Mbulosua Naaũ Mekaa Kwenda kwa Yeova Ũmũnthĩ? ĩseũvĩtw’e nĩ kana tũkemanyĩasya na mũmanyĩw’a mwambĩĩonĩ kana mũthyanĩ wa ĩsomo. * Ĩsomo ya 1 nginya ya 4 nĩyĩtetheeasya amanyĩw’a maelewe Ngũsĩ sya Yeova, nayo ĩsomo ya 5 nginya ya 14 nĩyĩmatetheeasya maelewe wĩa witũ, na ĩsomo ya 15 nginya ya 28 nĩyĩtetheeasya amanyĩw’a maelewe maũndũ ala ũseũvyo wa Yeova ũendeeasya. Mavinda maingĩ nũseo kũneenea masomo asu maatĩanĩe ethĩwa vai ũndũ wa vata vyũ mũmanyĩw’a waĩle kũmanya saa isu. Kĩla ĩsomo yĩthĩawa o ĩthangũnĩ yĩmwe na no ũyĩneenee na amanyĩw’a ma Mbivilia kwa ĩvinda ya ndatĩka 5 nginya 10.

• Tetheesya mũmanyĩw’a asũanĩe ĩkũlyo ya kyongo kya ĩsomo yĩla mũkwĩmanyĩsya

• Somai maũndũ ala me ĩsomonĩ yĩu nginya mũthya, kana o kalungu kũthi kala kangĩ

• Neeneai maũndũ ala mwasoma. Tũmĩa makũlyo ala me mũthyanĩ wa ĩsomo yĩu na mavisa. Somai na mũineenea maandĩko ala me ĩsomonĩ yĩu ũndũ mwĩona vaĩlĩte. Elesya kana syongo nini ila syĩ na langi mũkwatu na syĩ ungu wa kyongo kĩnene isũngĩĩte ĩkũlyo yĩla yĩ kyongonĩ kĩnene

• Ethĩwa ve kasandũkũ kala ke na kyongo “Manya Maũndũ Maingangĩ,” kasomei vamwe na ũithuthya mũmanyĩw’a atate kwĩka maũndũ ala me kasandũkũnĩ kau