Mbulosua Mwĩthukĩĩsye Ngai ĩseũvĩtw’e kwondũ wa kũmanyĩsya momanyĩsyo ma mũsingi tũitũmĩa mavisa. Mbulosua ĩno ĩtũmĩawa ĩla tũkwĩmanyĩsya na andũ ala matatonya kwĩmanyĩsya matũmĩĩte mavuku ala maandĩkĩtwe maũndũ maingĩ. Kĩla ĩsomo yĩneenewe mathangũnĩ elĩ na yĩthĩawa na mavisa masũanĩĩwe nesa, na kĩla ĩvisa yĩ na kaũvano kakwonetye visa ũla ũatĩĩe waĩle kũneenea.

Mbulosua Mwĩthukĩĩsye Ngai Wĩkale Tene na Tene yĩ na mavisa mavw’anene na ala me mbulosuanĩ Mwĩthukĩĩsye Ngai, ĩndĩ yĩ na ũvoo mwingangĩ na no ĩtũmĩwe nĩ amanyĩw’a ala me na ũtonyi wĩana ũna wa kũsoma. Mavinda maingĩ atavany’a nĩmendete kũtũmĩa mbulosua ĩsu ĩla mekũmanyĩsya, nake mũmanyĩw’a aitũmĩa mbulosua Mwĩthukĩĩsye Ngai. Mathangũ maingĩ ma mbulosua ĩsu me na ĩsandũkũ yĩ na ũvoo mwingangĩ ũla ũtonya kũneenewa kwosana na ũtonyi wa mũmanyĩw’a.

No ũnengane mbulosua isu kĩla ĩvinda o na ethĩwa ti syo ikũnenganwe mwei ũsu. Ĩla ũendeee na kũmanyĩsya mũndũ Mbivilia, tũmĩa mavisa nĩ kana ũelesye ũvoo ũla wĩ Mbivilianĩ. Kũlya mũmanyĩw’a makũlyo nĩ kana kĩlĩko kyake kĩthĩwe maũndũnĩ ala mũkwĩmanyĩsya, na nĩ kana ũĩkĩĩthye nĩwaelewa nesa. Soma na ũineenea maandĩko ala me mũthyanĩ wa kĩla ĩthangũ. Mwamina kwĩmanyĩsya mbulosua ĩsu, ĩmanyĩsyei ĩvuku Mbivilia Yo Ĩmanyĩasya Ata? kana ĩvuku Biblia Inatufundisha Nini? nĩ kana ũtetheesye mũmanyĩw’a waku eke maendeeo nginya avatiswe.