5, 2016—Syĩndũ syonthe ila itũmĩawa maũmbanonĩ ma kĩkundi nĩsyeekĩiwe vandũ vamwe

5. Mwei wa 5, 2017—Nĩvongelilwe kĩndũ kya kũtina nĩ kana ũandĩke

6. Mwei wa 12, 2017—Nĩvongelilwe Study Bible

7. Mwei wa 3, 2019—Nĩvongelilwe syĩndũ sya kwĩthukĩĩsya, vitio sya kũthaũka ũtaumĩtye, na Ĩvuku ya Ũkunĩkĩli

8. Mwei wa 1, 2021—Nĩyaĩlangilwʼe nĩ kana ĩvuku Tanĩa Thayũ Tene na Tene! yĩthĩwe ĩtonya kũtũmĩka nesanga