Kwaka ĩkalũ ĩvinda ya Aisilaeli kwaĩ wĩa mwingĩ na kwaĩ na ngalama nene. Ĩndĩ o na ũu wĩ o vo, nĩmatethisye wĩa ũsu na kĩthito. (1Mav 29:2-9; 2Mav 6:7, 8) Ĩtina wa ĩkalũ kwakwa, wĩa wa kũyĩtũngĩĩa nĩwesaa kwonany’a kana maĩ na ngwatanĩo nzeo kana nthũku na Yeova. (2Asu 22:3-6; 2Mav 28:24; 29:3) Ũmũnthĩ, Aklĩsto nĩmekĩaa kĩthito kingĩ kwaka, kũthesya, na kũtũngĩĩa Nyũmba sya Ũsumbĩ na Nyũmba sya Maũmbano Manene. Kwoou, kũthũkũma vamwe na Yeova kwa nzĩa ĩsu nĩ kĩanda kya vata mũno na nĩ ũthũkũmi mũtheu.—Sav 127:1; Ũvu 7:15.

• Kũthesya Nyũmba ya Ũsumbĩ ĩtina wa kĩla ũmbano. No wĩke ũu kwa kũkolany’a twĩndũ tũla tũtonya kwĩthĩwa tũvalũkĩte vakuvĩ na vala wĩĩkalĩte.

• Kwĩthĩwa wĩ ũmwe wa ala mekũthambya na kũtũngĩĩa Nyũmba ya Ũsumbĩ. Wĩa watetheanĩw’a wĩthĩawa wĩ laisi na andũ nĩmaũtanĩaa.—lv 92-93 ¶18.

• Kumya mĩvothi. O na mũndũ aumya na ngoo yonthe “tũwela twĩlĩ,” ũndũ ũsu nũmwendeeasya Yeova.—Mk 12:41-44.

• Kwĩyumya ethĩwa nũtonya ũtetheesye kwaka na kũtũngĩĩa nyũmba sya ũthaithi. Ti lasima mũndũ ethĩwe esĩ kwaka nĩ kana atetheesye wĩanĩ ũũ.