Momanyĩsyo ala me ĩvukunĩ Biblia Inatufundisha [Yĩinamba kumĩthw’a kwa kĩthyomo kya Kĩkamba] mosanĩte na ala me ĩvukunĩ Mbivilia Ĩmanyĩasya na onthe mavangĩtwe ũndũ ũmwe. Mavuku asu mamanyĩasya ũw’o kwa nzĩa ĩmwe nũndũ ũvoo ũla wĩ vo ũvangĩtwe ũndũ ũmwe. Ĩndĩ ĩvuku Biblia Inatufundisha yĩandĩkĩtwe nĩ kana yĩtetheesye ala mew’aa ne vinya kũelewa ĩvuku Mbivilia Ĩmanyĩasya. Vandũ va kwĩthĩwa na ũvoo wa kwongeleela, ĩvuku Biblia Inatufundisha yĩ na maelesyo ma mũthya maeleetye kwa nzĩa yĩ laisi ndeto na momanyĩsyo amwe me ĩvukunĩ yĩu. Ilungu sya ĩvuku yĩu iina makũlyo ma kwambĩĩa kana kasandũkũ kala ke na kyongo Ũndũ Mbivilia Ĩmanyĩasya. Ĩndĩ vandũ va ũu, mũthyanĩ wa ilungu ve kyongo kyonanĩtye maũndũ ala manene maeleetye ũw’o wa Mbivilia ũla ũneeneetwe kĩlungunĩ kĩu. O tondũ tũnenganae ĩvuku Mbivilia Ĩmanyĩasya o na ethĩwa tiyo yaĩle kũnenganwe mwei mũna, now’o tũkanenganae ĩvuku Kũtũmanyĩsya. Nĩ kwa nzĩa yĩva tũtonya kũtũmĩa maũndũ ala me ĩvukunĩ yĩu tũyĩmanyĩsya Mbivilia na mũndũ?

MAŨNDŨ ALA MANENE: Nzĩa ĩla tũtũmĩaa ĩla tũkwĩmanyĩsya Mbivilia na andũ ya kwamba kũsoma kalungu nthĩnĩ wa ĩvuku Mbivilia Ĩmanyĩasya, na ĩndĩ tũikũlya ĩkũlyo, ĩkeethĩawa yĩ nzeo. Nao nata ethĩwa mũmanyĩw’a ndesĩ nesa kĩthyomo kĩla ũkwĩmanyĩsya nakyo kana ndesĩ kũsoma nesa? Ethĩwa vailyĩ ũu, no ũvange kũtũmĩa ĩvuku Biblia Inatufundisha. Na ĩndĩ no mũtũmĩe maũndũ ala manene ĩla mũkwĩmanyĩsya, na ũithuthya mũmanyĩw’a ese kũsoma tũlungu ĩvindanĩ yake. Mavinda maingĩ, no mũtũmĩe ndatĩka ta 15 kwĩmanyĩsya ũw’o ũmwe wa Mbivilia. Nũndũ maũndũ ala manene mai na maelesyo maingĩ ala maeleetw’e tũlungunĩ, no nginya mwalimũ eyũmbany’e nesa vyũ, alilikene mavata ma mũmanyĩw’a. Na ethĩwa mwalimũ emanyĩsya atũmĩĩte ũvoo ũla wĩ tũlungunĩ, maũndũ manene no matũmĩwe tamo maũndũ ma kũsyokeleela.

MAELESYO MA MŨTHYA: Maũndũ ala me nthĩnĩ wa maelesyo ma mũthya mavangĩtwe kwosana na ilungu ila maneeneetwe. Mwalimũ no atw’e kũneenea kana o akaema kũneenea maelesyo ma mũthya ala me ĩvukunĩ Biblia Inatufundisha aendeee kwĩmanyĩsya na mũmanyĩw’a.