We ũkomanaa na mathĩna meva kĩla mũthenya? Nĩwĩthĩwa wĩ mwene mũsyĩ na ũendeee kũng’ang’ana wĩanĩsye ianda mbingĩ ila wĩ nasyo? Nĩwĩthĩwa ũendeee kũng’ang’ana ũee syana wĩ weka? Nĩwĩthĩwa wĩ mũndũ wa mũika ũthing’ĩĩaw’a wĩke maũndũ mataĩle nĩ ala mũsomaa ĩmwe? Nĩwĩthĩwa wĩ na ũwau ũkũthĩnasya kana mathĩna angĩ maetetwe nĩ ũkũũ? Vaiĩ mũndũ ũtaendeee kũng’ang’ana na thĩna mũna. O na Aklĩsto aingĩ nĩmakwatĩtwe nĩ matatwa me kĩvathũkany’o ĩvindanĩ yĩmwe. O na ũu wĩ o vo, nĩtwĩsĩ kana o mĩtũkĩ nĩtũũvetewa mathĩna asu onthe.—2Ko 4:16-18.

Ĩndĩ ĩvinda yĩu yĩtanavika, nĩtũkiakiaw’a mũno kũmanya kana Yeova nĩwĩsĩ mathĩna maitũ onthe, nũtanaa yĩla twoomĩĩsya na tweethĩwa twĩ aĩkĩĩku, o na nũtwathĩte moathimo maingĩ. (Yel 29:11, 12) O nake Yesũ nũtũthĩnĩkĩaa mũno. Twaendeea kwĩanĩsya ianda ila twĩ nasyo twĩ Aklĩsto, atwathĩte kana akeethĩawa ‘vamwe naitũ.’ (Mt 28:20) Yĩla twavindĩĩsya ĩũlũ wa ũthasyo ũla ũkaetwe nĩ Ũsumbĩ wa Ngai, wĩkwatyo witũ nũlũlũmĩĩlaa, na tũikwata vinya wa kũmĩĩsya matatwa.—Alo 8:19-21.

ĨLOELEI VITIO YĨ NA KYONGO, ATĨĨA VYŨ NGELEKANY’O YA YESŨ O ŨNDŨ MŨMINŨKĨLYO ŨTHENGEEE!​—MOATHIMO ALA ŨSUMBĨ ŨKAETE, NA ĨNDĨ MŨISŨNGĨA MAKŨLYO AA:

• Nĩ kyaũ kyatumie andũ mavathanw’a na Ngai, na kĩu kyaetie maũndũ meva?

• Ala aĩkĩĩku kwa Yeova meteele moathimo meva ma ĩvinda yũkĩte?

• Moathimo asu makaetwe nĩ kyaũ?

• Nĩ moathimo meva weteele mũno kũtanĩa nthĩnĩ wa nthĩ nzaũ?