Ngũsĩ sya Yeova itwaĩĩasya mĩvango ya ũthaithi na ya kũnengane ũtethyo nthĩnĩ wa nthĩ mbee wa 200. Ĩndĩ no nthĩ ta 35 katĩ wa isu ikwataa mĩvothi ĩtoetye kũĩvĩa ngalama syasyo. Ngũsĩ ila syĩ nthĩ ila ingĩ ite na ũkwati mwingĩ syĩvĩaa ngalama syasyo ata?

 Nzama Ĩla Ĩtongoesye ya Ngũsĩ sya Yeova nĩsiasya kĩla ana-a-asa ĩũlũ wa nthĩ me na vata nakyo nĩ kana maendeee kũmũthaitha Yeova na maiendeea kũtavanyʼa ũvoo mũseo. Ĩtina wa ũu, mbesa nivangĩĩawa na ikatũmĩwa nesa. Ethĩwa ovisi wa ũvonge nĩwakwata mĩvothi mingĩ kwĩ ĩla ĩkwendeka kũthĩnĩkĩa mavata mawʼo, ĩla yatiala ĩtũmĩawa kũtetheesya nthĩ ila ite na ũkwati mwingĩ. Mũvango ũsu ũilye ta ũla wa Aklĩsto ma mbee, ala matetheanĩasya nĩ kana “vethĩwe na wĩananu.” (2 Akolintho 8:14) Matũmĩaa syĩndũ mbingĩ ila maĩ nasyo nĩ kana mavete kũnyivĩwa kwa Aklĩsto ala angĩ.

 Ana-a-asa maitũ ala makwatĩte mbesa kuma kwa movisi angĩ mewʼaa ata? Kwa ngelekanyʼo, nthĩ ya Tanzania, vala mbee wa nusu ya andũ makwataa silingi 200 kwa mũthenya, mbesa isu syatũmĩiwe kũtũngĩĩa Nyũmba ya Ũsumbĩ ĩla ĩtũmĩawa nĩ Kĩkundi kya Mafinga. Kĩkundi kĩu kyaandĩkie valũa kyaĩtye: “Kuma nyũmba yitũ yatũngĩĩwa, andũ aingĩ vyũ nĩmathaithaa naitũ! Twĩtũngĩa ũseũvyo wa Yeova mũvea mwingĩ, o vamwe na ana-a-asa nthĩ yonthe, nũndũ wa ũlau woo. Ũlau woo ũnatumie tũkwata vandũ vanake va kũthaithĩa.”

 Ũwau wa COVID-19 nũtumĩte ana-a-asa amwe nthĩ ya Sri Lanka methĩwa na ũnyivu wa lĩu. Imara Fernando na kamwana kake, Enosh, nĩ amwe katĩ wa asu. Ĩndĩ nũndũ wa mĩvothi kuma nthĩ ingĩ, nĩmakwatĩte ũtethyo. Maandĩkie ũũ kaatinĩ maseũvisye: “Twĩtũngĩa mũvea ana-a-asa ala manoonanisye nĩmatwendete ĩvindanĩ yĩĩ yũmũ. Nĩtũtanĩaa mũno kwĩthĩwa mũsyĩnĩ wa Yeova, na twĩendeea kũvoya nĩ kana Yeova atetheesye ana-a-asa maitũ onthe mĩthenyanĩ ĩno ya mũminũkĩlyo.”

 O na ana-a-asa na eĩtu-a-asa maitũ methĩwe mekalaa va, nĩmaumasya o kĩla me nakyo. Kwa ngelekanyʼo, Enosh nũneeseũvĩsye kasandũkũ kanini ka mĩvothi nĩ kana o nake aumasye mĩvothi ya kũtetheesya mĩsyĩ ĩla yĩ na vata. Guadalupe Álvarez ekalaa nthĩ ya Mexico, na o nake nĩwonanĩtye ũlau ta wa Enosh. Kĩsionĩ kĩla wĩkalaa, no andũ anini makwataa mũsaala ũtoetye, na no anini vyũ methĩawa na kĩndũ kĩtonya kũmaetee mbesa. Ĩndĩ we nĩwumasya o kĩla ũtonya. Mwĩĩtu-a-asa ũsu aandĩkie: “Nĩnĩmũtũngĩaa Yeova mũvea nũndũ wa ũseo wake na wendo wake. Nĩnĩsĩ kana mĩvothi yakwa nĩkwongelanwʼa na ya angĩ na ĩyĩthĩwa ĩtonya kũtetheesya ana-a-asa ala me na vata wa ũtethyo.”

 Movisi ma ũvonge ala matũmaa mbesa isionĩ ila syĩ na vata wa ũtethyo nĩmatanĩaa kwĩka ũu. Anthony Carvalho ethĩawa Kamitiinĩ ya Ovisi wa Ũvonge wa Brazil, na aĩtye: “Kwa myaka mingĩ, nĩtwendaa ũtethyo wa nthĩ ingĩ nĩ kana tũvote kũtwaĩĩsya wĩa wa Ũsumbĩ nthĩ yitũ. Nũndũ wa ũtethyo ũsu, nĩtwoonie wongeleku mũnene mũno. Yu maũndũ maitũ nĩ maseo, na twĩ na kĩanda kya kũtetheesya angĩ. Ana-a-asa maitũ nĩmasiasya ũndũ wĩa wa kũtavanyʼa ũendeee ĩũlũ wa nthĩ, na ta amanyĩwʼa ma Yesũ meyumĩtye, nĩmasiasya kĩla matonya kwĩka matetheesye.”

 Ngũsĩ sya Yeova itonya kũtetheesya ana-a-asa na eĩtu-a-asa ala me na vata wa ũtethyo ata? Nĩ kwa kumya mĩvothi kwondũ wa wĩa wa nthĩ yonthe, ĩndĩ ti kũtũmĩa movisi ma ũvonge ma nthĩ ingĩ mbesa ĩmwe kwa ĩmwe. No matũmĩe ĩsandũkũ ya mĩvothi kĩkundinĩ yĩla yĩthĩawa yĩandĩkĩtwe “Wĩa wa Nthĩ Yonthe,” kana makatũmĩa donate.pr418.com. Nĩtũtũngaa mũvea mũno nũndũ wa mĩvothi ĩsu yonthe.