NĨKĨ NĨ ŨNDŨ WA VATA: Ĩla amanyĩw’a ma Mbivilia meeyũmbany’a, wĩthĩawa wĩ ũndũ wĩ laisi kũelewa na kũlilikana maũndũ ala twamamanyĩsya. Na o ũndũ maelewa na malilikana maũndũ asu, wĩthĩaa nĩ ũndũ wĩ laisi kwoo kwĩka maendeeo. O na mavatiswa, makeethĩwa maĩle kwĩyũmbanasya kwondũ wa maũmbano na ũtavany’a nĩ kana maendeee ‘kũsyaĩĩsya.’ (Mt 25:13) Kwoou, mamanya ũndũ matonya kwĩmanyĩsya na meethĩwa na kĩmanyĩo kya kwĩkaa ũu mateũtĩĩa, makatetheka thayũnĩ woo w’onthe. Kuma twambĩĩa kwĩmanyĩsya na amanyĩw’a, nĩtwaĩle kũmatetheesya methĩwe na kĩmanyĩo kya kwĩyũmbanasya kwondũ wa ĩsomo yĩla tũkwĩmanyĩsya.

ŨTONYA KWĨKA ŨU ATA?:

• Ĩthĩwa ngelekany’o nzeo. (Alo 2:21) Ĩyũmbanasye ũlilikene mavata ma mũmanyĩw’a waku. (km 11/15 3) Mwony’e ĩvuku yaku one ũndũ ũkululĩĩle

• Mwĩkĩe vinya eyũmbanasye. Mwambĩĩa kwĩmanyĩsya, elesya mũmanyĩw’a waku kana nĩwaĩle kwĩthĩawa eyũmbanĩtye mũisoma, na ũimũelesya ũndũ ũkatetheka eeka ũu. Mwony’e ũndũ ũtonya kũmantha ĩvinda maũndũnĩ make nĩ kana eyũmbany’e. Atavany’a amwe nĩmanengae amanyĩw’a ĩvuku yoo yĩla makululĩĩle ĩla meũsoma nĩ kana mamatetheesye mone ũndũ matonya kũtetheka meeyũmbany’a. Ethĩwa nĩweethĩa mũmanyĩw’a waku eyũmbanĩtye mũkathe

• Mwony’e ũndũ ũkeyũmbanasya. Vandũ va kũtavya mũmanyĩw’a ũndũ ũkeyũmbanasya, atavany’a amwe nĩmatũmĩaa ĩvinda yĩla meevangĩte kwĩmanyĩsya na mũmanyĩw’a nĩ kana mamwony’e ũndũ ũtonya kũmbanasya kĩla meũsoma