Twĩkalaa ĩũlũ wa nthĩ ĩla yendaa tũsũanĩe kana ũseo nĩ ũthũku na ũthũku nĩ ũseo. (Isa 5:20) Ũndũ wa kũmakya nĩ kana, andũ amwe mekaa maũndũ ala Yeova ũmenete. Maũndũ asu nĩ ta mũndũũme kũkoma na mũndũũme kana mũndũ mũka kũkoma na mũndũ mũka. Amũika maitũ no makengwe nĩ syana ila ingĩ sukulu meke maũndũ ala mataĩle. Ũtonya kũmbany’a syana syaku ata nĩ kana syĩthĩwe itonya kũsinda matatwa ta asu kana o angĩ?

Manyĩsya syana syaku ĩũlũ wa myolooto ya Yeova. (Ali 18:3) O kavola kwa kavola imanyĩsye kĩla Mbivilia imanyĩasya ĩũlũ wa maũndũ ma kũmanyana kĩ-mwĩĩ, na ũyĩimanyĩsya maũndũ mosanĩte na myaka yoo. (Kũt 6:7) Ĩkũlye-ĩ, ‘Nyie nĩnĩmanyĩasya syana syakwa ĩũlũ wa mĩvaka ĩla yaĩle ya kwonany’a wendo katĩ wa mũndũũme na mũndũ mũka, vata wa kwĩkĩa ngũa kwa nzĩa ĩla yaĩle, na andũ angĩ kwĩthĩwa mateũlikĩlĩĩla maũndũ masyo ma kĩmbithĩ? Syana syakwa nĩsyĩsĩ ũndũ syaĩle kwĩka ethĩwa ve mũndũ ũkwenda kũsyony’a mavisa ma ũlaalai, kana waitavya syĩke ũndũ ũtaĩle methonĩ ma Yeova?’ Kũimanyĩsya maũndũ aa kuma tene no kũitetheesye ikevathana na mathĩna maingĩ. (Nth 27:12; Mũta 7:12) Wamanyĩsya syana syaku, wĩthĩawa ũyonany’a kana nĩwendete ũtiĩwa ũsu wa vata kuma kwa Yeova.—Sav 127:3.

ĨLOELEI VITIO YĨ NA KYONGO, AKA NYŨMBA NDŨMU VYŨ​—SŨVĨANA SYANA SYAKU NA ‘MAŨNDŨ ALA MATHŨKU,’ NA ĨNDĨ MŨISŨNGĨA MAKŨLYO AA:

• Nĩkĩ asyai amwe maemawa nĩ kũmanyĩsya syana syoo maũndũ makonetye kũmanyana kĩ-mwĩĩ?

• Nĩkĩ asyai maĩle kũea syana syoo kwa “kũilũnga na kũitaa kwosana na ũndũ Yeova waĩtye”?—Aev 6:4

• Nĩ syĩndũ syĩva ũseũvyo wa Yeova umĩtye itonya kũtetheesya asyai kũmanyĩsya syana maũndũ makonetye kũmanyana kĩ-mwĩĩ?—w19.05 12, ĩsandũkũ

• Nĩkĩ waĩle kũeaa ngewa na syana syaku mathĩna matanamba kwĩthĩwa?