Visa nitumaa andũ maelewa nesa kĩla mamanyĩw’a na mayĩkala makĩlilikene. Yeova, Mũmanyĩsya Ũla Mũnene, nĩwatũmĩie visa kũmanyĩsya maũndũ ma vata. (Mwa 15:5; Yel 18:1-6) O nake Yesũ, ũla Mwalimũ Mũnene, nĩwatũmĩie nzĩa ta ĩsu ya kũmanyĩsya. (Mt 18:2-6; 22:19-21) Nzĩa ĩmwe ya mũthemba ũsu ĩtũmĩĩtwe kũtetheesya andũ matukũ aa nĩ vitio. We nũtũmĩaa vitio yĩla ũkũmanyĩsya amanyĩw’a maku ma Mbivilia?

Vitio ĩkũmi itonya kũtũmĩwa kũmanyĩsya mbulosua Ũvoo Mũseo Kuma kwa Ngai! nĩsyumĩtw’e. Kĩla vitio yĩthĩawa ĩneenee ĩkũlyo yĩmwe katĩ wa makũlyo ala me mbulosuanĩ ĩno maandĩkĩtwe na langi mũkundu. Mbulosua ĩla yĩ kĩsesenĩ nĩyĩthĩawa yonanĩtye yĩla twaĩle kwony’a mũmanyĩw’a wa Mbivilia kĩla ĩmwe ya vitio isu. O na eka ũu, ve vitio ingĩ tũtonya kwonany’a yĩla tũũtũmĩa mavuku angĩ ala tũtũmĩaa mũno kũmanyĩsya.

Nĩmwĩthĩwa mũineenea ĩsomo ĩna ya Mbivilia mũmanyĩw’a waku ũkwĩw’a yĩ vinya? Kana mũmanyĩw’a waku nĩwĩthĩwa e na thĩna mũna? Mantha vitio ĩtonya kũmũtetheesya kĩsesenĩ kya jw.org® kana JW Broadcasting®. No mũmĩloele vamwe na mũimĩneenea.

Kĩla mwei vitio nzaũ nĩsyumaw’a. Yĩla ũkwĩloela vitio isu, sũanĩa ũndũ ũtonya kũitũmĩa kũmanyĩsya angĩ.