MWĨKALĨLE WA AKLĨSTO
Ĩyũmbanyʼe Oyu Ũndũ Ũwaa Ũtataĩĩe
Nĩkĩ waĩle kwĩyũmbanyʼa? Mũndũ nũtonya kũwaa ĩvinda o na yĩva, kana akakwatwa nĩ ũndũ ũngĩ ũkwenda ũiiti na mĩtũkĩ. Kwoou, ĩyũmbanyʼe nesa yu nĩ kana wĩthĩe ũkawaa ũtataĩĩe no ũkwate ũiiti ũla waĩle. Weeka ũu, ũkeethĩwa ũinenga thayũ ndaĩa na mwĩao wa nthakame ũla Yeova ũnenganĩte.—Mek 15:28, 29.
Nĩ maũndũ meva waĩle kwĩka nĩ kana wĩyũmbanyʼe?
-
Voya na ũyusũsya ũtasembete kaati yaku ya nthakame (DPA). a Atavanyʼa ala avatise no makwate kaati ĩsu ĩvinda o na yĩva kuma kwa mwana-a-asa ũla wĩthĩawa mũvĩanĩ wa mavuku. O na ĩngĩ, no metye Identity Card (ic) kwondũ wa syana syoo ila itavikĩtye myaka 18
-
Ethĩwa wĩ mũito, kũlya atumĩa maũnenge vomu yĩtawa Habari kwa Ajili ya Mama Wajawazito (S-401). Vomu ĩsu nĩkũũtetheesya wĩke motwi maseo ĩũlũ wa maũndũ makonetye ũiiti ala matonya kumĩla wĩ mũito kana ĩtina wa kũkwata mwana
-
Ethĩwa ũiiti waku nũtonya kũkonyʼa maũndũ ma nthakame kana wĩona nũtonya kũkoma sivitalĩ, tavya atumĩa kwĩ tene na ũitavya aũngamĩi ma sivitalĩ kana no wende ũkathokewa nĩ ũmwe wa Ngũsĩ sya Yeova
Atumĩa matonya kũtetheesya ata? Atumĩa no maũtetheesye kusũsya kaati ya DPA. Ĩndĩ atumĩa mayĩsa kũkwĩkĩa ũtwi maũndũnĩ ma ũiiti, o na mayĩsa kũweta mawoni moo maũndũnĩ ala we mwene waĩle kwĩnyuvĩa. (Alo 14:12; Aka 6:5) Watavya atumĩa ma kĩkundi kyenyu kana ũiiti waku nũtonya kũkonyʼa nthakame, nĩmekwosa ĩtambya na mĩtũkĩ maneene na ana-a-asa ma Kamitii ya Maũndũ ma Sivitalĩ (HLC) kwondũ waku.
Kamitii ya Maũndũ ma Sivitalĩ ĩtonya kũtetheesya ata? Ana-a-asa ala mathũkũmaa Kamitiinĩ ya Maũndũ ma Sivitalĩ methĩawa me amanyĩsye kũneena na matakĩtalĩ na ala mathũkũmanaa na maũndũ ma mĩao maelewe woni witũ ĩũlũ wa nthakame. Ana-a-asa asu nĩmatonya kũũtetheesya kwa kũneena na matakĩtalĩ ĩũlũ wa nzĩa ingĩ sya ũiiti itakonetye nthakame. Moona vaĩle, no maũtetheesye ũkakwata ndakĩtalĩ ũkũkũelewa.
ĨLOELEI VITIO ŨNDŨ TŨTONYA KWĨKA MOTWI MA ŨIITI ŨKONETYE NTHAKAME, NA ĨNDĨ MŨISŨNGĨA ĨKŨLYO YĨĨ:
-
Nĩ maũndũ meva weemanyĩsya vitionĩ ĩsu matonya kũũtetheesya wĩyũmbanyʼe ũndũ ũwaa ũtataĩĩe, na ũyendeka kwongelwa nthakame?
a Ĩsomo ya 39 ya ĩvuku Tanĩa Thayũ Tene na Tene! nĩyĩtonya kũũtetheesya mũno ũyĩka motwi ĩũlũ wa ũiiti ũkonetye nthakame.
