ĨKĨA KĨTHITO WĨTHIWE MŨTAVANY’A MŨSEO
Ũndũ Tũtonya Kwĩthĩwa Atavany’a Aseo—Kũnengane Makaseti Ũtũmĩĩte Ndeto Syaku
NĨKĨ NĨ ŨNDŨ WA VATA: O na kau maũndũ ma kwasya ala methĩawa kavukunĩ kaa ka kwĩmanyĩsya ka ũmbano no matũtethye ĩla twĩ ũtavany’anĩ, asu methĩawa me o maũndũ ma kũtwony’a ũndũ tũtonya kũnengane ĩkaseti. Nĩwaĩle kũtũmĩa ndeto syaku. No wone ve vata wa kũtũmĩa nzĩa yĩ kĩvathũkany’o kana kyongo kĩngĩ kĩtonya kwendeesya mwene nyũmba mũnango. Veethĩwa vailyĩ ũu, wamina kũsoma ĩkaseti, wasisya maũndũ ma kwasya, na kwona mawonany’o ala me vitionĩ, no ũtumĩe maũndũ aa monanĩtw’e vaa nĩ kana ũseũvye nzĩa yaku ya kũnengane ĩkaseti.
ŨNDŨ ŨTONYA KWĨKA:
Ĩkũlye-ĩ, ‘No nende kũtũmĩa ũmwe wa maũndũ ma kwasya ala monanĩtw’e vaa?’
ĨĨ
-
Mantha ndeto sya kwambĩĩa. Mwamina kũkethany’a, weta o kwa ũkuvĩ nĩkĩ wamũthokea. (Kwa ngelekany’o, no wasye: “Kĩtumi kya kũũthokea nĩ . . . ”)
-
Vanga ĩkũlyo yĩla ũũmũkũlya, na ĩtina wa ũu ũimantha ũndũ ũkwasya nĩ kana ũmũsomee ĩandĩko, na ĩndĩ ũimantha ndeto ila ũũtũmĩa nĩ kana ũmũnenge ĩkaseti. (Kwa ngelekany’o: Wamina kũmũkũlya ĩkũlyo, no ũtũmĩe ndeto ii ũtanamba kũmũsomea ĩandĩko, “Ũsũngĩo wa ĩkũlyo yĩu wĩ ĩandĩkonĩ yĩĩ.”)
AIEE
-
Nyuva kyongo kĩmwe kĩkwendeeisye ĩkasetinĩ, na ũkwona kĩtonya kwendeesya andũ kĩsionĩ
-
Mantha ĩkũlyo yĩtonya kũtuma mwene nyũmba asũanĩa na endeew’a nĩ maũndũ ala mũkwĩthĩwa mũineenea, ĩndĩ ndũkamũkũlye ĩkũlyo ũtasũngĩĩkya. (Kwa ngelekany’o, no ũtũmĩe makũlyo ala methĩawa ĩthangũnĩ ya 2 ya ĩkaseti ya Mũsyaĩĩsya.)
-
Nyuva ĩandĩko yĩla ũũsoma. (Ethĩwa wĩnengane ĩkaseti ya Amkeni!, ti lasima ũkasoma ĩandĩko nũndũ ĩkaseti yĩĩ yumĩtw’e yĩtetheesye andũ ala me na ũmanyi ũte mwingĩ ĩũlũ wa Mbivilia, kana ala mataĩkĩĩaa ndĩni.)
-
Vanga ndeto nguvĩ ũtonya kũtũmĩa kũelesya mwene nyũmba ũndũ ũtonya kũtetheka asoma ĩkaseti yĩĩ
NO WĨKE MAŨNDŨ AA ETHĨWA ŨSŨNGĨO NĨ ĨĨ, KANA NĨ AIEE
-
Vanga ĩkũlyo yĩla ũkamũsũngĩa ĩla wĩsyoka
-
Andĩka maũndũ maũkũtetheesya kũlilikana kĩla ũkwenda kũthi kũweta wasyoka
