Nũndũ thĩna mũnene nũthengeee, twaĩle kũtethya wĩa witũ wa kũtavany’a na mĩtũkĩ. (Nth 24:11, 12, 20) Nĩ kana tũtetheesye andũ, no tũtũmĩe kaati sya kwelekelya andũ Kĩsesenĩ nĩ kana memanyĩsye Ndeto ya Ngai na kũlika Kĩsesenĩ kitũ. Kaati ĩsu yĩ na ũvano ũtonya kũtetheesya mũndũ akakwata vitio Nĩkĩ Waĩle Kwĩmanyĩsya Mbivilia? na nĩyonanĩtye ũndũ mũndũ ũtonya kwĩka enda kũkwata ũvoo mwingangĩ kana enda kwĩmanyĩsya Mbivilia. Andũ amwe mayendaa kwosa mavuku maitũ, ĩndĩ nĩmendeeaw’a nĩ kũlika Kĩsesenĩ kitũ. Kwoou ndũkew’e wia ũimanenga kaati ĩsu. Ĩndĩ o na ũu wĩ o vo, ndũkatiĩe andũ ala matekwendeew’a kaati isu.

O ũendeee na maũndũ maku ma kĩla mũthenya, no wambĩĩe ũneenanya na ndeto ii: “Vaa ve kĩndũ ngwenda ũkũnenga. Kaati ĩno yĩũtwaa Kĩsesenĩ kĩ na ũvoo na vitio ineeneete ĩũlũ wa maũndũ me kĩvathũkany’o.” (Yoa 4:7) Nũndũ kaati isu iyĩthĩawa syĩ nene, no ũkuae imwe nĩ kana ũkanengae andũ vaumĩla mwanya.