Kĩla mwaka, andũ ma Yeova nĩmethĩawa na mea maingĩ ma kũlilikana kĩkwʼũ kya Yesũ me vamwe. Syumwa mbũthũ ũmbano ũsu ũtanavika na syumwa mbũthũ wathela, nĩtũtũmĩaa nesa myanya ĩla yĩthĩawa vo kũmũtaĩa Yeova na kũmũtũngĩa mũvea nũndũ wa mũthĩnzĩo wa wovosyo. (Aev 1:3, 7) Kwa ngelekanyʼo, nĩtwĩkĩaa kĩthito vyũ tũthokye angĩ ũmbanonĩ wa kũlilikana kĩkwʼũ kya Yesũ. Amwe maitũ nĩmethĩawa matonya kwĩka moalyũku nĩ kana matwʼĩke mavainia atetheesya Mweinĩ wa 3 kana wa 4, me na kĩeleelo kya kwĩanĩsya masaa 30 kana 50. We no wende kwongelanga ũthũkũmi waku ĩvindanĩ yĩĩ ya kũlilikana kĩkwʼũ kya Yesũ? Nĩ kyaũ kĩtonya kũũtetheesya wĩanĩsye ũndũ ũsu?

Mavinda maingĩ, twĩthĩawa tũtonya kwĩanĩsya maũndũ maingĩ tweevanga kwĩ tene. (Nth 21:5) Yu nũndũ ĩvinda ya kũlilikana kĩkwʼũ kya Yesũ nĩyĩthengeee, yĩĩ nĩyo ĩvinda ya kwambĩĩa kwĩvanga. Sũanĩa ũndũ ũtonya kwongela ũthũkũmi waku ĩvindanĩ ya kũlilikana kĩkwʼũ kya Yesũ, na kĩla ũtonya kwĩka wĩanĩsye mĩvango yaku. Na ĩndĩ ũimũkũlya Yeova aathime kĩthito kyaku.—1Yo 5:14, 15.

No ũsũanĩe nzĩa imwe ũtonya kwongela ũthũkũmi waku ĩvindanĩ ya kũlilikana kĩkwʼũ kya Yesũ?